ជាតិ
អត្ថបទពាណិជ្ជកម្ម
×![]()
ដោយ: ជី ដាណា
កាលពីចុងសប្ដាហ៍កន្លងមកនេះ គណៈគ្រប់គ្រងសាលារៀន អន្តរទ្វីប អាមេរិកាំង បានបើកកម្មវិធីប្រកួតប្រជែងវគ្គផ្ដាច់ព្រ័ត្រនៃការប្រកួតចំណេះដឹងភូមិសាស្ត្រជាតិ ម៉េងលី ជេ. គួច លើកទី៥ នៅសាលសន្និសីទ ផល គួច នៃសាលារៀន អន្តរទ្វីប អាមេរិកាំង សាខាទួលគោក។
ជុំវិញការប្រកួតនេះ នាយកចាងហ្វាង និងចាងហ្វាងមធ្យមសិក្សាទុតិយភូមិ លោក ឡុង ពិសី បានថ្លែងនាឱកាសនោះថា ការបង្កើតកម្មវិធីនេះឡើង គឺដើម្បីឱ្យសិស្សានុសិស្សមានឱកាសបញ្ចេញសមត្ថភាព ភាពរហ័សរហួន មានការប្រុងប្រយ័ត្នខ្ពស់ និងភាពឈ្លាសវៃ។ មួយទៀតសោត គឺក៏ដើម្បីបង្កើនភាពក្លាហាន តស៊ូ ហ៊ាន ព្រមទាំងប្រឹងប្រែង ស្វាធ្យាយរៀនសូត្របន្ថែមទៀតដែរ និងកាន់តែពូកែជាងមុនលើមុខវិជ្ជាភូមិវិទ្យា និងផែនដីវិទ្យា ព្រមទាំងបង្កើនចំណេះដឹងលើភូមិសាស្ត្រជាតិកាន់តែទូលំទូលាយ។ មិនតែប៉ុណ្ណោះសិស្សនឹងទទួលបានចំណេះដឹងតាមរយៈសំណួររាប់ពាន់ក្នុងរយៈពេលដ៏ខ្លី នាឱកាសប្រកួតប្រជែងចំណេះដឹងភូមិសាស្ត្រជាតិនេះ ពោលក្នុងរយៈពេលតែមួយខែប៉ុណ្ណោះសិស្សានុសិស្សបានសិក្សាឈ្វេងយល់ និងចងចាំមេរៀនភូមិវិទ្យា និងផែនដីវិទ្យា រហូតដល់ជាង១.០០០ សំណួរបានយ៉ាងច្បាស់លាស់។
នាយកចាងហ្វាងរូបនោះ បានអះអាងមកកាន់អ្នកសារព័ត៌មានយើងបន្ថែមថា សាលាតែងបំផុស និងបង្កើតឱ្យមានកម្មវិធីប្រកួតចំណេះដឹងយ៉ាងសន្ធឹកសន្ធាប់ពីមួយឆ្នាំទៅមួយឆ្នាំ គឺក្នុងសុច្ឆន្ទៈហ្វឹកហ្វឺនសិស្សរបស់ខ្លួនឱ្យមានសមត្ថភាពខ្ពស់អាចឈរជើងប្រកួតប្រជែងទាំងនៅលើឆាកជាតិ និងអន្តរជាតិបាន។ “ការប្រកួតចំណេះដឹងនានា គឺតែងមានជាប់និងធ្លាក់ ប៉ុន្តែទោះបីធ្លាក់ក៏បានបង្ហាញនូវគន្លឹះ និងបទពិសោធល្អៗ ដើម្បីឈោងចាប់យកជ័យជម្នះនៅឱកាសក្រោយៗទៀតដែរ។ ដូច្នេះអ្នកដែលទទួលលទ្ធផលពុំគាប់ប្រសើរ សូមកុំអស់សង្ឃឹម និងបាក់ទឹកចិត្តឡើយ ផ្ទុយទៅវិញត្រូវព្យាយាមអភិវឌ្ឍសមត្ថភាព និងចំណេះដឹងបន្ថែមទៀត ព្រោះជោគជ័យពុំមែនកើតឡើងដោយភ័ព្វព្រេងវាសនាឡើយ ផ្ទុយទៅវិញគឺបានមកពីការទទូចខំប្រឹងប្រែងរបស់យើងប៉ុណ្ណោះ។ មានន័យថា សំណាងរមែងកើតឡើងចំពោះអ្នកដែលទុកចិត្តលើខ្លួនឯង មានសេចក្ដីព្យាយាមល្អ និងបន្តប្រឹងប្រែងរៀនសូត្រ”។ នេះជាដំបូន្មានបន្ថែមរបស់នាយកចាងហ្វាងរូបនោះផ្ដល់ដល់បេក្ខជន និងសិស្សានុសិស្សដែលចូលរួមនាឱកាសនោះ។
