លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងអំពីការរៀបចំបញ្ជីត្រៀមនេះ ក្នុងសន្និបាតបូកសរុបការងារវប្បធម៌ និងវិចិត្រសិល្បៈឆ្នាំ២០២១ និងលើកទិសដៅការងារសម្រាប់ឆ្នាំ២០២២ កាលពីថ្ងៃទី៩ ខែកុម្ភៈ ឆ្នាំ២០២២ នៅសាលសន្និសីទចតុម្មុខ។
 

លោកស្រី សកុណា បញ្ជាក់ថា សម្បត្តិវប្បធម៌ ដែលមានសក្ដានុពល គ្រោងស្នើសុំចុះបញ្ជីបេតិកភណ្ឌទៅអង្គការយូណេស្កូ រួមមាន ក្រុមប្រាសាទបន្ទាយឆ្មារ ក្រុមប្រាសាទបេងមាលា ក្រុមប្រាសាទព្រះខ័នកំពង់ស្វាយ រមណីយដ្ឋានគូលែន  រមណីយដ្ឋានអង្គរបុរីនិងភ្នំដា រមណីយដ្ឋានឧដុង្គ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក អតីតមន្ទីរឃុំឃាំង ម-១៣ និងព្រះរាជពិធីបុណ្យអុំទូក។
  

ទោះជាយ៉ាងណា ក្រសួងវប្បធម៌ក៏បានបន្តរៀបចំ និងសហការរៀបចំឯកសារ ដើម្បីស្នើសុំចុះបញ្ជីសម្បត្តិវប្បធម៌មួយចំនួនទៀត ទៅអង្គការយូណេស្កូផងដែរ។ រដ្ឋមន្ត្រីក្រសួងវប្បធម៌ បញ្ជាក់ថា៖«យើងក៏បានបន្តរៀបចំ និងសហការរៀបចំឯកសារ ស្នើសុំចុះ ប្រាសាទកោះកេរ នំបញ្ចុក ក្បាច់គុនល្បុកក្កតោ និងទីក្រុងបាត់ដំបង ទៅក្នុងបញ្ជីបេតិកភណ្ឌពិភពលោក បញ្ជីបេតិកភណ្ឌវប្បធម៌អរូបីនៃមនុស្សជាតិ និងបណ្ដាញទីក្រុងដែលមានភាពច្នៃប្រឌិត(Creative Cities Network) របស់អង្គការយូណេស្កូផងដែរ»៕