កម្ពុជាបង្កើតច្បាប់ការពារសាក្សីនិងបុគ្គលរាយការណ៍

ជាតិ

កម្ពុជាបង្កើតច្បាប់ការពារសាក្សីនិងបុគ្គលរាយការណ៍

29, Jun 2016 , 9:39 pm

រូបភាព

ដោយ: ម៉ៅ សុផា

ភ្នំពេញ៖ សេចក្តីព្រាងច្បាប់ចំនួន២ កំពុងស្ថិតក្នុងដំណាក់កាលនៃការចងក្រងរបស់រាជរដ្ឋាភិបាលកម្ពុជា។ កាតព្វកិច្ចនៃការតាក់តែងសេចក្តីព្រាងច្បាប់ទាំងនេះ ត្រូវបានរាជរដ្ឋាភិបាលប្រគល់ទៅឲ្យអង្គភាពប្រឆាំងអំពើពុករលួយ។

សេចក្តីព្រាងច្បាប់ការពារសាក្សី និងសេចក្តីព្រាងច្បាប់ការពារបុគ្គលរាយការណ៍ បានកើតឡើងពីឆន្ទៈនយោបាយរបស់រាជរដ្ឋាភិបាលកម្ពុជា។ សេចក្តីសម្រេចក្នុងការបង្កើតច្បាប់ទាំង២នេះ ត្រូវបានធ្វើឡើងក្នុងកិច្ចប្រជុំពេញអង្គនៃគណៈរដ្ឋមន្ត្រី កាលពីថ្ងៃទី២២ ខែឧសភាឆ្នាំ២០១៥ កន្លងទៅ។

ច្បាប់ការពារសាក្សី មានគោលបំណងលើកកម្ពស់ប្រសិទ្ធភាព យុត្តិធម៌ និងការបង្ក្រាបបទល្មើស តាមរយៈការបង្កើត ការពង្រឹងយន្តការនានា និងការការពារសុវត្ថិភាពផ្ទាល់ខ្លួនរបស់សាក្សី រួមទាំងបុគ្គលពាក់ព័ន្ធទាំងឡាយ។

ចំណែកឯ គោលបំណងនៃច្បាប់ការពារបុគ្គលរាយការណ៍ គឺដើម្បីធានាសុវត្ថិភាព ទប់ស្តាត់ និងលុបបំបាត់នូវផលវិបាក ដែលអាចកើតមានដល់អ្នក ដែលរាយការណ៍ពីបទល្មើសនានាទៅដល់ស្ថាប័នមានសមត្ថកិច្ច។ ដូច្នេះច្បាប់មួយនេះ នឹងជំរុញឲ្យមានតម្លាភាព ប្រសិទ្ធភាព ការបំពេញតួនាទីនៅតាមអង្គភាពនិងស្ថាប័ននានា តាមរយៈការធានា ការបង្កើនប្រសិទ្ធភាពនៃការផ្តល់ព័ត៌មានពីបទល្មើស ដែលជនទុច្ចរិតបានប្រព្រឹត្ត។

បន្ទាប់ពីចំណាយពេលអស់ជាច្រើនខែក្នុងការសិក្សាស្រាវជ្រាវលើឯកសារច្បាប់ និងអត្ថបទពាក់ព័ន្ធផ្សេងៗ អង្គភាពប្រឆាំងអំពើពុករលួយ បានចាប់ផ្តើមរៀបចំសិក្ខាសាលាលើកដំបូង ដើម្បីពិភាក្សានិងផ្តល់យោបល់គ្នា ជុំវិញសេចក្តីព្រាងច្បាប់ទាំង២ នៅថ្ងៃទី២៩ ដល់ថ្ងៃទី៣០ ខែមិថុនា ឆ្នាំ២០១៦។ សិក្ខាសាលានេះ មានការចូលរួមតំណាងស្ថាប័នពាក់ព័ន្ធនានា ប្រមាណជាង១០០ក់ ដូចជារដ្ឋសភា ក្រសួង តុលាការ វិស័យឯកជន និងអង្គការក្រៅរដ្ឋាភិបាល។

សិក្ខាសាលានេះ គឺជាជំហានដំបូងក្នុងរៀបចំគ្រោងឆ្អឹងនៃសេចក្តីព្រាងច្បាប់ទាំង២ខាងលើ។ ក្រោយពីបញ្ចប់សិក្ខាសាលានេះ អង្គភាពប្រឆាំងអំពើពុករលួយ នឹងចាប់ផ្តើមតាក់តែងខ្លឹមសារនៃច្បាប់ទាំង២ តែម្តង។ យ៉ាងណាក៏ដោយ ស្ថាប័នប្រឆាំងអំពើពុករលួយមួយនេះ សង្ឃឹមថា ការរៀបចំសេចក្តីព្រាងច្បាប់ទាំង២នេះ នឹងត្រូវបញ្ចប់ មុនឆ្នាំ២០១៦។

លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានថ្លែងថា មុននឹងបង្កើតសិក្ខាសាលានៅថ្ងៃនេះ កម្ពុជាបានសិក្ខាពីបណ្តាប្រទេសជាច្រើន ទាក់ទងនឹងច្បាប់ការពារសាក្សី។ លោក បានរៀបរាប់ពីកត្តាសំខាន់ៗមួយចំនួន អំពីច្បាប់ការពារសាក្សី ដូចជា ការកំណត់ថវិកាដំណើការ និងការកំណត់ពេលវេលាឲ្យបានច្បាស់លាស់ រួមទាំងវិសាលភាពក្នុងការការពារសាក្សី។

ប្រធានអង្គភាពប្រឆាំងអំពើពុករលួយរូបនេះបានបញ្ជាក់បែបនេះថា៖«សម្រាប់ច្បាប់ការពារសាក្សី យើងបានមើល១៤ប្រទេសឯណោះ។ យើងមើលច្រើនប្រទេស។ ចំណុចសំខាន់ទី១ គឺកញ្ចប់ថវិកាជាតិ ហើទី២ គឺរយៈពេលការពារសាក្សី ព្រោះយើងមិនមែនការពារមួយជីវិតឯណា។ [………..] វិសាលភាពនិងវិធានការការពារក៏ជាចំណុច១សំខាន់ ជំនួយនិងការលើកទឹកចិត្ត ក៏មានសារសំខាន់ដែរ»៕