អន្តរជាតិ
មហាសេដ្ឋីលំដាប់ពិភពលោកទាំង១០រូប ក្នុងឆ្នាំ ២០១៩
×![]()
ដោយ: ធៀន ភារិន្ទ
តាមការចុះផ្សាយរបស់ទស្សនាវដ្តីអាមេរិកដ៏ល្បីល្បាញ Forbes ក្នុងឆ្នាំ ២០១៩ លោក Jeff Bezos ជាមហាសេដ្ឋី បានកើនទ្រព្យសម្បត្តិរហូតជាង ១រយពាន់លានដុល្លារ ហើយបានក្លាយជាមហាសេដ្ឋីលំដាប់ទីមួយរបស់ពិភពលោក។ ខណៈពេលអ្នកតាមពីក្រោយ គឺជាស្ថាបនិកក្រុមហ៊ុន Microsoft លោក Bill Gates។ ក្នុងបញ្ជីអ្នកមានជាងគេបង្អស់ទាំង១០ លើពីភពលោក មានតែ ៣រូបតែប៉ុណ្ណោះ ដែលមិនមែនជាជនជាតិអាមេរិក។
ខាងក្រោមនេះ គឺជាមហាសេដ្ឋីទាំង១០ នៅលើពិភពលោក៖
១០. Larry Page
លោក Larry Page គឺជា សហស្ថានិក និងសមាជិកក្រុមប្រឹក្សាភិបាលនៃក្រុមហ៊ុន Alphabet ដែលជាក្រុមហ៊ុនមេរបស់ Google។ មានវ័យត្រឹមតែ ៤៦ ឆ្នាំ លោក Larry Page មានទ្រព្យសម្បត្តិសរុប ៥០,៨ពាន់លានដុល្លារ។ ក្នុងចំនួនទឹកប្រាក់ដ៏ច្រើនសន្ធឹកបែបនេះ លោក Larry បានក្លាយជាមហាសេដ្ឋីអាមេរិកលំដាប់ទី ១០របស់ពិភពលោក។
៩. Michael Bloomberg
លោក Michael Bloomberg គឺជាសហស្ថានិក ក្រុមហ៊ុនព័ត៌មានហិរញ្ញវត្ថុ និងសារព័ត៌មាន Bloomberg LP។ ជាមហាសេដ្ឋីវ័យ ៧៧ឆ្នាំ ជនជាតិអាមេរិករូបនេះ មានទ្រព្យសម្បត្តិសរុបរហូតដល់ជាង ៥៥ពាន់លានដុល្លារ។ មិនត្រឹមតែជាមហាសេដ្ឋីទេ លោក Bloomberg ក៏ជាអតីតអភិបាលក្រុងញូវយ៉កផងដែរ។ ពោលគឺលោក បានកាន់តំណែងចាប់ពី ២០០២ រហូតដល់ឆ្នាំ ២០១៣។ កាលនេះ លោកគឺជាបេក្ខជនគណបក្សសាធារណរដ្ឋ។ រហូតមកទល់ពេលនេះ លោកមហាសេដ្ឋី បានប្រកាសចូលប្រកួតប្រជែងក្នុងនាមបេក្ខជនបក្សប្រជាធិបតេយ្យ ដើម្បីដណ្តើមយកតំណែងជាប្រធានាធិបតីក្នុងឆ្នាំ២០២០ថែមទៀត។
៨. Mark Zuckerberg
លោក Mark Zuckerberg គឺជាបុគ្គលម្នាក់ ដែលមានប្រជាជនស្ទើរតែជុំវិញសកលលោក បានស្គាល់បុរសរូបនេះថា ជាអ្នកបង្កើតបណ្តាញសង្គម Facebook។ ជាមហាសេដ្ឋីវ័យ ៣៥ឆ្នាំ លោក Mark Zuckerberg គឺជានាយកប្រតិបត្តិ Facebook និងកាន់កាប់ទ្រព្យសម្បត្តិរហូតដល់ទៅជាង ៦២ពាន់លានដុល្លារឯណោះ។
៧. Larry Ellison
