កីឡាជាតិ
ជាតិ
Number One Cup៖ បឹងកេត និង ប៉ូលិស ប៉ះក្រុមវៀតណាម នៅរសៀលនេះ ក្រុមចម្ការកៅស៊ូបឹងកេត នាពេលហ្វឹកហាត់
× ក្រុមបាល់ទាត់របស់កម្ពុជា ២ ក្រុមគឺ ចម្ការកៅស៊ូបេងកេត និង ក្រុមអគ្គស្នងការដ្ឋាននគរបាលជាតិ នៅក្នុងពូល B ត្រូវប្រកួតជាមួយដៃគូរបស់ម្ចាស់ផ្ទះវៀតណាម ដូចគ្នា នៅរសៀលថ្ងៃទី ២៣ ខែ ធ្នូ ឆ្នាំ ២០១៤នេះលើកីឡដ្ឋានខេត្តប៊ីញភឿក ក្នុងពានរង្វាន់ Number One Cup 2014។
ប្រកួតបើកឆាកក្រុមអគ្គស្នងការដ្ឋាននគរបាលជាតិ ត្រូវប៉ះក្រុមកងកម្លាំងប្រដាប់អាវុធយោធភូមិភាគលេខ៧ នៅវេលាម៉ោង ១ : ៣០ នាទីរសៀល នៅរសៀលនេះ ខណៈក្រុមក្រុមបឹងកេតត្រូវប៉ះក្រុមវៀតណាមមួយទៀតគឺ បញ្ជាការយោធាខេត្តប៊ីងយឿន នៅវេលាម៉ោង ៣:៣០ នាទីរសៀល។
ពិធីបើកក្នុងពានរង្វាន់ Number One Cup បានរៀបចំជាផ្លូវការនៅរសៀលថ្ងៃទី ២២ ធ្នូ ម្សិលមិញ ស្របពេលក្រុមខេត្តស្វាយរៀង របស់កម្ពុជាបានប្រកួតបើកឆាកឈ្នះ ក្រុម Champasakរបស់ឡាវ ក្នុងលទ្ធផល ៤ ទល់ ០នៅវគ្គជម្រុះពូល A។
សូមបញ្ជាក់ថាពូល A មានក្រុមម្ចាស់ផ្ទះ បញ្ជាការយោធាខេត្តប៊ីងភឿក, ក្រុមកងពលធំ លេខ៤របស់វៀតណាម, ក្រុម Champasakរបស់ឡាវ និង ក្រុមខេត្តស្វាយរៀងរបស់កម្ពុជា។ ចំណែកពូល B មានក្រុម ចម្ការកៅស៊ូបឹងកេត និងអគ្គស្នងការដ្ឋាននគរបាលជាតិ របស់កម្ពុជា, ក្រុមយោធភូមិភាគលេខ៧ក្រុមបញ្ជាការដ្ឋានខេត្តប៊ីញយឿត។
ពានរង្វាន់នេះនឹងប្រកួតវគ្គផ្ដាច់ព្រ័ត្រនៅថ្ងៃទី ៣១ ខែ ធ្នូ ចុងឆ្នាំ ហើយកម្មវិធីប្រកួតវគ្គជម្រុះតាមពូលនឹងបញ្ចប់នៅថ្ងៃទី ២៧ ធ្នូ។ ក្រុមខ្លាំងចំនួន ២ តាមពូលនីមួយៗ មានសិទ្ធឡើងទៅលេងនៅវគ្គពាក់កណ្ដាលផ្ដាច់ព្រ័ត្រ ហើយក្រុមឈ្នះ ឡើងទៅជួបគ្នានៅវគ្គផ្ដាច់ព្រ័ត្រ ចំណែកក្រុមចាញ់ប៉ះគ្នាដណ្ដើមចំណាត់ថ្នាក់លេខ ៣ ៕
© រក្សាសិទ្ធិដោយ thmeythmey.com