យោងតាមសេចក្ដីប្រកាសរបស់សហព័ន្ធ លើហ្វេសប៊ុកកាលពីថ្ងៃទី២៧ ខែមីនា ឆ្នាំ២០២៤ ក្នុងចំណោមអត្តពលិកបានជាប់ជម្រើសជាតិកីឡាទូកកានូ និងរ៉ូអ៊ីងកម្ពុជា មានកីឡាការិនី៦នាក់ និងកីឡាករ២០នាក់។
 

លោក គង់ សុភាព បានបញ្ជាក់ប្រាប់សារព័ត៌មានថ្មីៗ តាមតេលេក្រាមថា អត្ដពលិក ទាំង២៦រូបនោះ ឆ្លងកាត់ការធ្វើតេស្ដចំនួន៥វិញ្ញាសា បានយ៉ាងល្អ។ លទ្ធផលរបស់អ្នកទាំងនោះ អាចបញ្ជាក់ថាពួកគេ គួរតែត្រូវបានជ្រើសរើសជាប់ជាជម្រើសជាតិ សម្រាប់ហ្វឹកហាត់បន្ថែម និងត្រៀមសម្រាប់ព្រឹត្តិការណ៍អន្ដរជាតិនានា រួមទាំងស៊ីហ្គេម។
 

«យើង ធ្វើតេស្ដជ្រើសកីឡាករ-កីឡាការិនី ដែលមានសមត្ថភាព ដើម្បីហ្វឹកហាត់បន្ថែម និងត្រៀមប្រកួតព្រឹត្តិការណ៍អន្ដរជាតិនានា។»។ មន្ដ្រីបច្ចេកទេសរូបនេះ បាននិយាយដូច្នេះ។
 

ការធ្វើតេស្ដទាំង៤វិញ្ញាសានោះ មានដូចជា៖ អាវ៉ង់ (Push Up), ដូមីណូ (Abdominal Muscle), រត់ចម្ងាយ ​២គីឡូម៉ែត្រ, ឡើងរបាហ្វិច (Chin-Up), ទាញម៉ាស៊ីនរ៉ូអ៊ីង (Rowing Machine) និងពិនិត្យសុខភាពដោយក្រុមវិជ្ជបណ្ឌិត។
 

ដោយឡែកការប្រមូលផ្ដុំហ្វឹកហាត់របស់ក្រុមជម្រើសទាំងនោះ នឹងត្រូវធ្វើចាប់ពីថ្ងៃទី២២ ខែមេសា ឆ្នាំ២០២៤ ដល់ថ្ងៃទី១៥ ខែវិច្ឆិកា ឆ្នាំ២០២៤៕