សម្រាប់ដំណើការនយោបាយ ពាក់ព័ន្ធការបោះឆ្នោតឃុំ-សង្កាត់២០២២ និងបោះឆ្នោតថ្នាក់ជាតិ ២០២៣ គឺគ្មានបញ្ហាចោទអ្វីឡើយ ពោលគឺមានការចូលរួមពីបក្សនយោបាយ ទាំងគណបក្សចាស់និងគណបក្សដែលទើបបង្កើតថ្មីយ៉ាងច្រើន។ នេះជាការអះអាងរបស់ប្រមុខរដ្ឋាភិបាល ដែលឆ្លើយតបទៅនឹងសាររបស់ពលរដ្ឋ ដែលបានបង្ហោះចូលទំព័រហ្វេសប៊ុកសម្ដេច ដើម្បីសួរនាំពីការចូលរួមប្រជុំតាមZoom របស់មន្ត្រីអតីតបក្សប្រឆាំង។

 

សម្ដេច ហ៊ុន សែន បានលបស្ដាប់កិច្ចប្រជុំផ្ទៃក្នុងរបស់មន្ត្រីអតីតគណបក្សសង្គ្រោះជាតិ ដែលដឹកនាំដោយលោក ឡុង រី ពីសហរដ្ឋអាមេរិក ជាមួយក្រុមការងារខ្លួន តាមរយៈប្រព័ន្ធវីដេអូ Zoom កាលពីថ្ងៃទី៩ កញ្ញា។ ក្នុងគ្រានោះ សម្ដេច បានចូលទៅបកស្រាយប្រាប់លោក ឡុង រី ពីបំណងដែលសម្ដេចប្រឹងរក្សាវប្បធម៌សន្ទនាជាមួយមេដឹកនាំបក្សប្រឆាំង។ សម្ដេច ហ៊ុន សែន បានរម្លឹកប្រាប់លោក ឡុង រី ថា សម្ដេចបានអនុគ្រោះនិងស្នើព្រះមហាក្សត្រលើកទោសដល់លោក សម រង្ស៊ី ម្ដងជា២ដង ក្រោយពីមេដឹកនាំក្រុមប្រឆាំងរូបនេះ ធ្វើលិខិតសុំទោសសម្ដេច។បន្ថែមពីនេះ សម្ដេច ក៏បានអះអាងពីការប្រឹងសម្របសម្រួលនយោបាយរបស់ខ្លួន រហូតបង្កើតបាន«វប្បធម៌សន្ទនា» នយោបាយ កាលពីខែកញ្ញា ឆ្នាំ២០១៤ដែរ។


 
ប៉ុន្តែក្រោយមកលោក សម រង្ស៊ី បានលើកយកការបកស្រាយរបស់សម្ដេច ហ៊ុន សែន មកនិយាយចំអកវិញថា ការបកស្រាយប្រមុខរដ្ឋាភិបាលកម្ពុជានេះ គឺគ្រាន់តែចង់បង្ហាញឱ្យគេឃើញថាគាត់ជាមនុស្សល្អប៉ុណ្ណោះ ជាពិសេសចង់រម្លឹកគុណស្រ័យពីខ្លួន។ ចំពោះបញ្ហាវប្បធម៌សន្ទនានេះ លោក សម រង្ស៊ី តបវិញក្នុងន័យនេះថា លោកពិបាកធ្វើការជាមួយសម្ដេច ហ៊ុន សែន ដោយសារមេដឹកនាំកម្ពុជារូបនេះ ទទួលយកតែមតិយោបល់ណា ដែលស្របនឹងគំនិតខ្លួនឯងប៉ុណ្ណោះ ៕