ក្រៅពីថៃដែលបង្ហាញបំណងចូលរួមជាមួយក្រុមប្រទេស BRICS ម៉ាឡេស៊ីក៏មានចេតនាក្លាយជាសមាជិកមួយដែរ។ នាយករដ្ឋមន្រ្តីប្រទេសនេះ នៅថ្ងៃទី១៧ ខែមិថុនា ប្រកាសពីការដាក់ពាក្យចូលរួមរួចហើយ។

 

តាមរយៈបទសម្ភាសជាមួយសារព័ត៌មានចិន Guancha លោក អាន់វ៉ា អ៊ីប្រាហ៊ីម បាននិយាយថា ៖« យើង​បាន​ធ្វើ​គោល​នយោបាយ​របស់​យើង​ច្បាស់​លាស់ ហើយ​យើង​បាន​ធ្វើ​ការ​សម្រេច​ចិត្ត​។ យើង​នឹង​ចាប់​ផ្តើម​ដំណើរ​ការ​ផ្លូវ​ការ​ក្នុង​ពេល​ឆាប់​ៗ​នេះ។ យើងកំពុងរង់ចាំលទ្ធផលចុងក្រោយ និងមតិកែលម្អពីរដ្ឋាភិបាលអាហ្វ្រិកខាងត្បូង»។  

 

នាយក​រដ្ឋមន្ត្រី​ម៉ាឡេស៊ី​បាន​បញ្ជាក់​ថា រដ្ឋាភិបាលទីក្រុង​គូឡាឡាំពួ​មាន​អារម្មណ៍​ «ធូរ​ស្រាល» ដែល​ឃើញ​ពិភពលោកលែងមានតំបន់​ប៉ូលតែមួយ​ទៀត​ហើយ។ ផ្ទុយទៅវិញ ការកើនឡើងឥទ្ធិពលនៃក្រុម BRICS និងជាពិសេសចិនបានផ្តល់ក្តីសង្ឃឹមតិចៗ ថានៅតែមានការត្រួតពិនិត្យ និងរក្សាតុល្យភាពនៅក្នុងពិភពលោក។

 

លោក អាន់វ៉ា សង្កត់ធ្ងន់ថា លោកខាងលិចចង់គ្រប់គ្រងការសន្ទនានៅក្នុងពិភពលោក។ ទោះ​ជា​យ៉ាង​ណា ម៉ាឡេស៊ី​មិន​អាច​បន្ត​ទទួល​យក​បាន​ទេ ព្រោះ​លោក​ខាង​លិច​លែង​ជា​មហាអំណាច​អាណានិគម​ទៀត​ហើយ។ ប្រទេសឯករាជ្យគួរតែមានសេរីភាពក្នុងការបញ្ចេញមតិ។

 

ការសម្រេចចិត្តរបស់ម៉ាឡេស៊ីត្រូវបានប្រកាសតែប៉ុន្មានថ្ងៃប៉ុណ្ណោះ បន្ទាប់ពីរដ្ឋមន្ត្រីការបរទេសថៃ លោក Maris Sangiampongsa បានផ្ញើរលិខិតទៅសមភាគីរុស្ស៊ីរបស់លោក Sergey Lavrov នូវពាក្យសុំចូលជាសមាជិក BRICS កាលពីថ្ងៃទី១១ ខែមិថុនា។

 

ការណ៍នេះ អាចធ្វើឱ្យថៃក្លាយជាប្រទេសអាស៊ីអាគ្នេយ៍ដំបូងគេដែលដាក់ពាក្យជាផ្លូវការដើម្បីចូលរួមក្នុងប្លុក BRICS ហើយទំនងជានឹងក្លាយជាសមាជិកអាស៊ានដំបូងគេនៃក្រុមនេះដែរ។

 

 

ក្រុម BRICS ត្រូវ​បាន​បង្កើត​ឡើង​ក្នុង​ឆ្នាំ ២០០៩ ដោយ​យក​ឈ្មោះ​ចេញ​ពី​អក្សរ​ដំបូង​របស់​ប្រទេស​ជា​សមាជិក​ទាំង ៥ គឺ​ប្រេស៊ីល រុស្ស៊ី ឥណ្ឌា ចិន និង​អាហ្វ្រិក​ខាង​ត្បូង។

 

ចាប់ពីថ្ងៃទី១ ខែមករា ឆ្នាំ២០២៤ អេហ្ស៊ីប អេត្យូពី អ៊ីរ៉ង់ អារ៉ាប៊ីសាអូឌីត និងអាមីរ៉ាតអារ៉ាប់រួម បានចូលរួមជាផ្លូវការក្នុងប្លុកនេះ។ ការពង្រីកក្រុម BRICS នឹងធ្វើឲ្យប្លុកនេះមាន ៣៧ភាគរយនៃផលិតផលក្នុងស្រុកសរុបរបស់ពិភពលោកបើផ្អែកលើភាពស្មើគ្នានៃអំណាចទិញ (PPP) និង៤៦ភាគរយនៃចំនួនប្រជាជនពិភពលោក៕