Musah បានសារភាពថាគ្រាប់បាល់ own goal ទាំងពីរគ្រាប់ ក្នុងការប្រកួតក្របខណ្ឌ Ghana Premier League កាលពីខែកក្កដាកន្លងទៅ សុទ្ធតែជាគ្រាប់បាល់គ្រោងទុក។ កាលនោះក្រុមរបស់គេ Inter Allies ចាញ់ Ashanti Gold ក្នុងលទ្ធផលដល់ទៅ ៧-០។ ខ្សែការពាររូបនេះ អះអាងថាខ្លួនធ្វើដូច្នេះ ដើម្បីផ្លាស់ប្តូរលទ្ធផលប្រកួត។
 

មិនត្រឹមតែ Musah ម្នាក់នោះទេ កីឡាករសរុប១៧នាក់ និងមន្ត្រី៦នាក់ទៀតរបស់ក្លិបទាំងពីរ សុទ្ធតែត្រូវបានចោទប្រកាន់ពីបទល្មើសរៀបចំលទ្ធផលការប្រកួតផងដែរ។

ជុំវិញមូលហេតុដែលធ្វើឱ្យមានការសម្រេចទាត់បាល់បញ្ចូលទីក្រុមខ្លួនដល់ទៅពីរគ្រាប់ ត្រូវបាន Musah បកស្រាយប្រាប់កាសែតក្នុងស្រុកដោយខ្លួនឯងថា រូបគេមានចេតនា ដើម្បីផ្លាស់ប្តូរលទ្ធផល និងដើម្បីឱ្យអ្នកភ្នាល់បាល់ចាក់ខុស។
 

«ខ្ញុំបានលឺនៅក្នុងសណ្ឋាគារថាការភ្នាល់ត្រូវបានធ្វើឡើងសម្រាប់លទ្ធផល ៥-១ ទល់នឹងក្រុម Inter Allies របស់ខ្ញុំ។ ខ្ញុំសម្រេចចិត្តបំផ្លាញការភ្នាល់នោះ ព្រោះខ្ញុំមិនពេញចិត្តចំពោះការភ្នាល់ល្បែងកីឡានេះទេ។ បន្ទាប់ពីការប្រកួតនោះ ក្រុមបច្ចេកទេសរបស់ខ្ញុំបានសរសើរខ្ញុំ ចំពោះការធ្វើឱ្យអ្នកភ្នាល់ចាញ់»។ នេះជាការបញ្ជាក់រប់ស់ Musah។
 

សម្រាប់ករណីនេះ Musah ខ្សែការពារវ័យ២៤ឆ្នាំ អាចនឹងត្រូវហាមឃាត់មិនឱ្យលេងបាល់ទាត់ ដោយសារការចោទប្រកាន់ប្រឆាំងនឹងរូបគេ។ ទង្វើរបស់ Musah ត្រូវបាន GFA ចោទថាករណីមើលងាយសក្លិប លីគ និងស្ថាប័នគ្រប់គ្រងកីឡាបាល់ទាត់ហ្កាណាទាំងមូល៕