គួររម្លឹកជូនថា បន្ទាប់ពីបានហែលឆ្លងការប្រកួតចំណេះដឹងភូមិសាស្ត្រជាតិ ម៉េងលី ជេ. គួច លើកទី៥ ក្នុងវគ្គជម្រុះជុំទី១ យ៉ាងលំបាកលំបិនផុតទៅ គណៈកម្មការបានរកឃើញបេក្ខជនដែលពូកែផ្នែកចំណេះដឹងនេះចំនួន៥៦រូប ក្នុងចំណោម២១៧នាក់ ដែលមកពីតាមបណ្ដាសាខានៃសាលារៀន អន្តរទ្វីប អាមេរិកាំង។ បេក្ខជនជើងខ្លាំង និងមានសមត្ថភាពខ្ពស់ជាប់វគ្គជម្រុះជុំទី១នោះ បានឈានជើងបន្តយ៉ាងស្វិតស្វាញនៅវគ្គជម្រុះជុំទី២ ប៉ុន្តែក្នុងចំណោម៥៦រូបនោះ មានបេក្ខជនចំនួន២៣រូប ត្រូវអស់សិទ្ធិឡើងទៅវគ្គផ្ដាច់ព្រ័ត្រ។
សូមជម្រាបជូនថា បេក្ខជនដែលមានសិទ្ធិចូលរួមប្រកួតនៅវគ្គផ្ដាច់ព្រ័ត្រនេះ គឺមានចំនួនត្រឹមតែ៣៤រូបតែប៉ុណ្ណោះ។ ជើងខ្លាំងទាំង៣៤រូបនោះបានប្រកួតគ្នាយ៉ាងកក្រើក និងស្វិតស្វាញជាទីបំផុតអស់រយៈពេលប្រហែលជាង៤ម៉ោង ហើយជាលទ្ធផល គណៈកម្មការបានវែកមុខជើងខ្លាំងពិតប្រាកដត្រឹមតែ៣រូបប៉ុណ្ណោះដែលទទួលបានជ័យលាភី។ ក្នុងចំណោមបេក្ខជនទាំង៣រូបនោះ គឺជ័យលាភីលេខ១ បានទៅលើយុវសិស្ស យ៉ាង ស៊ុនម៉េង រីឯលេខ២ បានទៅលើយុវតី ម៉ាក់ ហេងគង្គារ និងលេខ៣ បានទៅលើបេក្ខជន ងី វីរៈសូឡា។
ថ្លែងនាឱកាសលើកពានជាបេក្ខជនជ័យលាភីលេខ១ យុវសិស្ស យ៉ាង ស៊ុនម៉េង បានប្រាប់អ្នកសារព័ត៌មានយើងថា ការប្រកួតចំណេះដឹងផ្នែកភូមិសាស្ត្រជាតិនេះ គឺមានសារៈសំខាន់ចំពោះរូបគេ ក៏ដូចជាសិស្សានុសិស្ស និងយុវជនឯទៀតដែរ ព្រោះបានបណ្ដុះនូវវប្បធម៌នៃការអាន ការខិតខំប្រឹងប្រែងរៀនសូត្រ និងការសិក្សាស្រាវជ្រាវបន្ថែម ពោលបណ្ដុះទម្លាប់ល្អជាវិជ្ជមានក្នុងការក្រេបរសវិជ្ជា។ ម្ចាស់ជ័យលាភីរូបនោះអះអាងបន្ថែមថា លទ្ធផលល្អបែបនេះ គឺពុំមែនកើតដោយចៃដន្យឡើយ។ មិនចៃដន្យ ក៏ព្រោះនេះជាសមិទ្ធផលស្ដែងចេញពីការប្រឹងប្រែងរៀនសូត្រ និងតស៊ូជម្នះរាល់ភាពខ្ជិលច្រអូសរបស់ខ្លួនយ៉ាងពិតប្រាកដ។
មិនគួរនឹងភ្លេចបញ្ជាក់ជូនទេថា ចំពោះជ័យលាភីលេខ១ គឺទទួលបានអាហារូបករណ៍សិក្សាឥតបង់ថ្លៃ១០០% នៅសាលារៀន អន្ដរទ្វីប អាមេរិកាំង អមដោយមេដាយមាស បណ្ណសរសើរ និងវត្ថុអនុស្សាវរីយ៍។ ដោយឡែកជ័យលាភីលេខ២ ទទួលបានអាហារូបករណ៍សិក្សា៧៥% អមដោយមេដាយប្រាក់ បណ្ណសរសើរ និងវត្ថុអនុស្សាវរីយ៍។ ចំណែកលេខ៣ ទទួលបានអាហារូបករណ៍សិក្សា៥០% អមដោយមេដាយសំរឹទ្ធិ បណ្ណសរសើរ និងវត្ថុអនុស្សារីយ៍ដូចគ្នា៕
