ជាតិ
សង្ឃប្រកាស៖ អ្នកបួសមិនត្រូវចូលរួមដង្ហែបាតុកម្ម ឬយកធម៌ទៅសម្តែងកំប្លុកកំប្លែងឡើយ ![](https://image.thmeythmey.com/pictures/2021/12/21/monk.jpg)
×![]()
អង្គអនុសំវច្ឆរមហាសន្និបាតមន្ត្រីសង្ឃលើកទី២៩ ពីថ្ងៃទី២០ ដល់ទី២១ ខែធ្នូ នៅសាលសន្និសីទចតុមុខ បានសម្រេចដាក់ចេញនូវសង្ឃប្រកាសសម្រាប់អនុវត្ត ដែលក្នុងនោះមានខ្លឹមសារជាច្រើនទាក់ទងនឹងការពង្រឹងវិន័យបុព្វជិតពុទ្ធសាសនា ជាពិសេសការហាមប្រាមទង្វើមួយចំនួនដែលប្រាសគោលធម៌ វិន័យ។
«បុព្វជិតពុទ្ធសាសនាកម្ពុជា មានសិទ្ធិសេរីភាពក្នុងការសម្តែងមតិស្របច្បាប់តាមរដ្ឋធម្មនុញ្ញ ប៉ុន្តែមិនត្រូវធ្វើ ឬចូលរួមដង្ហែជាក្បួនបាតុកម្ម កូដកម្ម កុបកម្មក្នុងទីសាធារណៈ ដែលជាហេតុនាំឲ្យបាត់បង់សេចក្តីថ្លៃថ្នូរ ភេទជាអ្នកបួស ប៉ះពាល់ដល់សន្តិសុខ និងសណ្តាប់ធ្នាប់សារធារណៈ»។ នេះជាការបញ្ជាក់ក្នុងសង្ឃប្រកាស។
សេចក្តីសម្រេចដែលចុះព្រះហស្តលេខាដោយសម្តេចសង្ឃនាយករងទី១ អំ លឹមហេង និងលោក ផ្លោក ផន រដ្ឋមន្ត្រីស្តីទីក្រសួងធម្មការ និងសាសនា បានណែនាំឲ្យមានការសម្តែងធម៌ទេសនា តាមក្រឹត្យក្រមធម៌វិន័យរបស់អ្នកបួស ដោយមិនត្រូវយកធម៌ទៅសម្តែងបែបកំប្លុកកំប្លែង ប្រាសចាកគោលធម៌ វិន័យ អង្គនៃធម្មកថិក និងវាចារបស់អ្នកបួស។
អង្គអនុសំវច្ឆរមហាសន្និបាត សម្រេចកំណត់ឲ្យភិក្ខុ-សាមណេរនៃគណៈមហានិកាយ ប្រើប្រាស់សំពត់កាសាវពស្ត្រ (ស្បង់ស្បៃត្រៃចីវរ) តែពីរពណ៌ប៉ុណ្ណោះ គឺពណ៌ទឹកក្រូច និងពណ៌ខ្លឹមខ្នុរ។ រីឯភិក្ខុ-សាមណេរមិនស្តាប់ឱវាទ អស្មិមានះ នឹងត្រូវបានដាក់ឲ្យនៅក្រៅសង្វាស និងសហគមន៍សង្ឃ។
ជាមួយគ្នានេះ សង្ឃប្រកាស ក៏បានតម្រូវឲ្យគណៈសង្ឃនាយក សហការជាមួយក្រសួងធម្មការ និងសាសនា បន្តរៀបចំបង្កើតគណៈកម្មាធិការក្រុមជំនុំព្រះត្រៃបិដក ដើម្បីបកប្រែកម្ពីរអដ្ឋកថា ដីកា យោជនាពីបាលីមកខេមរភាសា ផងដែរ៕
© រក្សាសិទ្ធិដោយ thmeythmey.com