ជាតិ
សិល្បះ
ក្រសួងវប្បធម៌ ព្រមានចាត់វិធានលើតារាចម្រៀងរ៉េបណា ដែលប្រើពាក្យអសុរោះ និងគ្មានសីលធម៌ លោក ថៃ នរៈសត្យា អ្នកនាំពាក្យក្រសួងវប្បធម៌ និងវិចិត្រសិល្បៈ
× ភ្នំពេញ៖ ថ្មីៗនេះតារាចម្រៀងរ៉េប (Rap) មួយចំនួន បានប្រើប្រាស់ជំនាញសិល្បៈរបស់ខ្លួន ជាឈ្នាន់ក្នុងការរិះគន់ ឬវាយប្រហារគ្នា ដោយប្រើពាក្យមិនសមរម្យ។ បញ្ហាទាំងនោះត្រូវបានក្រសួងវប្បធម៌ និងវិចិត្រសិល្បៈ ចាត់ទុកសកម្មភាពនេះថា ជាទង្វើផ្គើន និងជាការបំផ្លាញវប្បធម៌ជាតិ។ ក្រសួងវប្បធម៌ ព្រមានចាត់វិធានការច្បាប់លើក្រុមតារាចម្រៀងរ៉េប ដែលប្រើប្រាស់ពាក្យសម្តីគ្មានសីលធម៌ក្នុងបទចម្រៀង។
អ្នកនាំពាក្យក្រសួងវប្បធម៌ លោក ថៃ នរៈសត្យា បាននិយាយថា ក្រសួងបានព្យាយាមដោះស្រាយបញ្ហាតារាមួយចំនួន ដែលបានធ្វើឱ្យសិល្បៈ មានឱនភាព ឬបាត់តម្លៃជាច្រើនមកហើយ។ ប៉ុន្តែតារាមួយចំនួន នៅតែផ្គើន ហើយមិនព្រមភ្ញាក់រឭកពីទង្វើរបស់ខ្លួន។
លោក ថៃ នរៈសត្យា ព្រមានថា សកម្មភាពផ្គើនដដែលៗនេះ ហាក់បង្ខំឱ្យក្រសួងវប្បធម៌និងវិចិត្រសិល្បៈបង្កើតច្បាប់តឹងរ៉ឹង គ្រប់គ្រងលើសកម្មភាពតារាចម្រៀងរ៉េប និងបទចម្រៀងណាធ្វើឲ្យធ្លាក់ចុះតម្លៃខ្មែរ។ លោកបញ្ជាក់យ៉ាងដូច្នេះ ៖«កន្លងមកយើងព្យាយាមដោះស្រាយបញ្ហាដោយសន្តិវិធី និងយល់យោគគាត់ច្រើន។ យើងមិនចង់ឱ្យមានពាក្យថា ក្រសួងគាបសង្កត់ ឬធ្វើតឹងរ៉ឹង រហូតសិល្បករគ្មានសេរីភាព។ តែពួកគាត់នៅតែផ្គើន នៅតែបំផ្លាញវប្បធម៌ជាតិ ដូចចង់ឱ្យក្រសួងបង្កើតច្បាប់គ្រប់គ្រងពួកគាត់។ យើងមិនចង់ធ្វើបែបហ្នឹងទេ។ យើងចង់ឱ្យគាត់មានស្មារតីភ្ញាក់រឭកដោយខ្លួនឯង តែនៅតែដដែល»។
លោក ថៃ នរសត្យា បន្ថែមថា អ្នកសិល្បៈគឺជាបុគ្គលសាធារណៈ ជាជនគំនូរក្នុងសង្គម ក៏ជាអ្នកលើកស្ទួយសិល្បៈវប្បធម៌ដែរ មិនមែនជាអ្នកបំផ្លាញវប្បធម៌ឡើយ។ លោកបន្ថែមថា តារាដែលបង្ហាញគំរូមិនល្អដល់សង្គម បានធ្វើឱ្យតម្លៃ និងកិត្តិយសរបស់ខ្លួនធ្លាក់ចុះ។
បើតាមលោក ថៃ នរៈសត្យា ក្រសួងនឹងធ្វើលិខិតមួយ ជូនទៅរដ្ឋមន្ត្រីសាមីដើម្បីចាត់ការរឿងតារាចម្រៀងរ៉េបនិពន្ធបទចម្រៀងជេរគ្នាទៅវិញទៅមក និងទំនុកចម្រៀងគ្មានក្រមសីលធម៌។ សូមបញ្ជាក់ថា ថ្មីៗនេះមានតារាចម្រៀងរ៉េបមួយចំនួន បាននិពន្ធទំនុកច្រៀងជេរគ្នា និងឌឺដងដាក់គ្នាទៅវិញទៅមក ដោយប្រើពាក្យអសុរោះ ដែលធ្វើឱ្យប៉ះពាល់ដល់តម្លៃសិល្បៈវប្បធម៌ជាតិខ្មែរ។ ការច្រៀងរ៉េបឌឺដងដាក់គ្នានេះ កើតឡើងដោយសារជម្លោះបុគ្គលផ្ទាល់ខ្លួន៕
Tag:
ក្រសួងវប្បធម៌និងវិចិត្រសិល្បៈ
សិល្បៈ ចម្រៀង
ចម្រៀងរ៉េប
© រក្សាសិទ្ធិដោយ thmeythmey.com