លោក Larry Ellison គឺជានាយកបច្ចេកវិទ្យា និងជាសហស្ថាបនិក ក្រុមហ៊ុន Oracle ចាប់តាំងពីឆ្នាំ ១៩៧៧ មក។ ក្នុងឆ្នាំ២០១៤ បុរសរូបនេះ បានបោះបង់ចោលតំណែងជានាយកប្រតិបត្តិ ប៉ុន្តែនៅតែរក្សាតំណែងជាសមាជិកក្រុមប្រឹក្សាភិបាលរបស់ក្រុមហ៊ុន Oracle ដដែល។ រហូតមកទល់ពេលនេះ លោក Larry ដែលមានវ័យ ៧៥ ឆ្នាំ បានកាន់កាប់ទ្រព្យសម្បត្តិរហូតដល់ទៅ ៦២,៥ពាន់លានដុល្លារ។ ក្រៅពីជាសមាជិកក្រុមប្រឹក្សាភិបាលក្រុមហ៊ុន Oracle ជនជាតិអាមេរិករូបនេះ ក៏សមាជិកក្រុមប្រឹក្សាភិបាល នៅក្នុងក្រុមហ៊ុនTesla ចាប់តាំងពីឆ្នាំ ២០១៨មក។
៦. Amancio Ortega
លោក Amancio Ortega គឺជាសហស្ថាបនិកក្រុមហ៊ុន Inditex ដែលជាក្រុមហ៊ុនលក់ ចែកចាយសំលៀកបំពាក់ដ៏ធំមួយ។ ក្នុងពេលបច្ចុប្បន្ន មហាសេដ្ឋីរូបនេះ មានទ្រព្យសម្បត្តិរហូតដល់ទៅ ៦២,៧ពាន់លានដុល្លារ។ មានវ័យ ៨៣ឆ្នាំ បុរសជនជាតិអេស្ប៉ាញរូបនេះ ក៏បានវិនិយោគផ្នែកអចលនវត្ថុ នៅក្នុងទីក្រុងម៉ាឌ្រីដ ទីក្រុងបាសេឡូណា ទីក្រុងឡុងដ៍ និងញូវយ៉កជាដើម។
៥. Carlos Slim
លោក Carlos Slim គឺជាអ្នកមានម្នាក់របស់ម៉ិកស៊ិក។ តាមរយៈការគ្រប់គ្រងលើក្រុមហ៊ុនបំរើសេវ៉ាទូរសព្ទដ៏ធំរបស់អាមេរិកឡាទីន America Movil បុរសវ័យ ៧៩ឆ្នាំរូបនេះ បានកាន់កាប់ទ្រព្យសម្បត្តិរហូតដល់ទៅ ៦៤ពាន់លានដុល្លារ។ ក្រៅពីក្រុមហ៊ុនទូរសព្ទ បុរសរូបនេះ ក៏មានភាគហ៊ុន នៅក្នុងក្រុមហ៊ុនសាងសង់ក្នុងប្រទេសម៉ិកស៊ិក ក្រុមហ៊ុនអចលនវត្ថុ និងក្រុមហ៊ុនផ្សេងៗទៀត។
៤. Bernard Arnualt
លោក Bernard Arnualt ជាបុរសដែលគេមិនសូវស្គាល់ឈ្មោះ ប៉ុន្តែភាគច្រើនគេស្គាល់ផលិតផល LV ឬ Louis Vuitton ជាង។ ជានាយកប្រតិបត្តិក្រុមហ៊ុនទំនិញប្រណីតៗ LVMH ឬ Moet Hennessy Louis Vuitton បុរសជនជាតិបារាំងរូបនេះ បានកាន់កាប់ទ្រព្យសម្បត្តិរហូតដល់ទៅ ៧៦ពាន់លានដុល្លារឯណោះ ខណៈពេលលោកមានវ័យ ៧០ឆ្នាំ។
៣. Warren Buffett
