ជាតិ
សង្គមជាតិ
ស្ថាប័នលក់សំបុត្រចូលអង្គរដែលគ្រប់គ្រងដោយរដ្ឋសម្ពោធជាផ្លូវការ ![](https://image.thmeythmey.com/pictures/2016/03/01/132016180917ticket_angkor_wat.jpg)
×![]()
សៀមរាប៖ គ្រឹះស្ថានអង្គរ ដែលជាស្ថាប័នលក់សំបុត្រចូលទស្សនាអង្គរ គ្រប់គ្រងដោយរដ្ឋាភិបាល បានដាក់សម្ពោធជាផ្លូវការហើយនៅរសៀលថ្ងៃទី១ មិនានេះ។ គ្រឹះស្ថានអង្គរ មានស្នាក់ការនៅរង្វង់មូលផ្លូវ៦០ម៉ែត្រ ជាប់នឹងសារមន្ទីរសព្វទស្សអង្គរ ខាងត្បូងសាលាខេត្តសៀមរាប។
យោងតាមអនុក្រឹត្យរបស់រដ្ឋាភិបាលចុះថ្ងៃទី៩ កុម្ភៈ ឆ្នាំ២០១៦ លោក លី សែ ត្រូវបានតែងតាំងជានាយកប្រតិបត្តិនៃគ្រឹះស្ថានអង្គរ។ ចំណែកសមាសភាពក្រុមប្រឹក្សាភិបាលមាន ៦រូប ក្នុងនោះរួមមាន លោក ឈន សុភាព តំណាងពីក្រសួងសេដ្ឋកិច្ច និងហិរញ្ញវត្ថុ ជាប្រធាន លោក សុង តុងហាប់ តំណាងពីក្រសួងទេសចរណ៍ ជាអនុប្រធាន និងមានសមាជិក៤រូប មានលោក បួន លឹមហេង តំណាងទីស្តីការគណៈរដ្ឋមន្ត្រី លោក អ៊ុន ទឹម តំណាងក្រសួងវប្បធម៌ និងវិចិត្រសិល្បៈ លោក សុខ សង្វា តំណាងអាជ្ញាធរជាតិអប្សរា និងលោក លី សំរឹទ្ធ តំណាងពីសាលាខេត្តសៀមរាប។
បើតាមការបញ្ជាក់របស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលចូលរួមប្រកាសសមាសភាពក្រុមប្រឹក្សាភិបាលគ្រឹះស្ថានអង្គរនៅរសៀលថ្ងៃនេះ ក្រៅពីសមាសភាពខាងលើ ក្រសួងសេដ្ឋកិច្ចបានតែងតែលោក ណម ពិសិដ្ឋ ជាមន្ត្រីត្រួតពិនិត្យហិរញ្ញវត្ថុនៅគ្រឹះស្ថានអង្គរនេះផងដែរ។
សូមបញ្ជាក់ថា ការរៀបចំ និងការផ្ទេរសិទ្ធិគ្រប់គ្រងការលក់សំបុត្រចូលរមណីយដ្ឋានអង្គរ បានប្រើពេលជាង ៣ខែ រាប់ចាប់ពីលោកនាយករដ្ឋមន្ត្រី បានសម្រេចយកសិទ្ធិគ្រប់គ្រងនេះពីក្រុមហ៊ុនសុខាអូតែលរួចមក។ តាមការបញ្ជាក់របស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ចាប់ពីដើមឆ្នាំ២០១៦មក មានមន្ត្រីពីក្រសួងសេដ្ឋកិច្ច២រូប និងទេសចរណ៍២រូប ដែលបានដាក់អមឲ្យធ្វើការនឹងក្រុមហ៊ុនសុខាអូតែល ចំពោះដំណើរការការលក់សំបុត្រនេះ។ ការលក់សំបុត្រចូលទស្សនាអង្គរនាពេលកន្លងមក បានក្លាយជាប្រធានបទក្តៅសម្រាប់អ្នកនយោបាយ ចំពោះការឲ្យក្រុមហ៊ុនឯកជនជាអ្នកមានសិទ្ធិគ្រប់គ្រងនៅតំបន់មួយនេះ៕
© រក្សាសិទ្ធិដោយ thmeythmey.com