លោក សេង សុខជា បានឱ្យដឹងទៀតថា បច្ចុប្បន្ន គាត់មានរថយន្ដបុរាណ ប្រហែល២០គ្រឿង ដែលស្ទើរតែទាំងអស់ជាម៉ាកអឺរ៉ុប និងជប៉ុន ក្នុងនោះមានឡានម៉ាក MERCEDES-BENZ, LAND ROVER, , PEUGEOT, VOLKSWAGEN, SUZUKI, TOYOTA និង HUMMER ជាដើម។ លោក សុខជា ក៏មានរថយន្ដ M151 មួយគ្រឿងដែរ ដែលគេហៅថា JEEP ពីព្រោះគឺជាប្រភេទឡានស្រដៀងរថយន្ដម៉ាក JEEP ប្រភេទដើម។ តាមពិតអ្វីដែលខុសគ្នាជាងគេ រវាងរូបរាង M151 និង JEEP CJ គឺឆ្នូតខាងមុខ នៅចន្លោះហ្វារទាំង២។ លើ JEEP CJ វាឈរ ប៉ុន្តែលើ M151 វាផ្ដេក។ លោក សុខជា បានកែច្នៃ M151 របស់ខ្លួន ដោយដូរម៉ាស៊ីន ប្រអប់លេខ(ដាក់អូតូម៉ាទីកវិញ) កង់ទាំង៥ជាមួយកង់សាកួរ ហើយដោយដាក់ស័ង្កសីផ្នែកខាងក្រោយ ជំនួសក្រណាត់កៅស៊ូខ្លះ។

 

 

ក្រុមហ៊ុនអាម៉េរិកាំង FORD បានបង្កើតរថយន្ដ M151 ឆ្នាំ១៩៥៩ ក៏ប៉ុន្តែបានផ្ទេរការផលិតទៅឱ្យក្រុមហ៊ុន KAISER ហើយទៅឱ្យក្រុមហ៊ុន AM General ដែលបញ្ចប់ផលិត M151 ឆ្នាំ១៩៨២។ 151 គឺជាប្រភេទ ហើយអក្សរ M មកពីអក្សរកាត់ MUTT ដែលមានន័យថា Military Utility Tactical Truck។ ដូច្នេះគឺជាឡានសម្រាប់យោធា។ វាបង្វិលកង់ទាំង៤ ដើម្បីជិះលើផ្លូវមានឧបសគ្គ។ អាចទុកឈ្មោះ M ថាជាម៉ាកក៏បាន។ ក៏ប៉ុន្តែវាមិនមែនជាម៉ាកចុះឈ្មោះយ៉ាងត្រឹមត្រូវ ដូចម៉ាករថយន្ដស៊ីវិលនោះទេ។ រថយន្ដ M151 របស់លោក សុខជា គឺជាម៉ូឌែល A2 ដែលពីដើមមានទម្ងន់ត្រឹម ១ ១០០គីឡូក្រាម។ ម៉ូឌែល A2 បានជំនួសម៉ូឌែល A1 ឆ្នាំ១៩៦៨។ ក្រៅពីប្រភេទ M151 ដែលជាប្រភេទសាមញ្ញធម្មតា ក៏គេបានបង្កើតប្រភេទផ្សេងៗ ដែលបំពាក់ដំបូលក្រណាត់កៅស៊ូស្ទើរតែទាំងអស់ ដូចជា M718 (សង្គ្រោះបន្ទាន់) M825 (ដឹកកាំភ្លើងធំ) MRC108 (ដឹកឧបករណ៍គមនាគមន៍)។ល៕