កីឡាអន្តរជាតិ
អន្តរជាតិ
លោក Guardiola ថាខ្លួនកៀកនឹងការចេាកចេញ ពី Man City
× លោក Pep Guardiola បានលើកឡើងពីការរំពឹងទុកនៃការចាកចេញពីតំណែងនៅក្លិប Manchester City បន្ទាប់ពីបានដឹកនាំក្រុមឈ្នះពានរង្វាន់លីគកំពូល Premier League និងលើកទី៤ ជាប់គ្នា មិនធ្លាប់មានក្រុមណាធ្វើបានពីមុនមក។
អ្នកចាត់ការសញ្ជាតិអេស្ប៉ាញ បាននិយាយដូច្នេះថា៖«រឿងដ៏ពិតប្រាកដពេលនេះ គឺខ្ញុំកំពុងខិតជិតនឹងការចាកចេញ ជាងបន្តដឹកនាំ។ យើងបានជជែកជាមួយនឹងក្លិប អារម្មណ៍របស់ខ្ញុំគឺថា ខ្ញុំចង់ស្នាក់នៅបន្តបន្ថែមទៀត ហើយខ្ញុំនឹងនៅបន្តរដូវកាលក្រោយ ដូច្នេះរដូវកាលក្រោយយើងនឹងលើកពីរឿងអនាគតឡើងវិញ។ ប៉ុន្តែ ៨ឆ្នាំ ឬ ៩ឆ្នាំបន្ថែមទៀត យើងនឹងរង់ចាំមើល។»។
ស្ថិតក្នុងសន្និសីទកាសែត បុរសសញ្ជាតិអេស្ប៉ាញ ហាក់បីមិនបង្ហាញពីភាពនឿយហត់របស់លោកក្នុងការកាន់កាប់តំណែងនៅក្លិប Man City រយៈពេល ៧ឆ្នាំ ហើយជួយក្រុមឈ្នះពានលីគចំនួន ៦ដង។ ប៉ុន្តែលោក Guardiola បានបង្វែរនិយាយធានាទៅកាន់អ្នកគាំទ្រវិញ ថាលោកនឹងដឹកនាំក្រុមដណ្តើមពានរង្វាន់ FA Cup ឱ្យខាងតែបាន នៅក្នុងជំនួបផ្តាច់ព្រ័ត្រទល់ Manchester United ដែលធ្វើឡើងនៅថ្ងៃទី២៥ ខែឧសភា។
ចំពោះសមិទ្ធផលពានរង្វាន់ដ៏ច្រើន ក្នុងរយៈពេល ៧ឆ្នាំ ជាមួយ Man City លោក Guardiola ត្រូវបានគេគិតថាលោកបានក្លាយជាអ្នកចាត់ការដ៏ល្អជាងគេបង្អស់ទាំងនៅអង់គ្លេស និងលើពិភពលោក ប៉ុន្តែបុរសសញ្ជាតិអេស្ប៉ាញ នៅតែបន្តកោតសរសើរដល់ សមិទ្ធផលរបស់លោក Sir Alex Ferguson នៅតែជាអ្នកចាត់ការដ៏ជោគជ័យបំផុតក្នុងពិភពបាល់ទាត់។
លោក Guardiola ក៏សរសើរដល់លោក Mikel Arteta អ្នកចាត់ការក្រុម Arsenal ចំពោះភាពប្រកួតប្រជែងក្នុងរដូវកាលនេះ រួមទាំងលោក Jurgen Klopp ផងដែរ។ ចំពោះការចាកចេញរបស់លោក Jurgen Klopp ពី Liverpool ធ្វើឱ្យ លោក Guardiola បានផ្តល់ការគោរពលើការសម្រេចចិត្ត និងកិត្តិយស ហើយថាបុរសសញ្ជាតិអាល្លឺម៉ង់ បានរួមចំណែកផ្តល់ការប្រកួតប្រជែងដ៏អស្ចារ្យមួយក្នុងអាជីពដឹកនាំក្នុងប្រទេសអង់គ្លេស។
«ខ្ញុំនឹងនឹកគាត់ខ្លាំងណាស់ ព្រោះថារូបគាត់គឺជាផ្នែកដ៏សំខាន់មួយក្នុងជីវិតរបស់ខ្ញុំ។ ខ្ញុំពិតជាចង់និយាយថាអរគុណខ្លាំងណាស់ចំពោះការងាររបស់គាត់។ គាត់បានជួយក្រុមជាមួយនឹងក្រុមរបស់គាត់ គាត់បានរួមចំណែកយ៉ាងខ្លាំងសម្រាប់ការប្រកួតប្រជែងក្នុងជីវិតរបស់ខ្ញុំ ជាមួយគាត់ រឿងឃ្លាតពីគ្នា ពិតជាពិបាកខ្លាំងណាស់។»។ នេះបើតាមការបន្ថែមរបស់លោក Guardiola ចំពោះការចាកចេញរបស់លោក Klopp។
Man City ឈ្នះជើងឯក ដោយឈរកំពូលតារាងមាន ៩១ពិន្ទុ ប្រជែងឈ្នះក្រុម Arsenal នៅចំណាត់ថ្នាក់លេខ ២ មាន ៨៩ពិន្ទុ ហើយប្រជែងគ្នារហូតដល់សប្តាហ៍ចុងក្រោយ ដើម្បីស្វែងរកជើងឯក។ Liverpool ឈរនៅចំណាត់ថ្នាក់លេខ ៣ មាន ៨២ពិន្ទុ៕
Tag:
Pep Guardiola
Manchester City
© រក្សាសិទ្ធិដោយ thmeythmey.com