តាមការបញ្ជាក់របស់ក្រសួងយុត្តិធម៌ជប៉ុន អ្នកទោសចំនួន ៣រូប ត្រូវបានប្រហារជីវិត នៅថ្ងៃទី២១ ខែធ្នូ។ នេះជាការប្រហារជីវិតលើកដំបូង បើគិតចាប់ពីចុងឆ្នាំ២០១៩ មក និងក្រោមការដឹកនាំរបស់លោកនាយករដ្ឋមន្រ្តី លោក គីស៊ីដា ហ្វូមីអូ។ អ្នកទោស ដែលរង់ចាំការកាត់ទោសប្រហារជីវិតនៅជប៉ុន នៅសល់ចំនួន ១០៧រូបទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន Kyodo។ 

 

អ្នកទោសទាំង ៣រូបនេះ សុទ្ធតែបានប្រព្រឹត្តបទល្មើសឃាតកម្មនៅក្នុងឆ្នាំ ២០០៤ និងឆ្នាំ២០០៣។ បើទោះមតិសាធារណៈរបស់ជប៉ុន នៅតែបន្តគាំទ្រការកាត់ទោសប្រហារជីវិត ប៉ុន្តែជប៉ុនបានរងការរិះគន់ជាច្រើនលើកពីសហគមន៍អន្តរជាតិ និងក្រុមសិទ្ធិមនុស្ស។ ការប្រហារជីវិតនៅជប៉ុន ភាគច្រើនត្រូវបានអនុវត្តដោយការព្យួរក ខណៈអ្នកទោសត្រូវរង់ចាំអនុវត្តទោសរយៈពេលយូរ បន្ទាប់ពីតុលាការចេញសេចក្តីសម្រេច។ 

 

បន្ទាប់ពីការប្រហារជីវិតអ្នកទោសរួច អនុប្រធានលេខាធិការគណៈរដ្ឋមន្ត្រី លោក Seiji Kihara បានប្រាប់អ្នកសារព័ត៌មានថា វាមិនសក្តិសមឡើយ ក្នុងការលុបចោលប្រព័ន្ធប្រហារជីវិតរបស់ប្រទេស ខណៈឧក្រិដ្ឋកម្មនៅតែបន្តកើតឡើង។ 

 

តាមរបាយការណ៍របស់អង្គការលើកលែងទោសអន្តរជាតិ ប្រទេសច្រើនជាង ២ភាគ៣ នៅលើពិភពលោក បានលុបចោលទោសប្រហារជីវិត ដែលមានចែងនៅក្នុងច្បាប់របស់ខ្លួន៕