សម្តេច ហ៊ុន សែន នាយករដ្ឋមន្ត្រីកម្ពុជា បានអញ្ជើញទទួលជំនួយវ៉ាក់សាំង ពីលោកស្រី Carmen MORENO ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជា នៅវិមានសន្តិភាព។  ប្រមុខរដ្ឋាភិបាលកម្ពុជាថ្លែងថា ជំនួយវ៉ាក់សាំងបង្ការជំងឺកូវីដ-១៩ ប្រភេទ AstraZeneca ចំនួន៣០ម៉ឺនដូសនេះ នឹងចូលរួមចំណែកយ៉ាងសំខាន់ ក្នុងការប្រយុទ្ធនឹងជំងឺកូវីដ-១៩ ។ ជាពិសេសក្នុងយុទ្ធនាការ ចាក់វ៉ាក់សាំងដូសជំរុញ ជូនដល់ប្រជាជនកម្ពុជា ក្នុងក្របខណ្ឌទូទាំងប្រទេស ។
 

អំឡុងពេលទទួលវ៉ាក់សាំងនេះដែរ សម្ដេចបានថ្លែងថា កម្ពុជាអាចគ្រប់គ្រងករណីឆ្លងជំងឺកូវីដ-១៩ ក្នុងប្រទេសបានល្អ។ ត្រង់ចំណុចនេះប្រមុខរដ្ឋាភិបាលកម្ពុជា សង្កត់ធ្ងន់ថា ការឆ្លងរាលដាលនៃជំងឺកូវីដ-១៩ត្រូវបានកាត់បន្ថយ ការសម្រាកព្យាបាលនៅមន្ទីរពេទ្យ និងអត្រាមរណភាព ស្ថិតនៅក្នុងកម្រិតទាប និងអាចរក្សាបាននូវដំណើរការសកម្មភាពសង្គម សេដ្ឋកិច្ចជាធម្មតា ។
 

យ៉ាងណាមិញ សម្ដេចក៏បានអំពាវនាវឱ្យប្រជាជនប្រុងប្រយ័ត្ន ពីជំងឺកូវីដ-១៩បំប្លែងថ្មី អូមីក្រុង (Omicron) ដែលកំពុងផ្លាស់ទីក្នុងប្រទេសកម្ពុជា។ សម្ដេច លើកទឹកចិត្ត ប្រជាជនឱ្យការពារដោយប្រុងប្រយ័ត្ន ជៀសជាងការភ័យស្លន់ស្លោ។
 

សូមជម្រាបថា គិតត្រឹមថ្ងៃទី២៩មករា ឆ្នាំ២០២២ ប្រជាជនក្នុងប្រទេសកម្ពុជាជាង ១៣លាន៧សែន នាក់បានទទួលវ៉ាក់សាំងជំងឺកូវីដ-១៩ ចំនួន ២ដូសរួចរាល់ និងមានប្រជាជនជាង ៥លាននាក់ទទួលបានដូសទី៣ ខណៈប្រជាជនជាង ៤៤ម៉ឺននាក់ទទួលបានវ៉ាក់សាំងដូសទី៤ ៕