(អត្ថបទសាលា)
ជុំវិញការប្រកួតនេះ នាយកចាងហ្វាង និងចាងហ្វាងមធ្យមសិក្សាទុតិយភូមិ លោក ឡុង ពិសី បានថ្លែងនាឱកាសនោះថា ការបង្កើតកម្មវិធីនេះឡើង គឺដើម្បីឱ្យសិស្សានុសិស្សមានឱកាសបញ្ចេញសមត្ថភាព ភាពរហ័សរហួន មានការប្រុងប្រយ័ត្នខ្ពស់ និងភាពឈ្លាសវៃ។ មួយទៀតសោត គឺក៏ដើម្បីបង្កើនភាពក្លាហាន តស៊ូ ហ៊ាន ព្រមទាំងប្រឹងប្រែង ស្វាធ្យាយរៀនសូត្របន្ថែមទៀតដែរ និងកាន់តែពូកែជាងមុនលើមុខវិជ្ជាភូមិវិទ្យា និងផែនដីវិទ្យា ព្រមទាំងបង្កើនចំណេះដឹងលើភូមិសាស្ត្រជាតិកាន់តែទូលំទូលាយ។ មិនតែប៉ុណ្ណោះសិស្សនឹងទទួលបានចំណេះដឹងតាមរយៈសំណួររាប់ពាន់ក្នុងរយៈពេលដ៏ខ្លី នាឱកាសប្រកួតប្រជែងចំណេះដឹងភូមិសាស្ត្រជាតិនេះ ពោលក្នុងរយៈពេលតែមួយខែប៉ុណ្ណោះសិស្សានុសិស្សបានសិក្សាឈ្វេងយល់ និងចងចាំមេរៀនភូមិវិទ្យា និងផែនដីវិទ្យា រហូតដល់ជាង១.០០០ សំណួរបានយ៉ាងច្បាស់លាស់។
នាយកចាងហ្វាងរូបនោះ បានអះអាងមកកាន់អ្នកសារព័ត៌មានយើងបន្ថែមថា សាលាតែងបំផុស និងបង្កើតឱ្យមានកម្មវិធីប្រកួតចំណេះដឹងយ៉ាងសន្ធឹកសន្ធាប់ពីមួយឆ្នាំទៅមួយឆ្នាំ គឺក្នុងសុច្ឆន្ទៈហ្វឹកហ្វឺនសិស្សរបស់ខ្លួនឱ្យមានសមត្ថភាពខ្ពស់អាចឈរជើងប្រកួតប្រជែងទាំងនៅលើឆាកជាតិ និងអន្តរជាតិបាន។ “ការប្រកួតចំណេះដឹងនានា គឺតែងមានជាប់និងធ្លាក់ ប៉ុន្តែទោះបីធ្លាក់ក៏បានបង្ហាញនូវគន្លឹះ និងបទពិសោធល្អៗ ដើម្បីឈោងចាប់យកជ័យជម្នះនៅឱកាសក្រោយៗទៀតដែរ។ ដូច្នេះអ្នកដែលទទួលលទ្ធផលពុំគាប់ប្រសើរ សូមកុំអស់សង្ឃឹម និងបាក់ទឹកចិត្តឡើយ ផ្ទុយទៅវិញត្រូវព្យាយាមអភិវឌ្ឍសមត្ថភាព និងចំណេះដឹងបន្ថែមទៀត ព្រោះជោគជ័យពុំមែនកើតឡើងដោយភ័ព្វព្រេងវាសនាឡើយ ផ្ទុយទៅវិញគឺបានមកពីការទទូចខំប្រឹងប្រែងរបស់យើងប៉ុណ្ណោះ។ មានន័យថា សំណាងរមែងកើតឡើងចំពោះអ្នកដែលទុកចិត្តលើខ្លួនឯង មានសេចក្ដីព្យាយាមល្អ និងបន្តប្រឹងប្រែងរៀនសូត្រ”។ នេះជាដំបូន្មានបន្ថែមរបស់នាយកចាងហ្វាងរូបនោះផ្ដល់ដល់បេក្ខជន និងសិស្សានុសិស្សដែលចូលរួមនាឱកាសនោះ។
