"2 Chevaux Vapeur" គឺជាកម្លាំងរថយន្ដតែម្ដង ដែលស្មើនឹងកម្លាំងអូសរបស់សត្វសេស ២ក្បាល។ តែតាមពិតជាភាសានិយាយគេហៅថា "2 Chevaux" (ឌើសឺវោ) និងសរសេរជាអក្សរកាត់ថា 2CV។ រថយន្ដ CITROËN 2CV គឺជាប្រភេទរថយន្ដមួយ ដ៏ប្រជាប្រិយណាស់។ ទូទាំងពិភពលោក មានសមាគមច្រើន សម្រាប់ម្ចាស់ 2CV។ នៅប្រទេសបារាំង ពួកគេជួបជុំទាំងអស់គ្នា ជារៀងរាល់ឆ្នាំ តាំងពីឆ្នាំ២០០២ ដែលមាន CITROËN 2CV ជិត៣ ០០០គ្រឿងចូលរួម។  2CV ក៏មានក្នុងរឿងភាពយន្ដផ្សេងៗដូចជា James BOND ក្នុងរឿងល្ខោន ក្នុងឃ្លីបវីដេអូ ក្នុងកម្មវិធីទូរទស្សន៍ ហ្គេម រឿងប្រលោមលោក និងក្នុងសៀវភៅតុក្កតាក៏មាន និងលើតែមប្រៃសណីយ៍ក៏មានដែរ។

 

CITROËN 2CV ត្រូវបានផលិតអស់ ៥ ១១៤ ៩៦១ គ្រឿង ពីឆ្នាំ១៩៤៨ ដល់ឆ្នាំ១៩៩០។ វាស្រាលមែនទែន គឺតែកន្លះតោនប៉ុណ្ណោះ។ វាគឺជារថយន្តដ៏កម្រនៅកម្ពុជា ខណៈដែលទូទាំងប្រទេស ទំនងមានរថយន្តប្រភេទនេះតែ ៤គ្រឿងប៉ុណ្ណោះ ប៉ុន្តែទាំងអស់ត្រូវបាននាំចូលពីបរទេសមកកាលពីពេលថ្មីៗនេះ។ ក្រុមហ៊ុន CITROËN ត្រូវបានបង្កើតឡើងនាឆ្នាំ១៩១៩ នៅប្រទេសបារាំង ដោយលោក CITROËN André។ សព្វថ្ងៃនេះ គឺជាកម្មសិទ្ធិរបស់ក្រុមសម្ព័ន្ធ PSA ៕