យោងតាមសេចក្ដីថ្លែងការណ៍ចេញផ្សាយថ្ងៃទី២០ ខែធ្នូ ប្រមុខការទូតអាម៉េរិក អាន់តូនី ប្ល៊ីងខិន បាន​តែងតាំងលោកស្រី Uzra Zeya ឱ្យទទួលបន្ទុកដឹកនាំកិច្ចប្រឹងប្រែងរបស់អាម៉េរិកដើម្បីរក្សាសាសនា វប្បធម៌ និងភាសានៃតំបន់ទីបេ។ ទីក្រុងវ៉ាស៊ីនតោន តែងអះអាងថា ប្រជាជននៅតំបន់នោះ កំពុងតែ​ប្រឈម​មុខ​នឹង​ការរំលោភសិទ្ធិដោយរដ្ឋាភិបាលទីក្រុងប៉េកាំង។

 

បន្ថែមពីនេះលោក ប្ល៊ីងខិន លើកឡើងថាលោកស្រី Zeya នឹងជួយជំរុញឱ្យមានកិច្ចសន្ទនារវាងចិន និងមេដឹកនាំទីបេសម្តេចសង្ឃ ដាឡៃ ឡាម៉ា ដែលកំពុងនិរទេសខ្លួនទៅឥណ្ឌា ឬជាមួយ​មេដឹកនាំ​ទីបេ​ដទៃទៀតដែលបានជាប់ឆ្នោតតាមបែបប្រជាធិបតេយ្យ។

 

ជុំវិញការតែងតាំងនេះ យុទ្ធនាការអន្តរជាតិសម្រាប់ទីបេបានស្វាគមន៍តួនាទីថ្មីរបស់លោកស្រី Zeya។ បន្ថែមពីនេះ ក្នុងសេចក្តីថ្លែងការណ៍តាមអ៊ីមែល ប្រធានាធិបតីបណ្តោះអាសន្នទីបេលោក Bhuchung Tsering ក៏បានជំរុញឱ្យលោកស្រី Zeya នាំមុខក្នុងការកៀរគរការគាំទ្រ​ពី​បណ្តា​ប្រទេស​ដែល​មាន​គំនិត​ដូចគ្នាដើម្បីបង្កើតវិធីសាស្រ្តរួមគ្នា ដូចគោលនយោបាយ និងច្បាប់គាំទ្រ​ទីបេដែលបាន​អនុម័ត​នៅ​អាម៉េរិកកាលពីឆ្នាំ២០២០។
 

យ៉ាងណាមិញ ចិនឯណោះបានប្រតិកម្មមិនពេញចិត្តភ្លាមៗចំពោះរឿងខាងលើ។ តាមរយៈស្ថានទូត នៅទីក្រុងវ៉ាស៊ីនតោននៅថ្ងៃទី២០ ខែធ្នូ ចិនបានថ្កោល​ទោស​ចំណាត់ការ​នេះ ហើយថានេះ​ជា​ការ​ជ្រៀតចូលរឿងនយោបាយរបស់ខ្លួន។ 

 

«អាម៉េរិកគួរតែបញ្ឈប់ការជ្រៀតជ្រែកក្នុងកិច្ចការផ្ទៃក្នុងរបស់ចិន ក្រោមលេសនៃ​បញ្ហាដែ​ល​ទាក់ទង​នឹងទីបេ ដែលនឹងធ្វើឱ្យតំបន់នេះមានអស្ថិរភាព។ ចិននឹងចាត់វិធានការ​ចាំបា​ច់​ទាំងអស់​ដើម្បី​ការពា​រ​ផលប្រយោជន៍របស់យើង»។ អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោនលោក​ Liu Pengyu បានសង្កត់ធ្ងន់បែបនេះដោយមិនបានអធិប្បាយបន្ថែមទៀតឡើយ។

 

គួរបញ្ជាក់ថា ចិនបានក្ដៅស្លឹកត្រចៀកម្ដងហើយនៅពេលដែលអាម៉េរិកបានតែតាំងអ្នកសម្របសម្រួល​បញ្ហាទីបេអំឡុងរដ្ឋបាលអតីតប្រធានាធិបតីអាម៉េរិក​ ដូណាល់ ត្រាំ ។ ចិនក៏បានចោទ​អាម៉េរិកថា បាន​បង្កអស្ថិរភាពនៅតំបន់ទីបេផងដែរ៕