ជាតិ
សង្គមស៊ីវិល៖ យើងសោកស្តាយដែលគ.ជ.បប្រកាសលទ្ធផលលឿនពេក គណៈកម្មាធិការជាតិរៀបចំការបោះឆ្នោត(គជប) បានកំណត់ នៅព្រឹកថ្ងៃអាទិត្យនេះ លទ្ធផលផ្លូវការនៃការបោះឆ្នោតថ្ងៃទី២៨ ខែកក្កដា ត្រូវបានប្រកាសជារួចរាល់។ សង្គមស៊ីវិលបានហៅការប្រកាសលទ្ធផលនេះថា មានភាពប្រញាប់ប្រញាល់ ពីព្រោះថាភាពមិនប្រក្រតីនៅពេលបោះឆ្នោត ដែលគណបក្សនយោបាយរកឃើញ នៅមិនទាន់ដោះស្រាយរួចរាល់។
ការស្នើសុំពន្យាពេលប្រកាសលទ្ធផលពីបក្សប្រឆាំង មិនទទួលបានផលនោះទេ។ គ.ជ.បនៅ តែអាចប្រកាសលទ្ធផលផ្លូវការ ការបោះឆ្នោតថ្ងៃទី២៧ ខែកក្កដាបាន បើទោះជាមានការស្នើ ឲ្យមានការស៊ើបអង្កេតពីលទ្ធផលយ៉ាងណាក៏ដោយ។
គ្មានអ្វីផ្លាស់ប្តូរនោះទេ ចំពោះសំឡេងឆ្នោតបឋមនិងផ្លូវការ គឺថាគណបក្សប្រជាជននៅតែ អាចដឹកនាំរដ្ឋាភិបាល ដោយទទួលបានសំឡេង៦៨អាសនៈ ចំនែក គណបក្សសង្គ្រោះជាតិទទួលបាន៥៥អាសនៈ។
ប្រធានអង្គការខុមហ្វ្រែល លោក គល់ បញ្ញា បានបញ្ចេញទស្សនៈជុំវិញការប្រកាសលទ្ធផល នេះថា វាហាក់លឿនពេកសម្រាប់ការប្រកាសពីលទ្ធផលនេះ។ លោកបន្តថា វានឹង ធ្វើឲ្យគណបក្សនយោបាយ មិនសប្បាយចិត្ត និងនៅតែបន្តមានការសង្ស័យច្រើនជុំវិញការ បោះឆ្នោត។
លោកថ្លែងថា៖«ខ្ញុំមានការសោកស្តាយជាខ្លាំង ចំពោះការប្រកាសលទ្ធផលផ្លូវការនេះ។ គ.ជ.បគួរទុកឲ្យគណបក្សនយោបាយ អស់ចិត្តរៀងៗខ្លួនសិន មុនសម្រេចប្រកាស។ ខ្ញុំគិតថាវាមិនហួស ពេលនោះទេ»។
លោក គល់ បញ្ញាបន្តថា ទំនាស់នយោបាយនៅតែបន្តអូសបន្លាយ ប្រសិនណាទស្សនៈរបស់ គណបក្សប្រជាជន និងគណបក្សសង្គ្រោះជាតិនៅខុសគ្នា។ លោកថ្លែងថា៖«សម្រាប់ខ្ញុំ គណបក្សប្រជាជន គួរឆ្លើយតបតាមសំណើររបស់គណបក្សសង្គ្រោះជាតិ ដែលសុំឲ្យមានការជួបថ្នាក់ដឹកនាំកំពូលរបស់បក្សទាំងពីរ ដើម្បីបញ្ចប់បញ្ហានេះ។ បើមិនដូច នោះទេ ខ្ញុំគិតថា វាមិនងាយបញ្ចប់ទេ»។
លោក ព្រាប កុល ប្រធានអង្គការតម្លាភាពកម្ពុជា ដែលបានអង្កេតការណ៍ការបោះឆ្នោត យ៉ាងសកម្មនោះ ក៏បានបញ្ចេញយោបល់ជុំវិញការប្រកាសលទ្ធផលនេះថា ការប្រកាស លទ្ធផលនេះ គ.ជ.បបានធ្វើត្រឹមត្រូវ ទៅតាមប្រតិទិនដែលបានកំណត់។
ការមើលឃើញរបស់លោក ព្រាប កុល មិនខុសអ្វីពីទស្សនៈរបស់លោក គល់ បញ្ញាប៉ុន្មាន នោះទេ គឺថាការប្រកាសលទ្ធផលជាផ្លូវការនេះ វាហាក់លឿនពេក ព្រោះថាភាពមិនប្រក្រតី ឫបណ្តឹងជាច្រើនរបស់បក្សប្រឆាំង មិនទាន់ត្រូវបានដោះស្រាយនៅឡើយ។
លោក ព្រាប កុលបានថ្លែងថា៖«….ការធ្វើនេះ(ការប្រកាសលទ្ធផល) ចំពេលទំនាស់វិវេទរបស់បក្សនយោបាយ នៅមិនទាន់ត្រឹមត្រូវ និងមិនទាន់ទទួលយកបានពីភាគីទាំងសងខាង… ខ្ញុំបារម្ភថា ការប្រកាសលទ្ធផលនេះ អាចបន្តធ្វើឲ្យស្ថានភាពនយោបាយ មានភាពតានតឹងមួយកម្រិតទៀត ព្រោះអាចមានការតវ៉ាពីប្រជាពលរដ្ឋ ដែលមិនយល់ស្រប ចំពោះលទ្ធផលនេះ»។
បើទោះជាលទ្ធផលផ្លូវការត្រូវបានប្រកាសក៏ពិតមែន ក៏ប៉ុន្តែសម្រាប់សង្គមស៊ីវិល ជំនួបថ្នាក់ដឹកនាំកំពូលត្រូវតែធ្វើឡើងជាចាំបាច់។ ចាំបាច់ ដើម្បីរិះរកផ្លូវមួយសម្រាប់ដើរ និងភាគីទាំងសងខាងព្រមទទួល ដោយភាពយុត្តិធម៌បំផុត៕
© រក្សាសិទ្ធិដោយ thmeythmey.com