ភ្នំពេញ៖ ក្នុងវ័យ២២ឆ្នាំ ស៊ន ពិសិដ្ឋ ជានិស្សិតឆ្នាំទី៥ផ្នែកអេឡិចត្រូនិកនៃសាកលវិទ្យាល័យន័រតុន បានបង្កើតរ៉ូបូតឈ្លបយកការណ៍មួយគ្រឿង ដែលអាចចាប់យករូបភាពពីកន្លែងផ្សេងៗ ពិសេសកន្លែងតូចចង្អៀត និងគ្រោះថ្នាក់។ តាមរយៈសមត្ថភាពរបស់រ៉ូបូតមួយនេះ ពិសិដ្ឋ ចង់ឲ្យវាមានវត្តមានក្នុងប្រតិបត្តិការសង្គ្រោះមនុស្ស ក្នុងឧបទ្ទវហេតុផ្សេងៗ។
ក្នុងបន្ទប់ស្រាវជ្រាវធំល្មមមួយដែលរួមមានទៅដោយទូរដាក់តាំងសម្ភារច្នៃប្រឌិតថ្មីៗ កុំព្យូទ័រ និង ឧបករណ៍ពិសោធន៍ផ្សេងៗ ស្ថិតក្នុងបរិវេណសាកលវិទ្យាល័យន័រតុន ក្រុមនិស្សិតដែលមានគ្នាប្រមាណ១០នាក់ ខ្លះកំពុងតែចុចកុំព្យូទ័រ ឯខ្លះទៀតកំពុងជជែកពិភាក្សាគ្នា។ ដោយឡែក និស្សិត ស៊ន ពិសិដ្ឋ ដៃម្ខាងកាន់តេឡេបញ្ជា ឯម្ខាងទៀតកាន់អាយផេត ភ្នែកសំឡឹងមើលអេក្រង់អាយផេត ហាក់កំពុងធ្វើអ្វីម្យ៉ាង។
លើអេក្រង់អាយផេត ដែល ពិសិដ្ឋ កំពុងតែមើលនេះ មានរូបភាពវីដេអូ ដែលអាចឲ្យគេមើលឃើញទិដ្ឋភាពអគារ មនុស្សដើរ ម៉ូតូ រថយន្ត ហាក់ដូចគេបានមើលឃើញទិដ្ឋភាពទាំងនោះនឹងភ្នែកជាក់ស្តែងអ៊ីចឹងដែរ។ មួយសន្ទុះក្រោយមក កូនរថក្រោះតូចមួយគ្រឿង ដោយមានបំពាក់កាម៉េរាពីលើផងនោះ បានបរចូលក្នុងបន្ទប់នោះ ទំនងជាវាត្រូវបានគេបញ្ជាឲ្យទៅបំពេញបេសកកម្មអ្វីមួយ។ តាមពិតទៅរូបភាពវីដេអូ ដែល ពិសិដ្ឋ កំពុងតែមើលនេះ គឺជាព័ត៌មានបានពីកូនរថក្រោះមួយនេះ។ ពិសិដ្ឋ ហៅវាថា Spy Robot ដែលជារ៉ូបូតឈ្លបយកការណ៍មួយប្រភេទ។
ជាភ្នាក់ងារឈ្លបយកការណ៍ Spy Robot មានសម្ថភាពយ៉ាងពិសេស។ វាអាចចាប់យករូបភាពជាវីដេអូ ពីកន្លែងផ្សេងៗ តាមការចង់បានរបស់អ្នកបញ្ជាវា។ ចំពោះ ពិសិដ្ឋ ការបង្កើតវាឡើង គឺចង់ឲ្យវាយកព័ត៌មានជាវីដេអូ នៅតាមកន្លែងដែលមនុស្សពិបាកនឹងចូលបាន។ អ្នកច្នៃប្រឌិតរូបនេះ បានរៀបរាប់ពីគំនិតរបស់ខ្លួនថា៖«ខ្ញុំចង់ឲ្យវាទៅដល់កន្លែងចង្អៀត ដែលមនុស្សពិបាកចូលដល់។ ក្នុងអគារបាក់បែក បើមនុស្សចូលទៅអាចគ្រោះថ្នាក់»។ ពិសិដ្ឋ បន្តទៀតថា៖« តាមរយៈរ៉ូបូតមួយនេះ យើងអាចប្រមូលព័ត៌មានពីទីតាំងនោះបាន។ មិនថាមានមនុស្សគ្រោះថ្នាក់ ឬអ្វីទេ»។ Spy Robot អាចចាប់យករូបភាពក្នុងចម្ងាយ ៣០ម៉ែត្រ ហើយពេលយប់ក៏វាអាចធ្វើការបានដែរ។
