នូវែលសេឡង់ជាប្រទេសមួយដែលមានការរឹតត្បិតវិធានការតឹងតែងបំផុតលើការទប់ស្កាត់ករណីឆ្លងក្នុងស្រុក។ យ៉ាងណាក្តី វិធានការរឹតត្បិតដោយការដាក់បញ្ជាឱ្យប្រជាជនទៅទទួលការចាក់វ៉ាក់សាំង បានបង្កឱ្យមានការតវ៉ាកើតឡើងរដ្ឋធានីវែលីងតោនអស់ពេលជិត៣សប្តាហ៍មកហើយ។
 

ការប៉ះទង្គិចនៅថ្ងៃទី២២ ខែកុម្ភៈ ធ្វើឱ្យប៉ូលិស៣នាក់រងរបួសដោយសកម្មភាពហិង្សាពីបាតុករ។ នាយករដ្ឋមន្រ្តីនូវែលសេឡង់ ចាស៊ីនដា អាឌើន បានរិះគន់ទង្វើរបស់ក្រុមបាតុករ និងចាត់ទុកជារឿងឱ្យអាម៉ាស់ណាស់។ បាតុករត្រូវសង្ស័យថា បានប្រើប្រាស់ទឹកអាស៊ីតវាយប្រហារប៉ូលិស ហើយរឿងរ៉ាវដែលគួរឱ្យភ្ញាក់ផ្អើលមួយទៀតនោះគឺគេឃើញបាតុករម្នាក់បានជិះឡានក្នុងល្បឿនយ៉ាងលឿនបើកសំដៅទៅកាន់ជួរប៉ូលិសមុនពេលឈប់ភ្លាមៗនៅចម្ងាយត្រឹមតែប៉ុន្មានសង់ទីម៉ែត្រប៉ុណ្ណោះ។
 

ការប៉ះទង្គិចរវាងប៉ូលិសនិងបាតុករនេះ បានកើតឡើងនៅក្បែរសភារបស់នូវែលសេឡង់ទីដែលបាតុករជួបជុំជាច្រើនថ្ងៃ  ខណៈប៉ូលិសរំកិលរនាំងបិទផ្លូវដែលប្រើដើម្បីរាំងខ្ទប់បាតុករដែលបោះតង់នៅក្រុងវែលីងតោន។ ចាប់តាំងពីការតវ៉ាផ្ទុះឡើង ក្រុមបាតុករបានកើនដល់ចំនួន១៥០០នាក់។នេះបើតាមការចេញផ្សាយដោយទីភ្នាក់ងារ AFP។
 

ស្នងការរងប៉ូលិសនូវែលសេឡង់លោក Richard Chambers បានអះអាងថា ប៉ូលិស៣នាក់ដែលត្រូវបានបញ្ជូនទៅមន្ទីរពេទ្យនោះ កំពុងធូស្រាលឡើងវិញហើយ។
 

កាលពីថ្ងៃ២១ ខែកុម្ភៈ ប៉ូលិស បានរាយការណ៍ដែរថា ក្រុមបាតុករបានគប់លាមកមនុស្សមកលើពួកគេទៀតផង។ មេដឹកនាំនូវែលសេឡង់លើកឡើងថា លោកស្រីមានក្តីបារម្ភខ្ពស់ពីការកើនឡើងអំពើហិង្សាពីក្រុមបាតុករ។
 

ក្បែរសភានៅក្នុងក្រុងវែលីងតោនក្រុមបាតុករ បានដំឡើងតង់និងជម្រក ព្រមទាំងបន្ទប់ទឹកចល័ត កន្លែងចែងចាយអាហារ និងកន្លែងថែទាំងកុមារជាដើម។ ប្រជាជនក្នុងទីក្រុងវែលីងតោន បានត្អូញត្អែរពីការរំលោភសិទ្ធិរបស់ពួកគេដោយក្រុមបាតុករជាមួយការមិនពាក់ម៉ាក់ ខណៈសាលារៀននិងអាជីវកម្មនៅក្បែរតង់របស់បាតុករត្រូវបានបិទ។
 

គិតត្រឹមថ្ងៃទី២២ខែកុម្ភៈ នូវែលសេឡង់ បានរាយការណ៍ករណីឆ្លងជំងឺកូវីដ-១៩សរុប៣៦១៦២នាក់និងស្លាប់៥៦នាក់៕