ខ្មែរក្រហម
ជាតិ
ភាគីជាតិសាលាក្ដីខ្មែរក្រហមមានថវិកាវិញហើយ
× ក្រោយពីមានវិបត្តិថវិកាអស់រយៈពេលជាងបីខែមកនេះ ភាគីជាតិនៃសាលាក្ដីខ្មែរក្រហមបានទទួលដំណឹងថា នៅថ្ងៃនេះភាគីខាងអង្គការសហប្រជាជាតិ នឹងផ្ដល់នូវមូលនិធិសង្គ្រោះបន្ទាន់មួយ ដើម្បីជួយដល់ខាងផ្នែកភាគីជាតិ ដើម្បីដោះស្រាយបញ្ហាវិបត្តិថវិកានេះផងដែរ។
អ្នកនាំពាក្យសាលាក្ដីខ្មែរក្រហម លោក នេត ភក្ត្រា បានប្រាប់គេហទំព័រថ្មីៗថា៖«នៅថ្ងៃនេះ អង្គការសហប្រជាជាតិ បានផ្ដល់នូវមូលនិធិសង្គ្រោះបន្ទាន់មកដល់ភាគីជាតិនៃសាលាក្ដីខ្មែរក្រហម នូវទឹកប្រាក់ចំនួន ១ ១៥០ ០០០ ដុល្លារអាមេរិក ដើម្បីឲ្យភាគីជាតិដើម្បីបើកប្រាក់បៀវត្សជូនមន្ត្រី បុគ្គលិករបស់ខ្លួនដែលខកខានក្នុងការបើក អស់រយៈពេល៣ខែមកហើយនោះ»។
លោកបានបន្តថា៖«ទោះជាមានការផ្ដល់នូវទឹកប្រាក់សង្គ្រោះបន្ទាន់នេះក្ដី ក៏ថវិកានេះនៅមិនទាន់គ្រប់គ្រាន់នៅឡើយនោះទេ គឺថាយើងនៅត្រូវការថវិកាចំនួន ១,៨លានដុល្លារអាមេរិកបន្ថែមទៀត ដើម្បីដោះស្រាយវិបត្តិនេះឲ្យបានចប់សព្វគ្រប់»។
លោកក៏បានបន្ថែមទៀតថា៖«យើងសូមថ្លែងអំណរគុណចំពោះអង្គការសហប្រជាជាតិ ប្រទេសម្ចាស់ជំនួយ និងគ្រប់ភាគីដែលពាក់ព័ន្ធទាំងអស់ ដែលបានរួមគ្នាក្នុងការរកដំណោះស្រាយ នូវវិបត្តិថវិកានេះ។ ហើយលោកសង្ឃឹមថា បន្ទាប់ពីការជូនដំណឹងស្ដីពីការមានថវិកានេះទៅ មន្ត្រី បុគ្គលិក នៃភាគីជាតិក្នុងសាលាក្ដីទាំងអស់នឹងត្រឡប់ចូលមកធ្វើការដូចដើមវិញផងដែរ»៕
© រក្សាសិទ្ធិដោយ thmeythmey.com