ដើម្បីអាចបង្កើតជារ៉ូបូតនេះឡើងបាន ពិសិដ្ឋ ពន្យល់យ៉ាងដូច្នេះថា៖«មានកូនឡាន១ ដែលមានភ្ជាប់ប្រព័ន្ធទៅតេឡេបញ្ជា។ យើងបំពាក់កាំម៉េរាលើវា(កូនឡាន) ដើម្បីឲ្យវាបញ្ជូនព័ត៌មានទៅអាយផេត ឬស្មាតហ្វូនក៏បាន។ កាម៉េរ៉ាប្រើកម្មវិធី Wi-Fi ដែលអាចឲ្យវាបញ្ជូនព័ត៌មានផ្សេងៗមកស្មាតហ្វូន។ គ្រាន់តែចុច Password របស់វា យើងអាចមើលរូបភាពបាន»។ ពិសិដ្ឋ បន្តទៀតថា៖« តួឡាន ខ្ញុំទិញគេ។ តែខ្ញុំបង្កើតកម្មវិធីដោយខ្លួនឯង។ ប្រើកូនឡាន ឬអ្វីផ្សេងក៏បាន»។
ចំណាយពេលមិនដល់១ខែផង ពិសិដ្ឋ អាចសម្រេចស្នាដៃនេះឡើងមកបាន។ តែទម្រាំបង្កើតវាបាន និស្សិតរូបនេះ ត្រូវឆ្លៀតពេលក្រៅម៉ោងសិក្សា ចូលបន្ទាប់ស្រាវជ្រាវជារៀងរាល់ថ្ងៃ។ ថ្ងៃខ្លះ ពិសិដ្ឋ ត្រូវបន្តកិច្ចការស្រាជ្រាវរបស់ខ្លួនពេញមួយយប់ទៀតផង។ តែសម្រាប់ អ្នកច្នៃប្រឌិតវ័យក្មេងរូបនេះ មិនចាត់ទុកថាវាជារឿងពិបាក និងត្រូវរាថយនោះទេ ព្រោះរូបគេ ចូលចិត្តការងារនេះយ៉ាងខ្លាំង។ ចំពោះការចំណាយលើឧបករណ៍ផ្សេងៗ ពិសិដ្ឋ ទទួលការឧបត្ថមថវិកាពីសាលា ដោយរ៉ូបូត១គ្រឿងនេះ ត្រូវចំណាយជាង ៣០០ដុល្លារអាមេរិក។
«កូនខ្មែរ ក៏អាចធ្វើបានដែរ»។ នេះជាសំដីដ៏ស្វាហាប់ចេញពីមាត់ម្ចាស់ស្នាដៃ Spy Robot ។ ពិសិដ្ឋ ថែមទាំងចង់ឃើញនិស្សិតខ្មែរ អាចបង្កើតស្នាដៃថ្មីៗ មិនចាញ់បរទេសទៀតផង។ ដោយមានការតាំងចិត្ត និងចេះយកទ្រឹស្តី មកអនុវត្តជាក់ស្តែង ពិសិដ្ឋបានសម្រេចបានស្នាដៃចំនួន៥ រួចមកហើយ។ Spy Robot ជាស្នាដៃទី៦ របស់រូបគេ ដែលធ្លាប់ត្រូវបានដាក់តាំងក្នុងពិព័រណ៍ស្នាដៃក្នុងសាលាកន្លងមក។
ចម្ងាយ៣០ម៉ែត្រ វាមិនទាន់ធ្វើឲ្យ អ្នកច្នៃប្រឌិតរូបនេះ ស្ងប់ចិត្តឡើយ។ ពិសិដ្ឋ ចង់ពង្រីកសមត្ថភាពរបស់វាបន្ថែមទៀត។ និស្សិតរូបនេះ អះអាងថា ខ្លួនអាចធ្វើឲ្យវាអាចចាប់យករូបភាពក្នុងចម្ងាយជាង១គីឡូម៉ែត្រឯណោះ ក្នុងពេលខាងមុខ។ ជាមួយគ្នានេះដែរ ពិសិដ្ឋ ចង់ឃើញរ៉ូបូតរបស់ខ្លួន អាចបម្រើដល់មនុស្សបាន តាមរយៈប្រតិបត្តិការ ដែលវាជាអ្នកផ្តល់ព័ត៌មានរូបភាពពីកន្លែងកើតហេតុផ្សេងៗ។