សង្គមអន្តរជាតិ
អន្តរជាតិ
អ្នកបម្រើម្នាក់ក្នុងភោជនីយដ្ឋានមួយនៅអាមេរិក ទទួលបានធីបរថយន្តមួយគ្រឿង ![](https://image.thmeythmey.com/pictures/2014/12/11/11122014172349car.jpg)
×![]()
ស្ត្រីជាអ្នកបម្រើម្នាក់នៅក្នុងភោជនីយដ្ឋាន Cracker Barrel ក្នុងទីក្រុង Bransonរដ្ឋ Missouri សហរដ្ឋអាមេរិក បានទទួលធីបជារថយន្តម៉ាកFord Fusion ២០០៨ ពណ៌ទឹកប្រាក់មួយគ្រឿងពីភ្ញៀវពីរនាក់ប្ដីប្រពន្ធមួយគូ ដែលបានចូលទៅញ៉ាំអាហារក្នុងហាងខាងលើនោះ។
យោងតាមការផ្សាយរបស់ abc news លោក Gary Tackettនិងលោកស្រីRoxann Tackett បានចូលទៅពិសារអាហារនៅក្នុងភោជនីយដ្ឋានខាងលើនោះ ។ នៅពេលដែលលោក Gary និងប្រពន្ធ បើករថយន្តមកដល់ខាងមុខហាង គាត់ក៏បានឃើញរថយន្តមួយដែលចតនៅខាងមុខហាងនោះដែរ ប៉ុន្តែជារថយន្តដែលចាស់ទ្រុឌទ្រោម និងខូចខាតស្ទើខ្ទេសខ្ទី និងមានយកស្កុតពណ៌សបិទជំនួសកញ្ចក់ទៀតផង។
បន្ទាប់ពីបានឃើញរថយន្តនេះ លោក Gary បានសាកសួរអ្នកបម្រើថា តើរថយន្តHyundai Accentចាស់ទ្រុឌទ្រោមមួយគ្រឿងនេះ ជារបស់អ្នកណា? អ្នកបម្រើក៏បានប្រាប់ថា នេះគឺឡានរបស់អ្នកបម្រើស្រីម្នាក់ក្នុងហាងនេះ ឈ្មោះ Cindi Grady អាយុ ៥១ ឆ្នាំ ។ អ្នកបម្រើក៏បានប្រាប់ទៀតថា អ្នកស្រីGrady គឺជាអ្នកតស៊ូខិតខំធ្វើការខ្លាំងណាស់ ដើម្បីផ្គត់ផ្គង់ជីវភាពរស់នៅរបស់ខ្លួនផង និងកូនប្រុសពិការរបស់នាងផងដែរ។
ប្ដីប្រពន្ធសប្បុរសទាំងពីរនាក់នេះ គឺជាម្ចាស់ហាងផ្គត់ផ្គង់ hardware មួយកន្លែង ដែលពួកគាត់បានប្រាប់កាសែតខាងលើថា វាស្ទើរតែគ្មាននរណាម្នាក់ហ៊ានជិះរថយន្តដ៏ចាស់ទ្រុឌទ្រោម ដូចអ្នកស្រី Grady នេះទេ គឺប្រហែលជាគេយកវាទៅបោះបង់ចោលហើយ។
នៅពេលទទួលបានធីបរថយន្តនេះ អ្នកស្រី Grady បានសម្ដែងអារម្មណ៍រំភើបជាខ្លាំង ហើយបាននិយាយថា៖« ខ្ញុំត្រូវបានគេធ្វើភ្ញាក់ផ្អើលជាខ្លាំង។ខ្ញុំមិនរំពឹងថានឹងទទួលបានធីបជារថយន្តយ៉ាងដូច្នេះទេ។ខ្ញុំមិនដែលស្រមៃចង់ឲ្យនរណាម្នាក់ផ្តល់រថយន្តមួយគ្រឿងដ៏ស្រស់ស្អាតមកឲ្យខ្ញុំនោះទេ»៕
ទស្សនាវីដេអូ
© រក្សាសិទ្ធិដោយ thmeythmey.com