ក្នុងរយៈពេល៣ថ្ងៃមកនេះនៅលើទឹកសាធារណរដ្ឋកូរ៉េ សម្តេច ហ៊ុន ម៉ាណែត បានជួបពិភាក្សាការងារដោយផ្ទាល់ជាមួយក្រុមហ៊ុនធំៗរបស់កូរ៉េ ដើម្បីទាកទាញការវិនិយោគបន្ថែម។​ ក្នុងនោះ សម្តេចបាន​ទទួលជួបជាបន្តបន្ទាប់ជាមួយអ្នកវិនិយោគកូរ៉េ ទៅដល់៩ក្រុមហ៊ុន។​ ក្នុងជំនួបនីមួយៗ សម្តេច​បានលើកឡើងពីឱកាស និងកាលានុភាពរបស់កម្ពុជារួមមានកម្លាំងពលកម្ម លំហទីផ្សារធំទូលាយ ស្ថិរភាពសេដ្ឋកិច្ច រួមទាំងការលើកទឹកចិត្តនានារបស់រដ្ឋាភិបាលទៅកាន់វិនិយោគកូរ៉េទាំងនោះ។ 

 

តាមរយៈជំនួបនេះ, ក្រុមហ៊ុនធំៗទាំងនោះ បានបង្ហាញបំណងពង្រីកការវិនិយោគ ស្វែងរកឱកាសសម្រាប់ការវិនិយោគថ្មីនៅកម្ពុជា។ ​ជាក់ស្តែង ក្រុមហ៊ុន Daewoo E&C មានបំណងវិនិយោគលើវិស័យហេដ្ឋារចនាសម្ព័ន្ធ និងថាមពលស្អាតនៅកម្ពុជា ដើម្បីរួមចំណែកក្នុងការអភិវឌ្ឍនូវសង្គម-សេដ្ឋកិច្ចកម្ពុជា ឱ្យកាន់តែរីកចម្រើនតាមរយៈការនាំយកជំនាញ និងបច្ចេកវិទ្យាទំនើបពីប្រទេសកូរ៉េ។

 

ជាមួយគ្នានេះ ក្រុមហ៊ុនHyosung Group Ltd. ចាប់អារម្មណ៍លើបង្កើតសម្ភារអេឡិចត្រូនិក ឧបករណ៍ទំនាក់ទំនងនិងការអភិវឌ្ឍប្រព័ន្ធ 5G និងឧស្សាហកម្មផលិតសំបកកង់រថយន្ត ខណៈក្រុមហ៊ុន Hanshin E&C មានបំណងពង្រីកទុនវិនិយោគលើវិស័យហិរញ្ញវត្ថុនៅកម្ពុជា​ ផងដែរ។ Hanshin E&C ​ជាក្រុមហ៊ុនដែលធ្វើអាជីវកម្មនៅកម្ពុជាក្នុងរយៈពេលជាង១០ឆ្នាំមកហើយ លើវិស័យសំណង់ និងវិស័យហិរញ្ញវត្ថុ។ 
  

លោក Choi Yong-Sun ប្រធានក្រុមហ៊ុន Hanshin E&C បានថ្លែងនៅចំពោះសម្តេច ហ៊ុន ម៉ាណែត យ៉ាងដូច្នេះ​៖ «  តាមរយៈប្រតិបត្តិការអាជីវកម្មក្នុងរយៈពេលប្រមាណ​ ១០ ឆ្នាំមកនេះ ក្រុមហ៊ុនបានសិក្សាស្វែងយល់ច្រើនអំពីការធ្វើអាជីវកម្មនៅកម្ពុជា ហើយក្រុមហ៊ុនកំពុងតែសិក្សាបន្ថែមទៀត ដើម្បីពង្រីកអាជីវកម្មរបស់ខ្លួនលើវិស័យហិរញ្ញវត្ថុ»។

 

សម្រាប់ក្រុមហ៊ុន Booyoung ក៏មានបំណងមិនខុសពីក្រុមហ៊ុនខាងលើប៉ុន្មានដែរ។  ការវិនិយោគរបស់ក្រុមហ៊ុននេះនៅកម្ពុជាក្នុងវិស័យសំណង់ វិស័យធនាគារ និងវិស័យសក្ដានុពលផ្សេងទៀតមកទល់ពេលនេះ​ គឺមិនមែនដើម្បីប្រាក់ចំណេញសុទ្ធសាធនោះទេ តែជាការរួមចំណែកជាមួយរាជរដ្ឋាភិបាលក្នុងការអភិវឌ្ឍសង្គម-សេដ្ឋកិច្ចកម្ពុជា។  សម្តេច ហ៊ុន ម៉ាណែត លើកទឹកចិត្តដល់ក្រុមហ៊ុនមួយនេះ ពង្រីកឱកាសវិនិយោគលើវិស័យសក្ដានុពលផ្សេងៗទៀតនៅកម្ពុជា ដើម្បីការចម្រើនបន្ថែមទៀតរបស់ក្រុមហ៊ុន ក៏ដូចជាជាប្រយោជន៍ដល់ប្រជាជនកម្ពុជា។​

 

ក្រៅពីនេះ បណ្តាក្រុមហ៊ុនកូរ៉េ ក៏មានបំណងពង្រីកប្រតិបត្តិការអាជីវកម្ម និងវិនិយោគនៅកម្ពុជា ផងដែរ។ បើតាមលោក MARN Ki-jeong ប្រធានវេទិកាសម្ព័ន្ធ​ឧស្សាហកម្ម​នៃប្រទេសកូរ៉េ (KIAF) មានក្រុមហ៊ុនកូរ៉េជា៤០ ជាសមាជិកនៃវេទិកា​សម្ព័ន្ធ​ឧស្សាហកម្មរបស់កូរ៉េកំពុងវិនិយោគលើវិស័យវាយនភណ្ឌនៅកម្ពុជា។ ជាមួយគ្នានេះ មានក្រុមហ៊ុនមួយចំនួនទៀត មានបំណងពង្រីកប្រតិបត្តិការអាជីវកម្ម ក៏ដូចជាការវិនិយោគលើវិស័យគ្រឿងសង្ហារឹម វិស្វកម្ម និងយានយន្តនៅកម្ពុជា។ 

 

គួរជម្រាបថា សម្តេច ហ៊ុន ម៉ាណែត ទៅដល់ប្រទេសកូរ៉េខាងត្បូង កាលពីថ្ងៃពុធ ដើម្បីបំពេញទស្សនកិច្ចផ្លូវការរយៈពេលបួនថ្ងៃ ចាប់ពីថ្ងៃទី១៥ ដល់ថ្ងៃទី១៨ ខែឧសភា។ នេះ​ជា​ដំណើរ​ទស្សនកិច្ច​ផ្លូវការ​លើក​ដំបូង​របស់​សម្តេច ហ៊ុន ម៉ាណែត នៅ​ប្រទេស​កូរ៉េ​ខាង​ត្បូង បន្ទាប់​ពី​បាន​ឡើង​កាន់​តំណែង​ជា​នាយក​រដ្ឋមន្ត្រី​កាល​ពី​ខែ​សីហា ឆ្នាំ​២០២៣។ ក្នុងដំណើរទស្សនកិច្ច កម្ពុជា-កូរ៉េខាងត្បូង​ បានសម្រេចឯកភាពគ្នាដំឡើង​ទំនាក់ទំនងទ្វេភាគីទៅកម្រិតភាពជាដៃគូយុទ្ធសាស្រ្ត៕