កីឡាអន្តរជាតិ
អន្តរជាតិ
អាម៉េរិក ព្រមានចិនជាថ្មី បើហ៊ានជួយរុស្សីគេចចេញពីទណ្ឌកម្មសេដ្ឋកិច្ច ទីប្រឹក្សាសន្តិសុខអាម៉េរិក Jake Sullivan ។ រូបថត AFP
× រដ្ឋបាលប្រធានាធិបតីអាម៉េរិក ចូ បៃដិន នៅថ្ងៃទី២៣ ខែមីនា បានព្រមានចិនជាថ្មីមិនឱ្យផ្តល់ជំនួយណាមួយ ដល់រុស្ស៊ីដែលកំពុងរងទណ្ឌកម្មឡើយ។ ទីប្រឹក្សាសន្តិសុខជាតិអាម៉រិក Jake Sullivan សង្កត់ធ្ងន់ថា ក្រុងប៉េកាំងមិនត្រូវទាញយកផលប្រយោជន៍សេដ្ឋកិច្ចណាមួយ ដែលកើតចេញពីការដាក់ទណ្ឌកម្មលើរុស្ស៊ី ហើយជួយក្រុងមូស្គូ គេចចេញពីផលវិបាកនៃការនាំចូលទំនិញ ឬប្រតិបត្តិការហិរញ្ញវត្ថុដែលត្រូវហាមឃាត់នោះឡើយ។
ពីលើយន្តហោះក្នុងដំណើរទៅកាន់បែលហ្ស៊ិក ទីប្រឹក្សាសន្តិសុខជាតិអាម៉េរិក Jake Sullivan បានថ្លែងប្រាប់អ្នកសារព័ត៌មានថា ក្រុមប្រទេសឧស្សាហកម្មទាំង៧ (G7) នឹងប្រកាសការឆ្លើយតបរួមមួយនាពេលឆាប់ៗនេះដើម្បីធ្វើឱ្យប្រាកដថា រុស្ស៊ីមិនអាចគេចវេសពីការដាក់ទណ្ឌកម្មពីក្រុមប្រទេសលោកខាងលិច ជុំវិញការឈ្លានពានលើអ៊ុយក្រែនដោយមានជំនួយពីចិន ឬប្រទេសផ្សេងទៀត។
«វាមិនផ្តោតទៅលើតែចិនទេ ប៉ុន្តែការព្រមាននេះ គឺសំដៅលើប្រទេសសេដ្ឋកិច្ចទាំងអស់ដែលមានចេតនា ឬបញ្ចេញសកម្មភាពចង់បំផ្លាញ ឬបន្ទន់ទណ្ឌកម្មដែលយើងដាក់ចេញ។» លោក Sullivan ថ្លែងបែបនេះ អំឡុងធ្វើដំណើរទៅកាន់ក្រុងព្រុចសែល ជាទីដែលប្រធានាធិបតី ចូ បៃដិន នឹងចូលរួមកិច្ចប្រជុំកំពូលបន្ទាន់របស់ NATO និង G7។
សូមបញ្ជាក់ថា ក្រោយជំនួបតាមទូរស័ព្ទរវាងលោក បៃដិន និងមេដឹកនាំចិនកាលពីសប្តាហ៍មុន ក្រុងប៉េកាំងក៏បានថ្កោលទោសលើការដាក់ទណ្ឌកម្មលើរុស្ស៊ី ដោយនិយាយត្រង់ៗថា ទណ្ឌកម្មយ៉ាងសន្ធឹកសន្ទាប់ដែលមិនបានវិនិច្ឆ័យច្បាស់លាស់ មានតែធ្វើឱ្យប្រជាជនស៊ីវិលរងទុក្ខ។ ចាប់តាំងពីរុស្ស៊ីបើកប្រតិបត្តិការយោធាលើអ៊ុយក្រែនមក អាម៉េរិកបានរឹតត្បិតការនាំចេញទំនិញជាច្រើនទៅកាន់រុស្ស៊ីដូចជាសម្ភារអេឡិចត្រូនិក កុំព្យូទ័រ និងគ្រឿងបន្លាស់យន្តហោះជាដើម។
ក្រុងវ៉ាស៊ីនតោន ក៏បារម្ភថា ចិនអាចនឹងជួយរុស្ស៊ី លើការនាំចូលទំនិញទាំងនោះ ដោយការរំលោភលើការរឹតបន្តឹងពាណិជ្ជកម្ម។
បន្ថែមពីលើកលោក Sullivan នៅថ្ងៃទី២៣ ខែមីនាដដែល រដ្ឋមន្រ្តីពាណិជ្ជកម្មអាម៉េរិក លោកស្រី Gina Raimondo ប្រាប់ទីភ្នាក់ងារ Reuters ថា អាម៉េរិក នឹងមិនស្ទាក់ស្ទើរលើការដាក់ទោស លើក្រុមហ៊ុនណាដែលរំលោភលើវិធានការហាមឃាត់ ការនាំចេញទំនិញដូចជាបន្ទះឈីបឡើយ។ លោកស្រីអះអាងថា ក្រុមហ៊ុនផលិតបន្ទះឈីបរបស់ចិនទាំងអស់ បានពឹងផ្អែកលើកម្មវិធីអាម៉េរិក ដែលធ្វើឱ្យការនាំចេញរបស់ទំនិញនេះ ស្ថិតក្រោមការគ្រប់គ្រងរបស់អាម៉េរិក។
ត្រង់នេះ រដ្ឋមន្រ្តីពាណិជ្ជកម្មអាម៉េរិកព្រមានដែរថា បើសិនក្រុមហ៊ុនចិនហ៊ានបញ្ជូនបន្ទះឈីប ដែលផលិតដោយបច្ចេកវិទ្យារបស់អាម៉េរិកទៅកាន់រុស្ស៊ី នោះអាម៉េរិក នឹងចាត់វិធានការភ្លាម៕
© រក្សាសិទ្ធិដោយ thmeythmey.com