ជាតិ
នយោបាយជាតិ
សម្ដេច ហ៊ុន សែន ប្រាប់បរទេសកុំយកជំនួយមកគាបសង្កត់ដំណើរការបោះឆ្នោតនៅកម្ពុជា
× សម្ដេចនាយករដ្ឋមន្ត្រី ហ៊ុន សែន បានបញ្ជាក់ថា កម្ពុជានឹងបន្តដំណើរការបោះឆ្នោតក្រុមប្រឹក្សា ឃុំ សង្កាត់ ឆ្នាំ២០១៧ និងការបោះឆ្នោតជ្រើសតាំងតំណាង ឆ្នាំ២០១៨ ជាធម្មតា ដោយគ្មានការរាំងស្ទះអ្វីឡើយ។ បើទោះជាមិននិយាយចំឈ្មោះឯកឧត្តម កឹម សុខា ក្តី តែប្រមុខរដ្ឋាភិបាល បានអះអាងថា ករណីរឿងអាស្រូវផ្លូវភេទរបស់អ្នកនយោបាយ គឺជារឿងបុគ្គល មិនមែនជារឿងនយោបាយទេ ហើយបរទេសកុំយកជំនួយមកគាបសង្កត់និងគំរាមកំហែង ដល់ដំណើរការបោះឆ្នោតនៅកម្ពុជា ដោយសារករណីបុគ្គលនយោបាយនេះ។
ថ្លែងចំពោះមុខបណ្ដាអង្គទូតនៅព្រឹកនេះ សម្ដេច ហ៊ុន សែន បញ្ជាក់ថា បើសិនជាម្ចាស់ជំនួយបរទេស មិនផ្ដល់ជំនួយដល់ការចុះឈ្មោះបោះឆ្នោតនៅកម្ពុជា ដោយសារតែរឿងមេដឹកនាំបក្សប្រឆាំងនេះ រដ្ឋាភិបាលលោកនឹងចំណាយថវិកាបោះឆ្នោតខ្លួនឯង ដោយមិនរង់ចាំពឹងជំនួយនេះឡើយ។ «កុំឲ្យថាកម្ពុជាស្អីពឹងគេ ស្អីក៏ពឹង បើជួយក៏ជួយមក បើមិនជួយក៏អត់ទៅ កុំចាំបាច់និយាយច្រើនពេក»។ នេះជាការបញ្ជាក់របស់ប្រមុខរដ្ឋាភិបាល។
សូមស្ដាប់ប្រសាសន៍នាយករដ្ឋមន្ត្រី ហ៊ុន សែន ក្នុងខួបលើកទី៦៥ឆ្នាំ នៃការបង្កើតស្ថាប័នគយ និងរដ្ឋាករកម្ពុជានៅថ្ងៃនេះ៖
ទាក់ទិននឹងដំណើរការបោះឆ្នោតនេះ អ្នកនាំពាក្យគណកម្មាធិការជាតិរៀបចំការបោះឆ្នោតលោក ហង្ស ពុទ្ធា អះអាងថា ទោះបីជាគ្មានជំនួយពីបរទេស ជួយដល់ដំណើរការចុះឈ្មោះបោះឆ្នោតនៅពេលខាងមុខក្ដី ក៏កម្ពុជាអាចរៀបចំចុះឈ្មោះបោះឆ្នោតដោយខ្លួនបានដែរ ព្រោះ គ.ជ.ប បានត្រៀមថវិកាចំនួន២៣លានដុល្លាររួចរាល់ហើយ សម្រាប់ការចុះឈ្មោះបោះឆ្នោត ដោយក្នុងនោះមានជំនួយពីខាងសហភាពអឺរ៉ុប (EU) ចំនួន៦,៧លានដុល្លារ និងជប៉ុន ចំនួន ១,១ លានដុល្លារ។ បើតាមលោក ហង្ស ពុទ្ធា ក្រៅពីថវិកា២៣លានសម្រាប់ការចុះឈ្មោះបោះឆ្នោតនេះ គ.ជ.ប ក៏បានត្រៀមថវិកាសម្រាប់ដំណើរការបោះឆ្នោតទាំងមូលក្រោម២០លានដុល្លារផងដែរ។
ថ្លែងប្រាប់សារព័ត៌មានថ្មីៗ អ្នកនាំពាក្យគ.ជ.ប រូបនេះ បានបញ្ជាក់ដូច្នេះថា៖«បើមិនមានជំនួយបរទេស ក៏មិនមានអ្វីប៉ះពាល់ដល់ដំណើការចុះឈ្មោះបោះឆ្នោត និងការបោះឆ្នោតកម្ពុជាដែរ ព្រោះ គជប បានស្នើកញ្ចប់ថវិកាទៅរដ្ឋាភិបាលហើយ ហើយជំនួយថវិកាពីបរទេសនោះគ្រាន់តែជាចំណែកមួយក្នុងការកាត់បន្ថយចំណាយរដ្ឋាភិបាលប៉ុណ្ណោះ បានន័យថាបើសិនជាពួកគេផ្ដល់ជំនួយ គឺវាជួយកាត់បន្ថយការចំណាយរបស់រដ្ឋាភិបាលលើការបោះឆ្នោតប៉ុណ្ណឹង»។ បើតាមលោក ហង្ស ពុទ្ធា ដំណើរការចុះឈ្មោះនឹងចាប់ផ្ដើមនៅថ្ងៃទី១ ខែកញ្ញាខាងមុខនេះ ។
ជុំវិញដំណើរការបោះឆ្នោតនេះដែរ ប្រធានស្តីគណបក្សសង្គ្រោះជាតិ ឯកឧត្តម កឹម សុខា បានពិភាក្សាជាមួយបណ្ដាអង្គទូតអឺរ៉ុបប្រចាំកម្ពុជា ដោយស្នើឲ្យសហគមន៍អឺរ៉ុបបន្តជួយដល់ដំណើរការបោះឆ្នោតនៅកម្ពុជានាពេលខាងមុខនេះ ដើម្បីធានាឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌ សម្រាប់គ្រប់ភាគីទទួលយកបាន។
កន្លងមកនាយកប្រតិបត្តិមូលនិធិកូហ្វីអាណាន់ លោក អាឡាំង ដូស បានជួបពិភាក្សាជាមួយគណកម្មាធិការរៀបចំការបោះឆ្នោត (គជប) និងគណបក្សសង្គ្រោះជាតិ ដោយមូលនិធិកូហ្វីអាណាន់ សន្យាថានឹងជួយជ្រោមជ្រែង និងសម្របសម្រួលការបោះឆ្នោតនៅកម្ពុជា ឲ្យមានប្រសិទ្ធភាព ខណៈដែលជប៉ុន និងសហភាពអឺរ៉ុប កំពុងជួយជំនួយបច្ចេកទេស និងថវិកាដល់ការបោះឆ្នោតនេះ៕
© រក្សាសិទ្ធិដោយ thmeythmey.com