អន្តរជាតិ
កូរ៉េខាងជើង បន្លុយថា ខ្លួនអាចធ្វើតេស្តនុយក្លេអ៊ែរ និងមីស៊ីលអន្តរទ្វីបឡើងវិញ ![ប្រមុខដឹកនាំកូរ៉េខាងជើង គីម ជុងអ៊ុន ដឹកនាំកិច្ចប្រជុំការិយាល័យនយោបាយបក្សពលករកូរ៉េ។ រូបថត KCNA](https://image.thmeythmey.com/pictures/2022/01/20/agagag.jpg)
ប្រមុខដឹកនាំកូរ៉េខាងជើង គីម ជុងអ៊ុន ដឹកនាំកិច្ចប្រជុំការិយាល័យនយោបាយបក្សពលករកូរ៉េ។ រូបថត KCNA
×![]()
ប្រព័ន្ធផ្សព្វផ្សាយរដ្ឋកូរ៉េខាងជើង នៅថ្ងៃទី២០ ខែមករា បានបន្លុយពាក្យមកថា ទីក្រុងព្យុងយ៉ាង អាចនឹងចាប់ផ្ដើមការធ្វើតេស្តអាវុធនុយក្លេអ៊ែរ និងមីស៊ីលផ្លោងចម្ងាយឆ្ងាយឡើងវិញ ស្របពេលមន្ត្រីកូរ៉េខាងជើងលើកឡើងថា ទីក្រុងព្យុងយ៉ាង កំពុងតែរៀបចំខ្លួនសម្រាប់ការប្រឈមមុខគ្នារយៈពេលវែងជាមួយអាម៉េរិក។
ទោះបីជារងទណ្ឌកម្មអន្តរជាតិក៏ដោយ ទីក្រុងព្យុងយ៉ាងបានបន្តតេស្តមីស៊ីលជាច្រើនដងក្នុងឆ្នាំថ្មីនេះ រួមទាំងមីស៊ីលល្បឿនលឿនជាងសំឡេងផងដែរ។ លើសពីនេះ មេដឹកនាំកូរ៉េខាងជើង គីម ជុនអ៊ុន បានជំរុញឱ្យមានការពង្រឹងកម្លាំងយោធាបន្ថែមទៀតផងដែរ។ លោក គីម បញ្ជាឱ្យផ្អាករាល់ការសាកល្បងនុយក្លេអ៊ែរ និងមីស៊ីលអន្តរទ្វីបចាប់តាំងពីឆ្នាំ២០១៨ មក ដើម្បីសម្រួលដល់ការចរចាជាមួយអាម៉េរិក។ ប៉ុន្តែការកំហិតខ្លួនឯងនេះ ទំនងត្រូវបញ្ចប់នៅពេលខាងមុខ។
ទីភ្នាក់ងារព័ត៌មានរដ្ឋកូរ៉េខាងជើង KCNA រាយការណ៍ថា លោក គីម បានដឹកនាំកិច្ចប្រជុំការិយា ល័យនយោបាយនៃគណៈមជ្ឈិមបក្សពលករនៅថ្ងៃទី១៩ ខែមករា ដោយមេដឹកនាំកំពូលរូបនេះ និងមន្រ្តីជាន់ខ្ពស់ដែលចូលរួម សុទ្ធតែប្រកាសត្រៀមខ្លួនសម្រាប់ការប្រឈមមុខជាមួយអាម៉េរិក។ បើតាម KCNA គោលនយោបាយជាសត្រូវ និងការគំរាមកំហែងខាងយោធារបស់អាម៉េរិកបានឈានដល់បន្ទាត់គ្រោះថ្នាក់ដែលមិនអាចមើលរំលងបានតទៅទៀតនោះឡើយ។
ប្រព័ន្ធផ្សព្វផ្សាយរដ្ឋកូរ៉េខាងជើងបន្តថា កិច្ចប្រជុំការិយាល័យនយោបាយ ក៏ណែនាំឱ្យអង្គភាពពាក់ព័ន្ធ
ពិនិត្យមើលឡើងវិញពីបញ្ហាដែលពាក់ព័ន្ធ និងតម្រូវការក្នុងការចាប់ផ្តើមឡើងវិញសកម្មភាពទាំងអស់ ដែលត្រូវបានផ្អាកជាបណ្តោះអាសន្ននាពេលកន្លងមក។ សកម្មភាពទាំងនោះ ត្រូវជឿថា សំដៅលើកម្មវិធីអាវុធនុយក្លេអ៊ែរ និងមីស៊ីលផ្លោងអន្តរទ្វីបតែម្ដង។
ក្នុងការផ្សាយដដែល ការិយាល័យនយោបាយបក្សពលករកូរ៉េ បានឯកភាពជាឯកច្ឆ័ន្ទថា កូរ៉េខាងជើងគួរតែត្រៀមខ្លួនឱ្យបានហ្មត់ចត់បន្ថែមទៀតសម្រាប់ការប្រឈមមុខគ្នារយៈពេលវែងជាមួយចក្រពត្តិអាម៉េរិក ក៏ដូចជាបង្កើនកម្លាំងសាច់ដុំសម្រាប់ការពារសិទ្ធិ និងផលប្រយោជន៍របស់ប្រទេសជាតិ។ ទីក្រុងព្យុងយ៉ាង ក៏ឆ្លៀតរិះគន់អាម៉េរិកដែលបានដាក់ទណ្ឌកម្មជាង២០ ដោយឯកតោភាគីផងដែរ៕
Tag:
កូរ៉េខាងជើង
អាម៉េរិក
© រក្សាសិទ្ធិដោយ thmeythmey.com