ភ្នំពេញ៖ លោក ស៊ូ សាវ៉ាង នាយកប្រតិបត្តិសមាគមចលនាវប្បធម៌ជាតិ ត្រូវបានបញ្ជូនទៅបន្ទប់សង្គ្រោះបន្ទាន់ កាលពីយប់ថ្ងៃទី៩ ខែតុលា ម្សិលមិញ បន្ទាប់ពីលោកបានធ្លាក់ខ្លួនឈឺធ្ងន់ ក្នុងអំឡុងមួយសប្ដាហ៍ចុងក្រោយនេះ។
លោក ស៊ូ វណ្ណៈ ត្រូវជាកូនប្រុសពៅរបស់លោក ស៊ូ សាវ៉ាង ហៅហ្វុយស្សូ បានប្រាប់សារព័ត៌មានថ្មីៗ តាមទូរសព្ទថា ពេលនេះអាការជំងឺរបស់ឪពុករបស់លោក កំពុងស្ថិតក្នុងការតាមដាន ក្នុងបន្ទប់សង្គ្រោះបន្ទាន់។ លោកបន្ថែមថា ឪពុករបស់លោក មានអាការម្ដងក្ដៅម្ដងត្រជាក់ ប្រែប្រួលភ្លាមៗ។ អ្វីដែលគួរឱ្យកត់សម្គាល់នោះ គឺនៅពេលដែលខ្លួនរបស់លោក សាវ៉ាង ចាប់ផ្ដើមឡើងកម្តៅ លោកក៏ចាប់ផ្ដើមហត់ដែរ។ ហើយពេលដែល ខ្លួនរបស់លោកចុះត្រជាក់វិញ លោកក៏មិនហត់ដែរ។
«ទើបតែរយៈពេលមួយខែចុងក្រោយនេះ គាត់ធ្វើទុក្ខ គាត់ឧស្សាហ៍ក្អក។ យើងក៏មិនសូវចាប់អារម្មណ៍ ព្រោះជាប្រចាំថ្ងៃធម្មតា យូរៗគាត់ក្អកម្ដង ហើយគាត់ក៏ពិសាថ្នាំបញ្ចុះកម្ដៅដែរ ក៏បាត់ទៅវិញ។ ប៉ុន្តែក្នុងអំឡុងពេលមួយអាទិត្យចុងក្រោយនេះ គាត់ធ្វើទុក្ខខ្លាំង»។ នេះជាការពន្យល់របស់លោក វណ្ណៈ។
លោក ស៊ូ វណ្ណៈ បន្ថែមទៀតថា តាមការតាមដានរោគសញ្ញា គ្រូពេទ្យសង្ស័យថាលោក ស៊ូ សាវ៉ាង មានមេរោគក្នុងឈាម និងមានមេរោគក្នុងសួត។ យ៉ាងណា មេរោគក្នុងសួត ពេទ្យប៉ាន់ស្មានថាជាជំងឺរបេងចាស់ដែលធ្លាប់បានព្យាបាលជាហើយ ប៉ុន្តែរើឡើងវិញ។ យ៉ាងណាក៏ដោយ នៅរៀងរាល់ពេលដែលលោក ស៊ូ សាវ៉ាង ចូលមន្ទីរពេទ្យ មានការតម្រូវឱ្យលោក ធ្វើតេសរងជំងឺកូវីដ-១៩ ប៉ុន្តែរាល់ដង គឺសុទ្ធតែអវិជ្ជមាន។
លោក ស៊ូ វណ្ណៈ បញ្ជាក់៖«ធ្វើតេសរកកូវីដ រយៈពេល៥ថ្ងៃហើយ តែក្រសួងមិនផ្ដល់ដំណឹងមក យើងក៏យកគាត់ទៅពេទ្យ ព្រោះគាត់ហត់ខ្លាំង។ ជាទូទៅតេសម៉ាស៊ីនធំរយៈពេល៣ថ្ងៃ លុះត្រាណាតែវិជ្ជមានកូវីដ ទើបគេហៅទូរសព្ទមកប្រាប់យើង ប្រសិនបើអវិជ្ជមាន គេមិនហៅមកទេ។ គ្រប់ពេលដែលគាត់ទៅពេទ្យដាក់ស៊ឺរ៉ូម ពេទ្យធ្វើតេសទាំងរហ័សនិងម៉ាស៊ីនធំ។ រយៈពេល៦ថ្ងៃ ដែលគាត់ទៅពេទ្យ គេធ្វើតេស៥ដងហើយ»។
កូនប្រុសពៅរបស់លោក ស៊ូ សាវ៉ាង គឺលោក ស៊ូ វណ្ណៈ បានសង្កត់ធ្ងន់ថា ការប្រាប់ដំណឹងពីជំងឺរបស់ឪពុករបស់លោកនេះ លោកពុំមានចេតនា ដើម្បីសុំជំនួយពីភាគីណាឡើយ គឺគ្រាន់តែចង់ឱ្យសាធារណជន បានដឹងពីស្ថានភាពជំងឺឪពុករបស់ខ្លួនប៉ុណ្ណោះ។
«តាមពិតទៅខ្ញុំមិនចង់ឱ្យផ្សាយទេ ព្រោះខ្លាចគេរិះគន់ថា ខ្ញុំផ្សាយដើម្បីសុំជំនួយ។ ធាតុពិតខ្ញុំក៏ខ្វះខាតដែរ ប៉ុន្តែខ្ញុំមិនចង់បានជំនួយ ដែលមិនមែនចេញពីចិត្តរបស់គេទេ។ យើងកំពុងតែមានទុក្ខទៅហើយ ហើយបើគេនិយាយរិះគន់ទៀត អារម្មណ៍យើងកាន់តែពិបាកមួយកម្រិតទៀត»។ នេះជាការតាំងចិត្តរបស់លោក ស៊ូ វណ្ណៈ។
សូមបញ្ជាក់ថា បច្ចុប្បន្នលោក ស៊ូ សាវ៉ាង មានជន្មាយុ៧៨ឆ្នាំ។ លោកមានកូនប្រុសចំនួន៤នាក់។ បច្ចុប្បន្នលោកមានជំងឺទឹកនោមផ្អែម និងលើសឈាម។ លោក សាវ៉ាង ធ្លាប់មានជំងឺរបេងសួត កាលពីប្រមាណជិត២០មុន ប៉ុន្តែលោកបានព្យាបាលជាសះស្បើយតាំងពីកាលនោះដែរ។ កាលពីប៉ុន្មានឆ្នាំមុន លោក សាវ៉ាង ធ្លាប់បានវះកាត់ថ្លើម ហើយតាំងពីវះកាត់មក លោករស់ដោយមានថ្លើមតែមួយចំហៀងប៉ុណ្ណោះ។ ដោយសារមានជំងឺបែបនេះ ធ្វើឱ្យសុខភាពរបស់លោក ស៊ូ សាវ៉ាង ខ្សោយជាងមនុស្សធម្មតា៕