អន្តរជាតិ
នយោបាយអន្តរជាតិ
ប៉ាឡេស្ទីនប្តឹងអ៊ីស្រាអែលពីបទឧក្រិដ្ឋសង្គ្រាមទៅICCក្នុងខែមេសា
×
ប៉ាឡេស្ទីនប្រកាសថាខ្លួនមិនបង្អែរបង្អង់យូរឡើយក្នុងការរៀបចំដាក់ពាក្យបណ្តឹងទៅកាន់តុលាការព្រហ្មទណ្ឌអន្តរជាតិដើម្បីប្រឆាំងរដ្ឋាភិបាលអ៊ីស្រាអែលក្នុងសំណុំរឿងកាហ្សា។ ប៉ាឡេស្ទីននឹងដាក់ពាក្យបណ្តឹងនោះនៅថ្ងៃ ១មេសាខាងមុខនេះ ដើម្បីអោយតុលាការពិចារណាលើបញ្ហាបទឧក្រិដ្ឋសង្គ្រាមនៅក្នុងតំបន់កាហ្សា ប៉ុន្តែលទ្ធភាពនៃការបើកដំណើរការសំណុំរឿងនៅតែស្រពិចស្រពិលនៅឡើយ។
កញ្ញា ខន ចំប៉ា លម្អិតព័ត៌មាននេះ
មន្ត្រីជាន់ខ្ពស់អាជ្ញាធរប៉ាឡេស្ទីនបានប្រកាសថា រដ្ឋាភិបាលប៉ាឡេស្ទីនត្រៀមខ្លួនរួចរាល់ហើយដើម្បីរៀបចំពាក្យបណ្តឹងប្រឆាំងអ៊ីស្រាអែលទៅកាន់តុលាការព្រហ្មទណ្ឌអន្តរជាតិ។ បណ្តឹងប៉ាឡេស្ទីនដែលនឹងត្រូវរៀបចំឡើងនាខាងមុខនេះទាក់ទងនឹងបទឧក្រិដ្ឋប្រឆាំងមនុស្សជាតិដែលបង្កឡើងដោយអ៊ីស្រាអែលនៅក្នុងទឹកដីកាហ្សាកាលពីឆ្នាំ ២០១។
បើតាមការអោយដឹងពីមន្ត្រីជាន់ខ្ពស់ខាងលើ អ៊ីស្រាអែលនឹងបញ្ចប់ការរៀបចំបណ្តឹងនេះនៅត្រឹមថ្ងៃទី១ខែមេសាខាងមុខ ដើម្បីជំរុញអោយតុលាការត្រួតពិនិត្យសំណុំរឿងនេះ និងចាប់ផ្តើមនីតិវិធីដើម្បីឈានទៅនាំយកឧក្រិដ្ឋជនមកកាត់ទោសតាមផ្លូវច្បាប់។ អាជ្ញាធរប៉ាឡេស្ទីនហាក់មិនចង់បង្អែរបង្អង់យូរឡើយ ដោយអាជ្ញាធរនេះសង្ឃឹមថា តុលាការអាចនឹងនាំយកមេដឹកនាំ និងកងទ័ពអ៊ីស្រាអែលយកកាត់ទោស។
ការដាក់ពាក្យបណ្តឹងប្រឆាំងអ៊ីស្រាអែលពិតជាធ្វើអោយអ៊ីស្រាអែលខឹងសម្បារជាខ្លាំង ហើយអ៊ីស្រាអែលអះអាងថាទង្វើប៉ាឡេស្ទីននឹងធ្វើអោយមានការប្រឈមមុខដាក់កាន់តែខ្លាំង ព្រមទាំងធ្វើអោយភាគីទាំងពីរបរាជ័យក្នុងការស្វែងរកសន្តិភាព។
កាលពីឆ្នាំមុនក្រោយប៉ាឡេស្ទីនចុះហត្ថលេខាចូលរួមជាសមាជិកនៃតុលាការព្រហ្មទណ្ឌអន្តរជាតិ នាយករដ្ឋមន្ត្រីអ៊ីស្រាអែលប្រកាសថា លោកមិនអនុញ្ញាតអោយតុលាការ យកកងទ័ពអ៊ីស្រាអែលទៅកាត់ទោសនោះឡើយ។ អ៊ីស្រាអែលនឹងធ្វើគ្រប់បែបយ៉ាងដើម្បីរាំងរាំងដំណើរការតុលាការព្រហ្មទណ្ឌអន្តរជាតិ ដែលនឹងអាចបើកការស៊ើបអង្កើត និងដំណើរការនីតិវិធីក្នុងសំណុំរឿងសង្គ្រាមកាហ្សា។
តាមពិតទៅប៉ាឡេស្ទីនសម្រេចដាក់បណ្តឹងប្រឆាំងអ៊ីស្រាអែល ក្រោយពេលអាជ្ញាធរប៉ាឡេស្ទីនចុះហត្ថលេខាលើសំណុំឯកសារចូលជាសមាជិកតុលាការព្រហ្មទណ្ឌអន្តរជាតិ។ ប៉ាឡេស្ទីនសម្រេចចូលរួមជាមួយតុលាការព្រហ្មទណ្ឌអន្តរជាតិ ក្រោយពេលដែលប៉ាឡេស្ទីនខកចិត្តចំពោះចំណាត់ការរបស់ក្រុមប្រឹក្សាសន្តិសុខអង្គការសហប្រជាជាតិ ក្នុងការអនុម័តដំណោះស្រាយស្តីពីការទទួលស្គាល់រដ្ឋប៉ាឡេស្ទីនជាផ្លូវការ។
ក្រុមប្រឹក្សាសន្តិសុខបានប្រជុំអនុម័តដំណោះស្រាយស្នើឡើងដោយប៉ាឡេស្ទីន និងប្រទេសតំបន់អារ៉ាប់ ដោយដំណោះស្រាយផ្តោតការទទួលស្គាល់រដ្ឋប៉ាឡេស្ទីន និងទាមទារអោយអ៊ីស្រាអែលដកកងទ័ពចេញពីទឹកដីប៉ាឡេស្ទីនដើម្បីកសាងសន្តិភាព។ ប៉ុន្តែគួរអោយសោកស្តាយក្រុមប្រឹក្សាសន្តិសុខ បរាជ័យកាលដោយយសារតែសមាជិកអចិន្ត្រៃយ៍នៃក្រុមប្រឹក្សានេះ គឺសហរដ្ឋអាមេរិកបានប្រើប្រាស់សិទ្ធិជំទាស់របស់ខ្លួនប្រឆាំងដំណោះស្រាយ។
គួរបញ្ជាក់ថាកាលពីខែមិថុនា កងកម្លាំងអ៊ីស្រាអែលបានបើកការវាយប្រហារតាមផ្លូវអាកាសរយៈពេលប្រហែល ៧សប្តាហ៍ប្រឆាំងនឹងក្រុមហាម៉ាស ប៉ុន្តែជនស៊ីវិលប្រហែល២ពាន់នាក់ត្រូវបានសម្លាប់ដោយសារសង្គ្រាមផ្លូវអាកាសរបស់អ៊ីស្រាអែលនេះ។
© រក្សាសិទ្ធិដោយ thmeythmey.com