ភ្នំពេញ៖ រូបថតលោក ហ៊ុន ម៉ានី និងសារជូនពរ បានហោះអណ្ដែតនៅលើបណ្ដាញសង្គមហ្វេសប៊ុក សារព័ត៌មាន និង ឆានែលតេឡេក្រាមយ៉ាងព្រោងព្រាត តាំងពីព្រឹកថ្ងៃទី២១ខែកុម្ភៈនេះ។
មកដល់ថ្ងៃទី២១ កុម្ភៈនេះ មានរយៈពេល៦ខែហើយ ដែលលោក ហ៊ុន ម៉ានី កាន់តំណែងជារដ្ឋមន្រ្តីក្រសួងមុខងារសាធារណៈ។ កន្លះឆ្នាំក្នុងតំណែងជារដ្ឋមន្រ្តីក្រសួងមុខងារសាធារណៈ លោក ហ៊ុន ម៉ានី បានដឹកនាំការរៀបចំការប្រឡងជ្រើសរើសមន្រ្តីរាជការ ចំនួន២លើកយ៉ាងលេចធ្លោផងដែរ ក្នុងចំណោមសកម្មភាពកំណែទម្រង់ផ្សេងទៀត។
នៅលើបណ្ដាញសង្គម គេសង្កេតឃើញមានការបង្ហោះសារអបអរសាទរ ដល់លោក ហ៊ុន ម៉ានី យ៉ាងច្រើន។ ម្ចាស់គណនីហ្វេសប៊ុកឈ្មោះ Ide Jep បានបង្ហោះរូបភាពលោក ហ៊ុន ម៉ានី ជាមួយពលរដ្ឋចាស់ក្មេងចំនួន ៤សន្លឹក អមជាមួយពាក្យពេចន៍ដូច្នេះ៖«បងប្រធាន ជាតំណាងឱ្យក្ដីសង្ឃឹម ស្នាមញញឹម ការជឿជាក់ និងសុទិដ្ឋិនិយមរបស់ពួកយើងទាំងអស់គ្នា! សូមអបអរសាទរបងប្រធាន ប្រកបដោយក្ដីរំភើបបំផុត!»។
សម្រាប់លោក យ៉ាន សុភ័ណ្ឌ ជាពលរដ្ឋម្នាក់ រៀបរាប់អារម្មណ៍រំភើបដែល លោក ហ៊ុន ម៉ានី ក្លាយជាឧបនាយករដ្ឋមន្រ្តី។ យុវជនរូបនេះ បរិយាយថា៖ «ក្នុងនាមខ្ញុំផ្ទាល់ តំណែងជា «ឧបនាយករដ្ឋមន្ត្រី» នេះពិតជាស័ក្តិសមបំផុតចំពោះបងប្រធាន ដែលបងប្រធានត្រូវតែទទួលបាន និងទទួលបានភាពជោគជ័យបន្ថែមទៀតនាពេលអនាគត ដើម្បីបុព្វហេតុជាតិមាតុភូមិរបស់ប្រទេសជាតិយើង និងយុវជនជំនាន់ក្រោយ។ ប្រទេសជាតិយើង ពិតជាត្រូវការថ្នាក់ដឹកនាំប្រកបដោយកិត្តិបណ្ឌិតដូចជា បងប្រធាន»។
គ្រូពេទ្យស្ម័គ្រចិត្តម្នាក់ ដែលមានឈ្មោះថា លេង ផាលី បានបង្ហាញអារម្មណ៍ត្រេកអរចំពោះលោក ហ៊ុន ម៉ានី ដោយបានសរសេរសារអបអរសាទរ និងជូនពរ។ មិនខុសពីគ្រូពេទ្យស្ម័គ្រចិត្តនោះទេ លោក ឌី ពុទ្ធារិទ្ធ ជាមន្រ្តីរាជការមួយរូប ក៏បានបង្ហោះសារអបអរអមជាមួយរូបភាព លោក ហ៊ុន ម៉ានីផងដែរ។
