ក្រុងច្បារមនមានសួនច្បារថ្មី តែនៅមានក្លិនឆ្អេះ

ជាតិ

ក្រុងច្បារមនមានសួនច្បារថ្មី តែនៅមានក្លិនឆ្អេះ

26, Jun 2016 , 12:39 pm

រូបភាព

ដោយ: ថ្មីៗ

ខេត្តកំពង់ស្ពឺ ជាខេត្តមួយស្ថិតនៅភាគនិរតីក្នុងប្រទេសកម្ពុជា និងមានចម្ងាយ៤៨គីឡូម៉ែត្រពីរាជធានីភ្នំពេញ។ គេអាចធ្វើដំណើរទៅខេត្តនេះ តាមផ្លូវជាតិលេខ៤ ដែលភ្ជាប់ពីរាជធានីភ្នំពេញ ទៅខេត្តព្រះសីហនុ។ ខេត្តកំពង់ស្ពឺ មាន៧ស្រុក និងក្រុង១ គឺក្រុងច្បារមន។ និងមានផ្ទៃដីសរុបចំនួន៧០១៧ គីឡូម៉ែត្រការេ ហើយប្រជាជនមានចំនួន៧១៦៥១៧នាក់ (ស្ថិតិឆ្នាំ២០០៨)។

អភិបាលខេត្តបច្ចុប្បន្ន គឺលោក វ៉ី សំណាង ចំណែកប្រធានក្រុមប្រឹក្សាខេត្ត គឺលោក យឹម សុខុម។ អ្វីដែលខេត្តកំពង់ស្ពឺ ត្រូវបានទទួលស្គាល់ជាទូទៅ គឺដើមត្នោតយ៉ាងច្រើន ដែលដុះតាមវាលស្រែ និងការផលិតស្ករត្នោត។

រយៈពេលពីរឆ្នាំចុងក្រោយនេះ ក្រុងច្បារមនប្រែមុខមាត់ថ្មីយ៉ាងច្រើន។ សួនច្បារតាមបណ្ដោយស្ទឹងព្រែកត្នោត ក្នុងក្រុងច្បារមន ត្រូវបានកែលម្អ ដោយមានការតុបតែងភ្លើងពណ៌ ពេលរាត្រី និងសួនកម្សាន្តសម្រាប់កុមារជាដើម។ ភ្លើងពណ៌ អមជាមួយនឹងការបាញ់ទឹកនៅកណ្តាលស្ទឹង និងសួនច្បារល្អស្អាត បានទាក់ទាញប្រជាពលរដ្ឋ ដែលរស់នៅក្នុងទីរួមខេត្ត ឲ្យមកកម្សាន្តនាពេលល្ងាច និងធ្វើលំហាត់ប្រាណដើម្បីសុខភាព។

កាន់តែពិសេសទៅទៀតនោះ សំណង់ថ្មីៗមួយចំនួនទៀត ដូចជាស្តូបតម្កល់សម្ដេចសង្ឃរាជ ជួនណាត និងសំណង់វិមានឯករាជ្យ ដែលកំពុងត្រូវបានសាងសង់ និងផ្សាររាត្រី គឺសមិទ្ធផលថ្មីៗ សម្រាប់ខេត្តភាគនិរតីនេះ។

ប៉ុន្តែអ្វីដែលជាបញ្ហា ដូចនៅបណ្តាទីប្រជុំជនក្រុងនៅក្នុងខេត្តនានានៅកម្ពុជានោះ គឺក្លិនឆ្អេះឆ្អាប នៅតាមសួនច្បារ បានក្លាយជាការរំខានដល់កម្សាន្តរបស់ពលរដ្ឋ៕