ក្នុងបទសម្ភាសជាមួយអ្នកសារព័ត៌មានឌីជីថលថ្មីៗ នៅមណ្ឌលប្រឡងសាកលវិទ្យាល័យភូមិន្ទភ្នំពេញ អ្នកស្រី យុត ស៊ីណូត លើកឡើងថា៖«ខ្ញុំជាគ្រូបង្រៀន ខ្ញុំយល់ថាអាជីពមួយនេះ វាសមរម្យអាចទទួលយកបាន។ ខ្ញុំចង់ឱ្យកូនខ្ញុំស្នងពីខ្ញុំ មុខរបរមួយនេះ វាមានតម្លៃថ្លៃថ្នូរ»។

 

 

បើតាមអ្នកស្រី ស៊ីណូត អាជីពជាគ្រូបង្រៀនមិនបានធ្វើឱ្យជីវភាពធូរធារទេ ប៉ុន្តែមានតម្លៃ។ «សប្បាយចិត្ត រកអ្វីប្រៀបមិនបានទេ ដែលកូនបានឆ្លងកាត់មកដំណាក់កាលទី២នេះ។ ហើយដំណាក់កាលទី២នេះ សម្រាប់នាងខ្ញុំ ទឹកចិត្តជាម្ដាយ សង្ឃឹមថាកូននាងខ្ញុំ នឹងជាប់»។ នេះជាក្ដីរំពឹងរបស់អ្នកស្រី យុត ស៊ីណូត ដែលមានក្ដីសង្ឃឹមលើកូនស្រី ដែលប្រឡងបាក់ឌុបបាននិទ្ទេស A នាពេលកន្លងទៅ។ 

 

កូនស្រីរបស់អ្នកស្រី យុត ស៊ីណូត ស្ថិតក្នុងចំណោមបេក្ខជនចំនួន ១៣៧៩នាក់ ដែលបានប្រឡងជាប់ការជ្រើសរើសគ្រូអនុវិទ្យាល័យដំណាក់កាលទី១។ នៅថ្ងៃនេះ កូនស្រីរបស់អ្នកស្រី និងបេក្ខជនជាង១ពាន់នាក់ទៀត កំពុងប្រកួតប្រជែងគ្នាលើវិញ្ញាសាសរសេរលើកទី២ ដើម្បីសម្រាំងយកបេក្ខជនត្រឹម ៤៤១នាក់ប៉ុណ្ណោះ។

 

សូមបញ្ជាក់ថា ក្រសួងមុខងារសាធារណៈ បានរៀបចំការប្រឡងប្រជែងជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យដំណាក់កាលទី២ ដែលមានបេក្ខជនចូលរួមចំនួន ១៣៧៩នាក់ ក្នុងនោះមានព្រះសង្ឃ ៩អង្គ និងជនមានពិការភាពចំនួន ៩នាក់ផងដែរ។