ខ្មែរក្រហម
ជាតិ
DC-Cam នឹងបើកវគ្គបណ្ដុះបណ្ដាលស្ដីពីរបបខ្មែរក្រហមដល់គ្រូបង្រៀន
× មជ្ឈមណ្ឌលឯកសារកម្ពុជា DC-Cam សហការជាមួយក្រសួងអប់រំនឹងរៀបចំវគ្គបណ្ដុះបណ្ដាលមួយ ស្ដីពីរបបខ្មែរក្រហមលើកទី១០ ដល់លោកគ្រូ អ្នកគ្រូដែលមកពី ឃុំ-សង្កាត់ផ្សេងៗគ្នា នៅឯសាលាបណ្ដុះបណ្ដាលគរុកោសល្យភូមិភាគកំពង់ចាម។នេះបើយោងតាមសេចក្ដីជូនដំណឹង មួយរបស់ DC-Cam ដែលបានចេញផ្សាយនៅថ្ងៃនេះ។
យោងតាមសេចក្ដីជូនដំណឹងនោះក៏បានឲ្យដឹងដែរថា វគ្គបណ្ដុះបណ្ដាលនោះនឹងត្រូវធ្វើចាប់ពីថ្ងៃទី៧ ដល់ថ្ងៃទី១២ ខែសីហាខាងមុខនេះ ដែលនឹងមានអ្នកចូលរួមចំនួន៥០នាក់មកពីខេត្តកំពង់ចាម និង៥០នាក់ទៀតមកពីខេត្តក្រចេះផងដែរ។
ចំពោះគោលបំណងនៃការបណ្ដុះបណ្ដាលនេះ គឺដើម្បីជាជំហានមួយនិងបន្តទៅមុខទៀត ក្នុងការកសាង វប្បធម៌នៃការផ្សះផ្សារមួយ សន្តិភាព ការគោរពសិទ្ធិមនុស្ស លទ្ធិប្រជាធិបតេយ្យ និង នីតិរដ្ឋជាដើមនោះ។ ម្យ៉ាងទៀតគឺដើម្បីបង្រៀនពីប្រវត្តិសាស្ត្ររបស់ពួកខ្មែរក្រហម ដើម្បីឱ្យប្រជាជនកម្ពុជា ជាពិសេសក្មេងៗជំនាន់ក្រោយ យល់ដឹងពីបរិបទនយោបាយជាផ្លូវការមួយ ឬក៏ដើម្បីជាការចែករំលែកជាលក្ខណៈឯកជន រវាងឪពុកម្តាយទៅកាន់កូនៗរបស់ពួកគាត់ផងដែរ។
គួរបញ្ជាក់ផងដែរថា មជ្ឈមណ្ឌលឯកសារកម្ពុជាDC-Cam បានបង្កើតនូវវគ្គបណ្ដុះបណ្ដាលនេះឡើងតាំងពីឆ្នាំ២០០៩មកម្លេះ ហើយមានលោកគ្រូ អ្នកគ្រូជាង៣០០០នាក់ហើយបានទទួលនូវការបណ្ដុះបណ្ដាលពីប្រវត្តិសាស្ត្រខ្មែរក្រហមនេះ៕
© រក្សាសិទ្ធិដោយ thmeythmey.com