អន្តរជាតិ
×![]()
ដោយ: ធីតា
ឧទ្ធម្ភាគចក្រទេសចរណ៍មួយគ្រឿង បានបង្ខំចិត្តចុះចតដោយសារបញ្ហាបច្ចេកទេសនៅលើផ្លូវរថភ្លើងមួយក្នុងក្រុងហូលីវូដ រដ្ឋឡូសអេនជឺលែស សហរដ្ឋអាម៉េរិក កាលពីពេលថ្មីៗកន្លងមកនេះ។ អ្នកបើកបរឧទ្ធម្ភាគចក្របានរងរបួស ប៉ុន្តែសំណាងរួចផុតជីវិត ដោយប៉ូលិសបានជួយសង្គ្រោះ តែប៉ុន្មានវិនាទីប៉ុណ្ណោះ ក្រោយរថភ្លើងក្នុងល្បឿនដ៏លឿនឆ្លងកាត់។
រូបភាពវីដេអូមួយត្រូវបានផ្សព្វផ្សាយនៅលើបណ្តាញសង្គម Twitter ដោយមនុស្សមួយចំនួនយល់ច្រឡំថា ជាការថតកុន។ រូបភាពបង្ហាញពីសកម្មភាពក្រុមប៉ូលិសជួយសង្គ្រោះអ្នកបើកបរឧទ្ធម្ភាគចក្រម្នាក់ ដែលរងរបួស និងឈាមពេញមុខ ដោយសារឧទ្ធម្ភាគចក្រ បានចុះចតដោយបង្ខំនៅលើផ្លូវរថភ្លើងដោយសារបញ្ហាបច្ចេកទេស។
ប៉ុន្តែអ្វីដែលគួរឲ្យរីករាយគឺ ក្រុមប៉ូលិសបានជួយសង្គ្រោះ បុរសវ័យប្រមាណ៧០ឆ្នាំរូបនោះ គេចផុតពីគ្រោះថ្នាក់មួយទៀត ពោលគឺ៥វិនាទីប៉ុណ្ណោះ មុនពេលដែលរថភ្លើងបានឆ្លងកាត់។ នេះបើតាមវីដេអូ បង្ហោះនៅលើ Twitter របស់ប៉ូលិសមូលដ្ឋាន LAPD HG-Foothill Division Officers។
ប៉ូលិសម្នាក់ឈ្មោះ Robert Sherock បាននិយាយប្រាប់ NBC ថា៖ «ខ្ញុំគិតថា ករណីនេះ អាចយកទៅទិញឆ្នោតបាន ព្រោះគាត់បានរួចផុតពីគ្រោះថ្នាក់ដល់ជីវិត២លើកក្នុងគម្លាតពីគ្នាត្រឹម១០នាទី។
តាមរបាយការណ៍ អ្នកបើកបរឧទ្ធម្ភាគចក្រ ត្រូវបានបញ្ជូនទៅកាន់មន្ទីរពេទ្យ កាលពីចុងសប្តាហ៍កន្លងមក ប៉ុន្តែស្ថានភាពសុខភាពមិនមានលក្ខណៈធ្ងន់ធ្ងរនោះឡើយ៕
© រក្សាសិទ្ធិដោយ thmeythmey.com
