អន្តរជាតិ
ប្រភពរូប៖ វេបសាយព័ត៌មាន independent.co.uk
×![]()
ដោយ៖ ឈួន ឈីវអ៊ីង
ការហាត់ប្រាណ គឺពិតជាមានសារសំខាន់ខ្លាំងណាស់សម្រាប់សុខភាពផ្លូវចិត្ត ជាជាងស្ថានភាពសេដ្ឋកិច្ចរបស់អ្នក។ ចំពោះអ្នកដែលបានហាត់ប្រាណជាប្រចាំ អាចមានអារម្មណ៍មិនល្អប្រហែល ១៨ថ្ងៃក្នុងមួយឆ្នាំ ចំណែកឯអ្នកដែលហាត់ប្រាណមិនបានទៀងទាត់មានអារម្មណ៍មិនល្អ ច្រើនជាង ៣៥ថ្ងៃជាមធ្យម។ លើសពីនេះ កីឡាមួយចំនួនដែលទាក់ទងនឹងការចូលរួមក្នុងសង្គម អាចមានឥទ្ធិពលវិជ្ជមានទៅលើសុខភាពផ្លូវចិត្តរបស់អ្នកច្រើនជាងកីឡាដទៃ។ នេះបើតាមការស្រាវជ្រាវនៃសកលវិទ្យាល័យ Yale និងសកលវិទ្យាល័យOxford។ 
ការធ្វើលំហាត់ប្រាណ ផ្តល់អត្ថប្រយោជន៍ទាំងសុខភាពផ្លូវចិត្តនិងរាងកាយ។ យោងតាមការសិក្សាដែលបានចេញផ្សាយនៅក្នុងកាសែត The Lancet អ្នកវិទ្យាសាស្ត្របានប្រមូលទិន្នន័យអំពីឥរិយាបថរាងកាយ និងអារម្មណ៍ផ្លូវចិត្តរបស់ពលរដ្ឋអាមេរិកជាង ១,២ លាននាក់។
អ្នកចូលរួមត្រូវបានគេសួរថា តើអ្នកមានអារម្មណ៍មិនល្អ ដូចជាស្ត្រេស, បាក់ទឹកចិត្ត ឬមានបញ្ហាអារម្មណ៍ប៉ុន្មានដងរយៈពេល ៣០ថ្ងៃចុងក្រោយនេះ ហើយក៏មានសំណួរពាក់ព័ន្ធពី ប្រាក់ចំណូល និងសកម្មភាពរាងកាយផងដែរ។ ពួកគេអាចជ្រើសរើសសកម្មភាពរាងកាយដូចជា កាត់ស្មៅ, ថែទាំកុមារ, ធ្វើការងារផ្ទះ, ការរត់, និងការជិះកង់ជាដើម។
ការហាត់ប្រាណ ពិតជាបានផ្តល់ផលល្អដល់សុខភាពផ្លូវចិត្ត ក៏ប៉ុន្តែ ការធ្វើវាច្រើនហួសពេកនឹងអាចធ្វើឲ្យជួបបញ្ហាទៅវិញ។ ការសិក្សាបានរកឃើញថា សកម្មភាពរាងកាយអាចជួយដល់សុខភាពផ្លូវចិត្តបានល្អប្រសើរ លុះត្រានៅក្នុងពេលវេលាជាក់លាក់មួយ។ ជាការល្អ ក្នុងមួយសប្តាហ៍គួរតែហាត់ប្រាណឲ្យបាន៣ ទៅ៥ដង ដែលក្នុង១ដង ប្រហែល៣០នាទី ទៅ មួយម៉ោង។
លើសពីនេះទៅទៀត សម្រាប់អ្នកដែលធ្វើលំហាត់ប្រាណលើសពី៣ម៉ោងក្នុងមួយថ្ងៃ អាចនឹងរងគ្រោះផ្នែកសុខភាពផ្លូវចិត្តធ្ងន់ធ្ងរ ជាងអ្នកដែលមិនបានហាត់ប្រាណទៅទៀត។
អ្នកវិទ្យសាស្ត្រ បានកត់សម្គាល់ថា កីឡាដែលទាក់ទងនឹងការចូលរួមក្នុងសង្គមដូចជា ពពួកកីឡាជាក្រុម អាចមានឥទ្ធិពលវិជ្ជមានទៅលើសុខភាពផ្លូវចិត្តបានច្រើនជាងកីឡាដទៃទៀត។ តែបើទោះជា ការជិះកង់,លំហាត់ប្រាណតាមភ្លេង, និងការហាត់កាយសម្បទា មិនបានរាប់បញ្ជូលជាកីឡាដែលលេងជាក្រុមក្តី សកម្មភាពទាំងនេះក៏អាចចាត់ទុកថាមានឥទ្ធិពលវិជ្ជមានចំពោះសុខភាពផ្លូវចិត្តផងដែរ៕
© រក្សាសិទ្ធិដោយ thmeythmey.com