លោក Warren Buffett ត្រូវបានគេចាត់ទុកថា គឺជាអ្នកវិនិយោគដ៏ជោគជ័យជាទីបំផុត តាមរយៈបទពិសោធរបស់លោកកន្លងមក។ ត្រឹមតែអាយុ ១១ឆ្នាំតែប៉ុណ្ណោះ លោក Warren បានទិញហ៊ុនជាលើកដំបូង ហើយលោកបានបង់ពន្ធតាំងពីអាយុ ១៣ឆ្នាំមកម្លេះ។ បុរសវ័យ ៨៩ឆ្នាំរូបនេះ គឺជានាយកប្រតិបត្តិក្រុមហ៊ុន Berkshire Hathaway ដែលមានក្រុមហ៊ុនជាបុត្រសម្ពន្ធជាង ៦០ ក្នុងនោះមានចាប់ពី ក្រុមហ៊ុនថ្មពិល រហូតដល់ ភោជនីយដ្ឋាន។
ដោយសារតែមានក្រុមហ៊ុនជាច្រើននៅក្នុងដៃ បុរសសញ្ជាតិអាមេរិករូបនេះ បានគ្រប់គ្រងទ្រព្យសម្បត្តិរហូតដល់ទៅជាង ៨២ពាន់លានដុល្លារឯណោះ។ បើទោះបីជាមានមែន ប៉ុន្តែលោកមិនទុកលុយឲ្យគរចោលទេ។ ក្នុង២០១៩នេះ លោកបានបរិចាគទឹកប្រាក់ ៣,៦ពាន់លានដុល្លារចូលមូនិធិ Bill and Melinda Gates របស់មហាសេដ្ឋីលំដាប់ទីពីរ Bill Gates។
២. Bill Gates
Bill Gates បុរស ដែលត្រូវបានទទួលស្គាល់ពីសំណាក់ក្មេងៗ រហូតដល់មនុស្សចាស់ថាជាអ្នកមានលំដាប់ពិភពលោក។ លោក Bill Gate គឺជាសហស្ថាបនិក ក្រុមហ៊ុន Microsoft និងមូលនិធិ Bill & Melinda Gates។ មូលនិធិនេះ ត្រូវបានបុរសវ័យ៦៤ឆ្នាំរូបនេះ បង្កើតឡើង ក្នុងគោលបំណងកែលម្អសុខភាពប្រជាជនទូទាំងសកលលោក។ ត្រូវបានគេស្គាល់ថាម្ចាស់ក្រុមហ៊ុន Microsoftមែន ប៉ុន្តែលោកមានភាគហ៊ុនត្រឹមតែ ១ភាគរយប៉ុណ្ណោះ ព្រោះលោកបានបរិចាគ និងលក់ស្ទើរតែអស់ទៅហើយ។ ជាអ្នកមានចិត្តធម៌ Bill Gate បានកាន់កាប់ទ្រព្យសម្បត្តិជាង ៩៦ពាន់លានដុល្លារឯណោះ។
១. Jeff Bezos
លោក Jeff Bezos បុរសដែលមនុស្សជាច្រើនមិនសូវចាំឈ្មោះ ប៉ុន្តែស្គាល់ក្រុមហ៊ុន។ Amazon គឺជាក្រុមហ៊ុន ដែលគេស្គាល់ស្ទើរតែពេញពិភពលោក ត្រូវបានបង្កើតដោយបុរសម្នាក់នេះ និងដៃគូរបស់គាត់ផ្សេងទៀត។ គ្រាន់តែក្រុមហ៊ុនAmazon លោក Jeff Bezos បានកើបលុយជាង ២៣០ពាន់លានដុល្លារ(ប្រាក់ចំណូល) ដែលរកប្រាក់ចំណេញបានរហូតដល់ទៅ ១០ពាន់លានដុល្លារ ក្នុងឆ្នាំ ២០១៨។ ដោយសារតែជានាយកប្រតិបត្តិ និងជាសហស្ថាបនិក ក្រុមហ៊ុន Amazon បុរសវ័យ ៥៥ឆ្នាំរូបនេះ មានទ្រព្យសម្បត្តិរហូតដល់ទៅ១៣១ពាន់លានដុល្លារឯណោះ៕
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
