ជាតិ
សម្ដេច ហ៊ុន ម៉ាណែត ប្រាប់ឱ្យសមាគមសិល្បករខ្មែរ បន្តជួយសិល្បករជួបការលំបាក និងមានវ័យចាស់ សម្ដេច ហ៊ុន ម៉ាណែត ជួបជាមួយសិល្បករវ័យចំណាស់ ក្នុងកម្មវិធី អ្នកស្នងមរតក កាលពីថ្ងៃទី៣១ ឧសភា។ រូបភាព STPM
× ភ្នំពេញ៖ ក្នុងជំនួបរវាងនាយករដ្ឋមន្រ្តីកម្ពុជា និងប្រធានសមាគមសិល្បករខ្មែរ សម្ដេច ហ៊ុន ម៉ាណែត បានលើកទឹកចិត្តឱ្យសមាគម បន្តជួយដល់សិល្បករជួបការលំបាក និងមានវ័យចាស់ ដែលបាត់បង់សមត្ថភាពសម្តែង។ លើសពីនេះ សមាគម ត្រូវបន្តខិតខំប្រមូលចងក្រងសិល្បករ សិល្បការិនីគ្រប់ទម្រង់ចូលជាសមាជិក ដើម្បីប្រសិទ្ធភាពនៃការធ្វើការរួមគ្នា និងចេះជួយគ្នាទៅវិញទៅមក។
នាព្រឹកថ្ងៃទី២ កក្កដានេះ សម្ដេច ហ៊ុន ម៉ាណែត បានអនុញ្ញាតឱ្យលោកស្រី ម៉ៅ ចំណាន ប្រធានសមាគមសិល្បករខ្មែរ ជួបសម្ដែងការគួរសម។ ក្នុងជំនួបនេះ សម្ដេច ហ៊ុន ម៉ាណែត បានលើកទឹកចិត្តដល់សមាគមឱ្យមានការសហការ ជាមួយស្ថាប័នអង្គភាពពាក់ព័ន្ធ និងអង្គការសង្គមស៊ីវិល ដើម្បីរួមចំណែកក្នុងការកសាងសមាគមឱ្យកាន់តែរីកចម្រើន។
សម្ដេច ហ៊ុន ម៉ាណែត មានប្រសាសន៍ថា ទោះបីមិនមែនជាសមាជិករបស់សមាគម តែការផ្តល់ឱកាសចូលរួមដល់សិល្បករ សិល្បការិនីគ្រប់ទម្រង់សិល្បៈផ្សេងៗ គឺដើម្បីចូលរួមចំណែកក្នុងការអភិវឌ្ឍវិស័យសិល្បៈនៅកម្ពុជា។ ទន្ទឹមនឹងនេះ សម្ដេចនាយករដ្ឋមន្រ្តី ក៏បានជំរុញឱ្យសមាគមបន្តខិតខំប្រមូលចងក្រងសិល្បករ សិល្បការិនីគ្រប់ទម្រង់ចូលជាសមាជិកសមាគមសិល្បៈ ជាពិសេសជួយដល់សិល្បករដែលជួបការលំបាក និងមានវ័យចាស់។
ជំនួបរវាងសម្ដេច ហ៊ុន ម៉ាណែត និងតំណាងសមាគមសិល្បករខ្មែរ។ រូបភាព STPM
នាជំនួបខាងលើ សម្ដេច ហ៊ុន ម៉ាណែត បានផ្តល់នូវអនុសាសន៍ណែនាំដល់សមាគម ឱ្យចូលរួមសហការជាមួយក្រសួងវប្បធម៌ និងវិចិត្រសិល្បៈ ក្នុងការសិក្សាស្រាវជ្រាវចងក្រងឯកសារគោល និងកំណត់អត្តសញ្ញាណនៃស្នាដៃសិល្បៈឱ្យបានច្បាស់លាស់។ ជាមួយគ្នានេះ សមាគម ត្រូវចូលរួមផ្សព្វផ្សាយនូវស្នាដៃសិល្បៈឱ្យកាន់តែទូលំទូលាយ តាមរយៈការរៀបចំបង្កើតព្រឹត្តិការណ៍ ឬសកម្មភាពផ្សេងៗ ដើម្បីឱ្យសាធារណជនបានយល់ដឹងអំពីវប្បធម៌សិល្បៈ។
ក្រៅពីការសហការជាមួយក្រសួងវប្បធម៌ សម្ដេច ហ៊ុន ម៉ាណែត ជំរុញដល់សមាគម បន្តចូលរួមអនុវត្តប្រកបដោយភាពបត់បែននូវស្នាដៃសិល្បៈវប្បធម៌ ដោយឈរលើមូលដ្ឋានជាក់លាក់ និងច្បាស់លាស់។ ចំណុចសំខាន់មួយទៀត នៃអនុសាសន៍របស់នាយករដ្ឋមន្រ្តី គឺចង់ឱ្យសមាគមជំរុញការអនុវត្តក្រមសីលធម៌នៃអ្នកសិល្បៈឱ្យកាន់តែមានប្រសិទ្ធភាព។
សូមបញ្ជាក់ថា នាកម្មវិធី«អ្នកស្នងមរតក» ដែលរៀបចំកាលពីថ្ងៃទី៣១ ឧសភាកន្លងទៅ សម្ដេច ហ៊ុន ម៉ាណែត បានប្រកាសឧបត្ថម្ភថវិកាប្រចាំឆ្នាំចំនួន ១០ម៉ឺនដុល្លារដល់សមាគមសិល្បករខ្មែរ។ ក្នុងពិធីនោះ នាយករដ្ឋមន្រ្តីកម្ពុជា ក៏បានប្រកាសបង្កើតមូលនិធិ ដើម្បីអភិរក្សសិល្បៈដែលរងហានិភ័យខ្ពស់ និងប្រឈមនឹងការបាត់បង់ផងដែរ៕
Tag:
សមាគមសិល្បករ
វប្បធម៌
ហ៊ុន ម៉ាណែត
មនុស្សចាស់
© រក្សាសិទ្ធិដោយ thmeythmey.com