កីឡាករជម្រើសជាតិបាល់ទាត់ ចាន់ វឌ្ឍនាកា ក៏បានបង្ហាញការសាទរចំពោះការតែងតាំងលោក ហ៊ុន ម៉ានី ជាឧបនាយករដ្ឋមន្ត្រីនេះដែរ។ ក្នុងក្រសែភ្នែកកីឡាកររូបនេះ លោក ហ៊ុន ម៉ានី គឺស័ក្តិសមសម្រាប់តំណែងនេះ។ «បងពិតជាស័ក្តិសម ពួកយើងជឿជាក់លើការដឹកនាំរបស់បងប្រធាន»។ នេះជាទំនុកចិត្តរបស់កីឡាករជម្រើសជាតិបាល់ទាត់ ចាន់ វឌ្ឍនាកា លើលោក ហ៊ុន ម៉ានី។
ចំណែកកីឡាករបាល់ទះអង្គុយជនពិការ លោក ប៉ុន ឌីណា ក៏បានសរសេរជូនពរលោក ហ៊ុន ម៉ានី បែបនេះ៖«សូមជូនពរ ឯកឧត្ដម មានសុខភាពល្អ កម្លាំងមាំមួន ដើម្បីជាម្លប់ដល់ប្រតិភូ គ្រូបង្វឹកអត្តពលិកប៉ារ៉ាឡាំពិកកម្ពុជា និងជួបតែសំណាងល្អ»។
ក្រៅពីអបអរ និងជូនពរដល់ ហ៊ុន ម៉ានី យុវតីម្នាក់ឈ្មោះ Chorrnay Neangtulay យល់ឃើញថា ការតែងតាំងជាឧបនាយករដ្ឋមន្រ្តី សបញ្ជាក់ពីស្នាដៃយ៉ាងពិតប្រាកដ។ «ការផ្តល់ទំនុកចិត្តនេះ សបញ្ជាក់ពីស្នាដៃ សកម្មភាព និងស្មារតីនៃកិច្ចខិតខំប្រឹងប្រែងរបស់ បងប្រធាន ដែលបានចូលរួមចំណែកបម្រើផលប្រយោជន៍ជាតិ មាតុភូមិ និងប្រជាជន»។ នេះជាសំណេររបស់យុវតីខាងលើ ភ្ជាប់ជាមួយរូបភាពនាងជាមួយលោក ហ៊ុន ម៉ានី។
សារអបអរចំពោះការតែងតាំងលោក ហ៊ុន ម៉ានី ក៏ត្រូវបានបង្ហោះចេញពីគណនីហ្វេសប៊ុកឈ្មោះ Reaksmey Yean ដែលគេជាស្គាល់ថាជារបស់សិល្បករសហសម័យដែរ។ លោក យ៉ាន រស្មី ក៏សង្ឃឹមដែរថា ក្នុងតួនាទីនេះនឹងជួយឱ្យជំរុញកំណែទម្រង់រដ្ឋបាលសាធារណៈកាន់តែប្រសើរ។ លោក យ៉ាន រស្មី បញ្ជាក់ដូច្នេះ៖ «សូមឱ្យបេសកកម្ម ក្នុងការជំរុញការកំណែទម្រង់, ការពង្រឹងរដ្ឋបាលសាធារណៈ និង ការធ្វើទំនើបកម្មស្ថាប័នសាធារណៈ បានសមប្រកប»។
សូមបញ្ជាក់ថា សម័យប្រជុំដែលដឹកនាំដោយសម្តេច ឃួន សុដារី ប្រធានរដ្ឋសភា មានវត្តមានអ្នកតំណាងរាស្ត្រចំនួន១២០នាក់ បានបោះឆ្នោតផ្តល់សេចក្តីទុកចិត្តលើការតែងតាំងបំពេញបន្ថែមសមាសភាពរាជរដ្ឋាភិបាល។ លោក ហ៊ុន ម៉ានី បច្ចុប្បន្នជារដ្ឋមន្ត្រីមុខងារសារធារណៈ ត្រូវបានផ្តល់សេចក្តីទុកចិត្តតែងតាំងជាឧបនាយករដ្ឋមន្ត្រី៕