អន្តរជាតិ
ប៉េរូ ពិន័យហាង McDonald ចំនួន២៥ម៉ឺនដុល្លារជុំវិញការស្លាប់របស់បុគ្គលិក
រូបភាពAFP
×![]()
ដោយ: ធៀន ភារិន្ទ
អាជ្ញាធរប៉េរូ នៅថ្ងៃទី២៦ ខែធ្នូ បានពិន័យហាង McDonald មួយកន្លែងក្នុងទំហំទឹកប្រាក់ ២៥ម៉ឺនដុល្លារពីបទបំពាននបទដ្ឋានសុវត្ថិភាព បន្ទាប់ពីបុគ្គលិកចំនួនពីរនាក់បានបាត់បង់ជីវិតដោយសារតែភ្លើងឆក់។ 
បុគ្គលិកធ្វើការ នៅក្នុងហាង McDonald មួយកន្លែង ក្នុងខេត្ត Lima ប្រទេសប៉េរូ បានស្លាប់ភ្លាមៗដោយសារតែខ្សែភ្លើងឆក់។ បុគ្គលិកប្រុសស្រីពីរនាក់ បានបាត់បង់ជីវិតកាលពីថ្ងៃទី១៥ ខែធ្នូ ខណៈពេលកំពុងធ្វើការនៅក្នុងហាង។ បើតាមមន្ត្រីប៉ូលីសប្រចាំស្រុក បុគ្គលិកជានារី បានឆក់ស្លាប់ដោយដៃម្ខាងរបស់នាង បានកាន់ម៉ាស៊ីនទឹកក្រូច។ ពេលឃើញដូច្នេះ បុគ្គលិកប្រុស ក៏ទៅជួយ ប៉ុន្តែបុរសរូបនេះ ក៏ត្រូវភ្លើងឆក់ដែរ។
បើតាមលោក Juan Carlos Requejo ប្រធានស្ថាប័នត្រួតពិនិត្យស្តង់ដាការងារជាតិ (Sunafil) បានបញ្ជាក់យ៉ាងដូច្នេះថា អាជ្ញាធរ បានរកឃើញកំហុសចំនួន ៦ ដែលបានបំពានបទដ្ឋានសុវត្ថិភាពការងារ ហើយមួយក្នុងចំណោមនោះ គឺជាកំហុស ដែលបានបង្កឲ្យមនុស្សស្លាប់។ ប៉ុន្តែលោក Requejo មិននិយាយអំពីកំហុសចំនួន ៥ទៀតនោះ គឺជាអ្វីទេ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ជុំវិញបញ្ហានេះ ស្ថាប័ន Sunafil បានពិន័យអាជីវកម្មដែលទិញសិទ្ធិពី McDonald មួយនេះក្នុងទំហំទឹកប្រាក់ប្រមាណជា ២៥ម៉ឺនដុល្លារ ព្រោះបានបំពានបទដ្ឋានសុវត្ថិភាពការងារ ព្រោះម្ចាស់អាជីវកម្មមួយនេះ ដឹងថាម៉ាស៊ីនទឹកក្រូចមួយនេះ ឆ្លងភ្លើងក៏ដោយ ប៉ុន្តែនៅតែមិនជុសជុលដែរ៕
Tag:
ប៉េរូ
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
