អន្តរជាតិ
រូបភាព The Australian
×![]()
ដោយ៖ ឈួន ឈីវអ៊ីង
កងកម្លាំងយោធាអូស្ត្រាលី បានឃាត់ទូកមួយរបស់ស្រីលង្កាជាមួយអ្នកស្វែងរកសិទ្ធិជ្រកកោនចំនួន ១៣នាក់នៅលើទូកនោះ កាលពីខែសីហាកន្លងទៅ។ រដ្ឋមន្ត្រីមហាផ្ទៃ លោក Peter Dutton បាននិយាយបែបនេះនៅថ្ងៃទី២ ខែកញ្ញា ខណៈទីក្រុងកង់បេរ៉ា កំពុងការពារចំណាត់ការរបស់ខ្លួនក្នុងការតាំងទីលំនៅថ្មីនៃពួកតាមិល (Tamil) មួយគ្រួសារទៅកាន់មន្ទីរឃុំឃាំងនៅដាច់ស្រយាលឆ្ងាយពីទីប្រជុំជន។
រដ្ឋមន្ត្រីមហាផ្ទៃអូស្ត្រាលី លោក Peter Dutton និយាយថា ទូកស្រីលង្កា ត្រូវគេចាប់បាននៅកោះ Cocos ដែលជាតំបន់ដាច់ស្រយាលរបស់ប្រទេសអូស្ត្រាលី នៅក្នុងមហាសមុទ្រឥណ្ឌា។ នេះគឺជាទូកទី១៣ហើយដែលចេញពីស្រីលង្កា ចូលមកក្នុងទឹកដីអូស្ត្រាលីដើម្បីស្វែងរកសិទ្ធិជ្រកកោន ក្នុងរយៈពេល១៨ខែកន្លងមកនេះ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
អ្នកស្វែងរកសិទ្ធិជ្រកកោនដែលត្រូវបានចាប់ខ្លួននៅសមុទ្រពេលមិនទាន់មកដល់ប្រទេសអូស្ត្រាលី ត្រូវបញ្ជូនត្រលប់ទៅប្រទេសដើមវិញ។ រីឯអ្នកដែលបានមកដល់អូស្ត្រាលីហើយ ត្រូវបានបញ្ចូនទៅជំរុំឃុំឃាំងរបស់អូស្ត្រាលី នៅប៉ាពួអាស៊ីនូវែលហ្គីណេ, កោះ Nauru នៃមហាសមុទ្របាស៊ីហ្វិកខាងត្បូង និងកោះ Christmas ដែលបានរងការរិះគន់យ៉ាងខ្លាំងពីសំណាក់អង្គការជាច្រើន ក្នុងនោះក៏មានអង្គការសហប្រជាជាតិផងដែរ។
មនុស្សរាប់ពាន់នាក់នៅទូទាំងប្រទេសអូស្ត្រាលី បានធ្វើបាតុកម្មនៅចុងសប្តាហ៍នេះប្រឆាំងនឹងសេចក្តីសម្រេចខាងលើ។ ប៉ុន្តែនាយករដ្ឋមន្ត្រី Scott Morrison បាននិយាយនៅថ្ងៃទី២ ខែកញ្ញាដែរថា ការអនុញ្ញាតឲ្យក្រុមគ្រួសារតាមិលស្នាក់នៅបន្ត ដែលប្រៀបដូចជាលើកទឹកដល់អ្នកស្វែងរកសិទ្ធិជ្រកកោនឲ្យកើនឡើងបន្ថែមទៀត។ មជ្ឈមណ្ឌលឃុំឃាំងមួយនៅកោះ Christmas ដែលមានចម្ងាយប្រមាណ ១,៥៥០ គីឡូម៉ែត្រ ភាគពាយព្យនៃដីគោកត្រូវបានបើកដំណើរការឡើងវិញ នៅដើមឆ្នាំនេះបន្ទាប់ពីវាបានទុកចោលអស់រយៈពេល១០ឆ្នាំ។
លោក Dutton បាននិយាយថាក្រុមតាមិល នឹងមិនត្រូវបានអនុញ្ញាតឱ្យស្នាក់នៅបន្តនោះទេ បន្ទាប់ពីការដាក់ពាក្យសុំសិទ្ធិជ្រកកោនរបស់ពួកគេត្រូវបានបដិសេធ៕
© រក្សាសិទ្ធិដោយ thmeythmey.com
