ជាតិ
នយោបាយជាតិ
CPP និង CNRP ថា សេចក្ដីព្រាងច្បាប់ថ្មី នឹងធានាអព្យាក្រឹតភាពក្នុងការបោះឆ្នោត
×
ក្រុមការងារវិសោធនកម្មច្បាប់ទាំងពីរបានអះអាងថា សេចក្ដីព្រាង សេចក្ដីស្នើច្បាប់ ស្ដីពីការរៀបចំការបោះឆ្នោត និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត សេចក្ដីព្រាងសេចក្ដីស្នើច្បាប់ ស្ដីពីការបោះឆ្នោតជ្រើសតាំងតំណាងរាស្ត្រ ដែលបានកំណែទម្រង់ថ្មីនៅពេលនេះ គឺមានភាពល្អប្រសើរច្រើនជាងច្បាប់ចាស់ ។ ហើយច្បាប់នេះគឺអាចធានាឲ្យគជប មានឯករាជ្យ និងអព្យាក្រឹតភាព ស្របតាមលទ្ធិប្រជាធិបតេយ្យ ។
ថ្លែងនៅក្នុងសិក្ខាសាលាថ្នាក់ជាតិ លោក កើត រិទ្ធ ក្រុមការងារកំណែទម្រង់គណបក្សប្រជាជនកម្ពុជា បញ្ជាក់ថា កំណែទម្រង់ច្បាប់ គ.ជ.ប ថ្មីនេះ គឺធានាបានថា គជប មានឯករាជ្យ និងអព្យាក្រឹតភាព ធានាឲ្យមានដំណើរការប្រព្រឹត្តទៅស្របតាមគោលការណ៍លទ្ធិប្រជាធិបតេយ្យ ព្រមទាំងអាចធានាឲ្យ គជប នេះ គ្មានភាពជាប់គាំង« សមាជិកគជប ដើម្បីឲ្យមានភាពអព្យាក្រឹតត្រូវលាលែងពីនយោបាយ ។គោលការណ៍លទ្ធិប្រជាធិបតេយ្យរបស់គជប គឺត្រូវគោរពយកសំឡេងភាគច្រើនដាច់ខាត ឬសំឡេង២ភាគ៣ ចៀសវាងការជាប់គាំងគជប ។ ហើយដើម្បីដោះស្រាយភាពជាប់គាំងគជបសម្រេចយករូបមន្ត៤ + ៤ +។ បើសិនជាខ្វះកូរ៉ុមដំណើរការគជប មិនបាន ខ្វះសំឡេងមិនអាចអនុម័តក្នុងបញ្ហាណាមួយបាន ក្នុងច្បាប់នេះ យើងចែងថា រដ្ឋសភាមានសិទ្ធិរំសាយ គជប ជាប់គាំង និងបង្កើតគជបថ្មីមួយមិនជាប់គាំង» ។ នេះជាការបញ្ជាក់របស់លោក កើត រិទ្ធិ។
ក្នុងមាត្រា ១៣ សេចក្ដីព្រាង សេចក្ដីស្នើច្បាប់ ស្ដីពីការរៀបចំការបោះឆ្នោត និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត មានបញ្ជាក់ថា ប្រធាន អនុប្រធាន និងសមាជិកគណៈកម្មាធិការជាតិរៀបចំការបោះឆ្នោត ត្រូវអនុវត្តតួនាទីរបស់ខ្លួនដោយមិនលំអៀង ឈរលើគោលការណ៍គោរពច្បាប់ ។ ហើយមិនទទួលការគាបសង្កត់ ការគំរាមកំហែង ការបំភិតបំភ័យ ការបង្គាប់បញ្ជាដោយផ្ទាល់ ឬដោយប្រយោល ពីបុគ្គល និងស្ថាប័នណាមួយឡើយ។