គួររម្លឹកជូនថា បន្ទាប់ពីបានហែលឆ្លងការប្រកួតចំណេះដឹងភូមិសាស្ត្រជាតិ ម៉េងលី ជេ. គួច លើកទី៥ ក្នុងវគ្គជម្រុះជុំទី១ យ៉ាងលំបាកលំបិនផុតទៅ គណៈកម្មការបានរកឃើញបេក្ខជនដែលពូកែផ្នែកចំណេះដឹងនេះចំនួន៥៦រូប ក្នុងចំណោម២១៧នាក់ ដែលមកពីតាមបណ្ដាសាខានៃសាលារៀន អន្តរទ្វីប អាមេរិកាំង។ បេក្ខជនជើងខ្លាំង និងមានសមត្ថភាពខ្ពស់ជាប់វគ្គជម្រុះជុំទី១នោះ បានឈានជើងបន្តយ៉ាងស្វិតស្វាញនៅវគ្គជម្រុះជុំទី២ ប៉ុន្តែក្នុងចំណោម៥៦រូបនោះ មានបេក្ខជនចំនួន២៣រូប ត្រូវអស់សិទ្ធិឡើងទៅវគ្គផ្ដាច់ព្រ័ត្រ។
សូមជម្រាបជូនថា បេក្ខជនដែលមានសិទ្ធិចូលរួមប្រកួតនៅវគ្គផ្ដាច់ព្រ័ត្រនេះ គឺមានចំនួនត្រឹមតែ៣៤រូបតែប៉ុណ្ណោះ។ ជើងខ្លាំងទាំង៣៤រូបនោះបានប្រកួតគ្នាយ៉ាងកក្រើក និងស្វិតស្វាញជាទីបំផុតអស់រយៈពេលប្រហែលជាង៤ម៉ោង ហើយជាលទ្ធផល គណៈកម្មការបានវែកមុខជើងខ្លាំងពិតប្រាកដត្រឹមតែ៣រូបប៉ុណ្ណោះដែលទទួលបានជ័យលាភី។ ក្នុងចំណោមបេក្ខជនទាំង៣រូបនោះ គឺជ័យលាភីលេខ១ បានទៅលើយុវសិស្ស យ៉ាង ស៊ុនម៉េង រីឯលេខ២ បានទៅលើយុវតី ម៉ាក់ ហេងគង្គារ និងលេខ៣ បានទៅលើបេក្ខជន ងី វីរៈសូឡា។
ថ្លែងនាឱកាសលើកពានជាបេក្ខជនជ័យលាភីលេខ១ យុវសិស្ស យ៉ាង ស៊ុនម៉េង បានប្រាប់អ្នកសារព័ត៌មានយើងថា ការប្រកួតចំណេះដឹងផ្នែកភូមិសាស្ត្រជាតិនេះ គឺមានសារៈសំខាន់ចំពោះរូបគេ ក៏ដូចជាសិស្សានុសិស្ស និងយុវជនឯទៀតដែរ ព្រោះបានបណ្ដុះនូវវប្បធម៌នៃការអាន ការខិតខំប្រឹងប្រែងរៀនសូត្រ និងការសិក្សាស្រាវជ្រាវបន្ថែម ពោលបណ្ដុះទម្លាប់ល្អជាវិជ្ជមានក្នុងការក្រេបរសវិជ្ជា។ ម្ចាស់ជ័យលាភីរូបនោះអះអាងបន្ថែមថា លទ្ធផលល្អបែបនេះ គឺពុំមែនកើតដោយចៃដន្យឡើយ។ មិនចៃដន្យ ក៏ព្រោះនេះជាសមិទ្ធផលស្ដែងចេញពីការប្រឹងប្រែងរៀនសូត្រ និងតស៊ូជម្នះរាល់ភាពខ្ជិលច្រអូសរបស់ខ្លួនយ៉ាងពិតប្រាកដ។
មិនគួរនឹងភ្លេចបញ្ជាក់ជូនទេថា ចំពោះជ័យលាភីលេខ១ គឺទទួលបានអាហារូបករណ៍សិក្សាឥតបង់ថ្លៃ១០០% នៅសាលារៀន អន្ដរទ្វីប អាមេរិកាំង អមដោយមេដាយមាស បណ្ណសរសើរ និងវត្ថុអនុស្សាវរីយ៍។ ដោយឡែកជ័យលាភីលេខ២ ទទួលបានអាហារូបករណ៍សិក្សា៧៥% អមដោយមេដាយប្រាក់ បណ្ណសរសើរ និងវត្ថុអនុស្សាវរីយ៍។ ចំណែកលេខ៣ ទទួលបានអាហារូបករណ៍សិក្សា៥០% អមដោយមេដាយសំរឹទ្ធិ បណ្ណសរសើរ និងវត្ថុអនុស្សារីយ៍ដូចគ្នា៕
(អត្ថបទសាលា)
© រក្សាសិទ្ធិដោយ thmeythmey.com
