ជាតិ
EDCផ្អាកផ្គត់ផ្គង់អគ្គិសនី៤ថ្ងៃតាមពេលវេលា និងកន្លែងផ្សេងគ្នានៅភ្នំពេញនិងខេត្តកណ្តាល
×
អគ្គិសនីកម្ពុជានឹងផ្អាកការផ្គត់ផ្គង់អគ្គិសនីនៅតំបន់ភ្លើងមួយចំនួន តាមពេលវេលានិងទីកន្លែងផ្សេងគ្នា រយៈពេល៤ថ្ងៃ ចាប់ពីថ្ងៃទី៧ដល់ថ្ងៃទី១០ខែឧសភាឆ្នាំ២០១៥ ។ ការផ្អាកផ្គត់ផ្គង់អគ្គិសនីនេះ ត្រូវបានប្រកាសនៅក្នុងសេចក្តី ជូនដំណឹងរបស់អគ្គិសនីកម្ពុជាEDC។
សេចក្តីដំណឹងចុះថ្ងៃទី៤ខែឧសភា បានឲ្យដឹងថាការផ្អាកការផ្គត់ផ្គង់អគ្គិសនីនេះ គឺដើម្បីសម្រួលដល់ការអនុវត្តការងារជួលជុល ផ្លាស់ប្តូរ តម្លើងបរិក្ខារ និងរុះរើគន្លងខ្សែបណ្តាញបង្កលក្ខណៈងាយស្រួលដល់ការដ្ឋានពង្រីកផ្លូវ។
បើតាមសេចក្តីជូនដំណឹង ចាប់ពីម៉ោង៩ព្រឹក ដល់ម៉ោង៤រសៀល ថ្ងៃទី៧ខែឧសភា EDC នឹងផ្អាកការផ្គត់ផ្គង់អគ្គិសនីនៅតំបន់ភ្លើងលេខP២៥៤ ស្ថិតនៅភូមិរោងចក្រ ក្នុងសង្កាត់ភ្នំពេញថ្មី ខណ្ឌសែនសុខ តំបន់ភ្លើងមួយចំនួនដែលស្ថិតនៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ និងតំបន់ដែលស្ថិតនៅតាមបណ្តោយផ្លូវជាតិលេខ២ ចាប់ពីសង្កាត់តាខ្មៅ រហូតដល់សង្កាត់ព្រែកហូរ ក្នុងតាខ្មៅ ខេត្តកណ្តាល។
«នៅថ្ងៃទី៨ខែឧសភា ចាប់ពីម៉ោង៩ព្រឹកដល់ម៉ោង៤រសៀល EDC នឹងផ្អាកការផ្គត់ផ្គង់អគ្គិសនីនៅតំបន់ភ្លើងលេខP១១៤៥ ស្ថិតនៅភូមិស្រែជំរៅ សង្កាត់ចោមចៅ ខណ្ឌពោធិ៍សែនជ័យ។ តំបន់ភ្លើងមួយចំនួនដែលស្ថិតនៅភូមិរោងចក្រ ភូមិច្រេស ក្នុងសង្កាត់ភ្នំពេញថ្មី ខណ្ឌសែនសុខ ភូមិតាងួន ភូមិគោកឃ្លាំង សង្កាត់កាកាប ខណ្ឌពោធិ៍សែនជ័យ និងតំបន់ភ្លើងមួយចំនួនដែលស្ថិតនៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ។ ដោយឡែកនៅ ថ្ងៃសៅរ៍ទី៩ខែឧសភា ចាប់ពីម៉ោង៩ព្រឹកដល់ម៉ោង៤រសៀល EDC នឹងផ្អាកការផ្គត់ផ្គង់អគ្គិសនីនៅតំបន់ភ្លើងលេខប.ត៥៥៨ ប.ត៥៥៨A ស្ថិតនៅភូមិទឹកថ្លា សង្កាត់ទឹកថ្លា ខណ្ឌសែនសុខ។ តំបន់ភ្លើងមួយចំនួនដែលស្ថិតតាមបណ្តោយផ្លូវជាតិលេខ៥ ចាប់ពី គីឡូម៉ែត្រលេខ៦ រហូតដល់សង្កាត់ច្រាំងចំរេះ២ ខណ្ឌឫស្សីកែវ និងតំបន់ភ្លើងមួយចំនួនដែលស្ថិតនៅ តាមបណ្តោយផ្លូវជាតិលេខ៥ ចាប់ពីសង្កាត់ព្រែកព្នៅ ខណ្ឌព្រែកព្នៅ រហូតដល់ឃុំព្រែកតាទែន ស្រុកពញាឮ ខេត្តកណ្តាល»។ នេះបើតាមខ្លឹមសារនៃសេចក្តីជូនដំណឹងដដែល។
សេចក្តីជូនដំណឹងបន្តថានៅថ្ងៃអាទិត្យទី១០ខែឧសភា ចាប់ពីម៉ោង៨ព្រឹកដល់ម៉ោង៥ល្ងាច EDC នឹងផ្អាកការផ្គត់ផ្គង់អគ្គិសនីនៅតំបន់ភ្លើងលេខD០៣ នៅតាមបណ្តោយមហាវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន តំបន់ភ្លើងលេខប.ត៣០៣ ស្ថិតនៅតាមបណ្តោយផ្លូវលេខ៥១ ក្នុងសង្កាត់ទន្លេបាសាក់ ខណ្ឌចំការមន តំបន់ភ្លើងមួយចំនួនដែលស្ថិតនៅភូមិភ្នំពេញថ្មី ភូមិប៉ាយាប ភូមិពោងពាយ ក្នុងសង្កាត់ភ្នំពេញថ្មី ខណ្ឌសែនសុខ និងតំបន់ភ្លើងមួយចំនួនដែលស្ថិតនៅតាមបណ្តោយផ្លូវជាតិលេខ៥ ចាប់ពីសង្កាត់ព្រែកព្នៅ ខណ្ឌព្រែកព្នៅ រហូតដល់ឃុំព្រែកតាទែន ស្រុកពញាឮ ខេត្តកណ្តាល៕
© រក្សាសិទ្ធិដោយ thmeythmey.com