ទន្ទឹមនឹងនេះលោក អេង ឆៃអៀង ក្រុមការងារគណបក្សសង្គ្រោះជាតិ យល់ថា សេចក្ដីព្រាងច្បាប់ថ្មីនេះ គឺមានភាពល្អប្រសើរច្រើនជាងច្បាប់ចាស់ ។ ហើយលោកថា បើសិនជាសេចក្ដីព្រាងច្បាប់ទាំងពីរនេះ មានការអនុវត្តប្រកបដោយសេរី និងយុត្តិធម៌នោះ គឺប្រាកដជាមិនមានភាពជាប់គាំងនយោបាយនោះទេ។ លោកបន្ថែមថា ៖ «បើយើងបានព្រមព្រៀងគ្នាលើច្បាប់នេះហើយ ហើយការអនុវត្តច្បាប់នេះពេញលក្ខណៈទាំងធម្មនុញ្ញ ទាំងគោលការណ៍លទ្ធិប្រជាធិបតេយ្យនោះ ដូច្នេះគ្មានហេតុផលអ្វីដែលគណបក្សនយោបាយធ្វើពហិការមិនទទួលយកអសនៈនោះទេ»។
ជាមួយគ្នាលោក គួយ ប៊ុនរឿន ប្រធានក្រុមការងារគណបក្សសង្គ្រោះជាតិ បានបញ្ជាក់ថា លោកនឹងបូកសរុបរបាយការណ៍ជូនថ្នាក់ដឹកនាំ ដើម្បីពិនិត្យពិចារណាបន្ថែមទៀត នៅក្នុងក្របខណ្ឌបរិបទច្បាប់ នៃប្រទេសកម្ពុជា។
នៅក្នុងសិក្ខាសាលាថ្នាក់ជាតិនេះ មានបណ្ដាលស្ថានទូត អង្គការ សកម្មជនគណបក្ស និងអ្នកនយោបាយចំនួន៤៩៥នាក់ ដោយមានការចោទសួរប្រមាណជា៩០សំនួរនិងមានការបង្ហាញពីកង្វល់របស់ពួកគេទាក់ទងនឹងសេចក្ដីព្រាងច្បាប់ទាំងនេះ នៅក្នុងសិក្ខាសាលាផងដែរ។ តែយ៉ាងណាក៏ដោយក្រុមការងារគណបក្សទាំងពីរ អះអាងថាសេចក្ដីព្រាងច្បាប់ទាំងនេះ នឹងអាចធ្វើឲ្យដំណើរការនៃការបោះឆ្នោតនៅអណត្តិក្រោយមានភាពរលូននិងមិនជាប់គាំង។
គួរបញ្ជាក់ថា ក្រុមការងារនៃគណបក្សទាំងពីរ បានជួបពិភាក្សាគ្នាចំនួន១៥លើក ចាប់ពីថ្ងៃទី១១ សីហា ២០១៤ ហើយបានរៀបចំសេចក្ដីព្រាងសេចក្ដីស្នើច្បាប់ស្ដីពីការរៀបចំនិងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតនេះ បានចប់រួចរាល់ហើយកាលពីថ្ងៃទី៨ ខែធ្នូ ឆ្នាំ២០១៤ ។ ដោយច្បាប់នេះចែកចេញជា៧ជំពូក និងរួមមាន៦៦មាត្រា ។
ចំណែកសេចក្ដីព្រាងសេចក្ដីស្នើច្បាប់ស្ដីពីការបោះឆ្នោតជ្រើសតាំងតំណាងរាស្ត្រ ក្រុមការងារនៃគណបក្សទាំងបានជួបប្រជុំពិភាក្សាគ្នាចំនួន ២៧លើក ចាប់តាំងពីថ្ងៃទី១២ ខែធ្នូ ឆ្នាំ២០១៤ បានបញ្ចប់កាលពីថ្ងៃទី០៦ មីនា ឆ្នាំ២០១៥នេះ ។ សេចក្ដីព្រាងច្បាប់នេះចែកចេញជា ១២ជំពូក និងរួមមាន១៧១មាត្រា ៕
© រក្សាសិទ្ធិដោយ thmeythmey.com