ក្រសួងធនធានទឹក បញ្ជាក់ទៀតថា នៅក្នុងរយៈពេល៣ថ្ងៃដដែលនេះ នៅតំបន់វាលទំនាប ក៏មានខ្យល់បក់មកពីទិសអាគ្នេយ៍ និងនិរតី មានល្បឿនមធ្យម ២,៥ម៉ែត្រ ក្នុងមួយវិនាទី និងខ្យល់កន្ត្រាក់គ្របដណ្ដប់លើផ្ទៃដី១៤ភាគរយ នៃផ្ទៃដីសរុបក្នុងតំបន់នេះ។ ចំពោះសីតុណ្ហភាពអប្បបរមា២៦អង្សា និងអតិបរមា៣៨អង្សា។
 

ចំណែកតំបន់ខ្ពស់រាបវិញ ខ្យល់បក់មកពីទិសបស្ចិម និងនិរតី មានល្បឿនមធ្យម ២,៥ម៉ែត្រក្នុងមួយវិនាទី និងខ្យល់កន្ត្រាក់គ្របដណ្ដប់លើផ្ទៃដី២០ភាគរយ។សីតុណ្ហភាព អប្បបរមានៅតំបន់នេះគឺ២៦អង្សា និងអតិបរមា៣៩អង្សា។ នេះបើតាមក្រសួងធនធានទឹក ដែលបានឱ្យដឹងទៀតថា នៅតំបន់មាត់សមុទ្រ គឺខ្យល់បក់មកពីទិសនិរតី មានល្បឿនមធ្យម២.៥ម៉ែត្រ ក្នុងមួយវិនាទី និងខ្យល់កន្ត្រាក់គ្របដណ្ដប់លើផ្ទៃដី២០ភាគរយ។
 

រលកសមុទ្រវិញ មានកម្ពស់មធ្យមអប្បបរមា ០,៥ម៉ែត្រ និងកម្ពស់មធ្យមអតិបរមា ១,៥ម៉ែត្រ។ ឯសីតុណ្ភភាពអប្បបរមា២៦អង្សា និងអតិបរមា៣៩អង្សា។ 

គួររំលឹកដែរថា នៅក្នុងរដូវប្រាំងឆ្នាំ២០២៤នេះ កម្ពុជាបានជួបប្រឈមនឹងអាកាសធាតុក្តៅខ្លាំងក្នុងរង្វង់ ៤០-៤២អង្សា ដែលបានអូសបន្លាយរយៈពេលយូរ ពុំធ្លាប់មាន។ ទូទាំងប្រទេស ស្ទើរតែគ្មានភ្លៀងកក់ខែទាល់តែសោះ។ រហូតដល់ដើមរដូវវស្សានេះ ពោលគីនៅថ្ងៃទី៣ និងទី៤ ខែឧសភានេះប៉ុណ្ណោះ ទើបរាជធានីភ្នំពេញ និងបណ្តាខេត្តមួយចំនួន មានភ្លៀងធ្លាក់ ខណៈ ខេត្ត និងតំបន់មួយចំនួន ពុំទាន់មានភ្លៀងធ្លាក់នៅឡើយ៕