រដ្ឋមន្ត្រីការបរទេសឥណ្ឌា Subrahmanyam Jaishankar បានជួបជាមួយសមភាគីមកពីអាស៊ីកណ្ដាលនៅថ្ងៃទី១៩ ខែធ្នូ ដោយមានបញ្ហាអាហ្វហ្កានីស្ថាន ជាប្រធានបទសំខាន់មួយ។ ក្នុង​កិច្ចសន្ទនាខាងលើ ចំពោះមុខសមភាគីតាហ្ស៊ីគីស្ថាន កាហ្សាក់ស្ថាន តួកម៉េនីស្ថាន កៀហ្ស៊ីស៊ីស្ថាន និង​អ៊ូសបេគីស្ថាន ប្រមុខការទូតឥណ្ឌាលើកឡើងថា ការដោះស្រាយបញ្ហាអាហ្វហ្កានីស្ថាន ជារឿងអាទិភាពសំខាន់មួយ។ 

 

«ក្តីបារម្ភ និងគោលបំណងរបស់យើងចំពោះអាហ្វហ្កានីស្ថាន គឺស្រដៀងគ្នា។​ យើង​ត្រូវ​តែស្វែ​ង​រក​វិធី​ជួយសង្គ្រោះប្រជាជនអាហ្វហ្កានីស្ថាន»។ លោក Jaishankar បញ្ជាក់បែបនេះ។

 

បន្ថែមពីនេះ រដ្ឋមន្ត្រីការបរទេសទាំង៦រូបក៏បានបង្ហាញការយោគយល់លើតម្រូវការដែលប្រទេសជិត​ខាង​ត្រូវ​ធ្វើ​ដើម្បីម្រេចបានរដ្ឋាភិបាលអាហ្វហ្កានីស្ថានដែលរួមបញ្ចូលគ្រប់ភាគី។ តម្រូវការទាំងនោះ​រួមមាន ការប្រយុទ្ធប្រឆាំងនឹងអំពើភេរវកម្មនិងការជួញដូរគ្រឿងញៀន, ការផ្តល់​ជំនួ​យ​មនុស្ស​ធម៌​ដោយគ្មានការរារាំង និងការការពារសិទ្ធិស្ត្រី កុមារ និងជនជាតិភាគតិច។

 

តាមពិតទៅ រដ្ឋាភិបាលឥណ្ឌា ព្រួយបារម្ភយ៉ាងខ្លាំងអំពីការគ្រប់គ្រងរបស់ក្រុមតាលីបង់ដែល​អាច​បង្ក​ផលប៉ះពាល់ដល់សន្តិសុខនៅក្នុងតំបន់ ពិសេសនៅតំបន់ Jammu និង Kashmir ដែលនៅ​ភាគ​ខាង​ជើង​ឥណ្ឌា។ ទីក្រុងញូវដែលី ក៏បណ្តាក់ទុនចំនួន៣ពាន់​លាន​ដុល្លារ​នៅ​អាហ្វហ្កានីស្ថាន ហើយ​កំពុង​ពង្រីកទំនាក់ទំនងរបស់ខ្លួនជាមួយបណ្តា​ប្រទេស​អាស៊ី​កណ្តាល​ផង​ដែរ​។ នេះបង្ហាញថា ស្ថិរភាពតំបន់ ពិសេសនៅអាហ្វហ្កានីស្ថាន​មាន​សារសំខាន់​ណាស់​សម្រាប់​ផល​ប្រយោជន៍​របស់​ឥណ្ឌា៕