ជាតិ
សាលារៀនចំនួន ៥ ជាប់«ជ័យលាភីសាលាស្អាត» សាលារៀនជាប់ជ័យលាភីសាលាស្អាត
× ភ្នំពេញ៖ វិទ្យាល័យស្វាយរៀង, សាលាបឋមសិក្សាវត្តចែង, សាលាបឋមសិក្សាគងជ័យ, សាលាបឋមសិក្សានិងវិទ្យាល័យហ៊ុន សែន មិត្តភាព និងអនុវិទ្យាល័យទីរួមខេត្ត បានទទួលជ័យលាភីសាលាស្អាត ក្នុងក្របខណ្ឌទូទាំងប្រទេស ពីក្រសួងអប់រំ យុវជន និងកីឡា។ នេះបើតាមប្រកាសរបស់ក្រសួងអប់រំ ចុះហត្ថលេខាដោយលោក ហង់ជួន ណារ៉ុន កាលពីថ្ងៃទី១៩ មេសា។
ពានរង្វាន់សាលាស្អាតដែលរៀបចំដោយរបស់ក្រសួងអប់រំ យុវជន និងកីឡា បានរកឃើញសាលារៀនចំនួន ៥ ជាប់ជ័យលាភីសាលាស្អាត ក្នុងក្របខណ្ឌទូទាំងប្រទេស។ ជ័យលាភីសាលាស្អាតទាំង៥ រួមមានវិទ្យាល័យស្វាយរៀង ស្ថិតនៅក្រុងស្វាយរៀង ខេត្តស្វាយរៀង ជាប់ពានរង្វាន់ជ័យលាភីលេខ១ ដោយទទួលបានថវិកា ៥លានរៀល។ សាលាបឋមសិក្សាវត្តចែង ដែលស្ថិតស្រុកសង្កែ ខេត្តបាត់ដំបង ជាប់ពានរង្វាន់ជ័យលាភីលេខ២ ទទួលបានថវិកា ៤លានរៀល។
ចំណែកពានរង្វាន់ជ័យលាភីលេខ៣ បានលើសាលាបឋមសិក្សាគងជ័យ ដែលស្ថិតនៅស្រុកកងមាស ខេត្តកំពង់ចាម, ពានរង្វាន់ជ័យលាភីលេខ៤ បានលើសាលាបឋមសិក្សានិងវិទ្យាល័យហ៊ុន សែន មិត្តភាព ស្ថិតនៅក្រុងព្រះសីហនុ ខេត្តព្រះសីហនុ និងពានរង្វាន់ជ័យលាភីលេខ៥ បានលើអនុវិទ្យាល័យទីរួមខេត្ត មានទីតាំងនៅក្រុងច្បារមន ខេត្តកំពង់ស្ពឺ។ ជ័យលាភីលេខ៣ លេខ៤ និងលេខ៥ ទទួលបានថវិកា ៣លានរៀល ក្នុងមួយសាលា។
ក្រៅពីប្រគល់ពានរង្វាន់ជ័យលាភីសាលាស្អាត ក្រសួងអប់រំ យុវជន និងកីឡា ក៏បានប្រគល់ពានរង្វាន់នាយកល្អ និងគ្រូបង្រៀនល្អផងដែរ។ លោក រស់ សុវាចា អ្នកនាំពាក្យក្រសួងអប់រំ ប្រាប់ ThmeyThmey25 ថា ការរៀបចំវាយតម្លៃជ្រើសរើសនាយកសាលាល្អ គ្រូបង្រៀនល្អ និងសាលាស្អាតនេះ គឺផ្អែកតាមគោលការណ៍ លក្ខណវិនិច្ឆ័យ និងនីតិវិធី ដែលបានកំណត់បន្ទាប់ពីមន្ទីរអប់រំ យុវជន និងកីឡារាជធានី-ខេត្ត បានផ្ញើលទ្ធផលវាយតម្លៃកម្រិតមន្ទីរមកក្រសួង។
លោក រស់ សុវាចា បន្តថា ក្នុងបរិបទកូវីដ-១៩ កម្មវិធីនេះ បានចូលរួមចំណែកលើកកម្ពស់សុវត្ថិភាពសុខភាពសិក្សាដោយជំរុញគណៈគ្រប់គ្រងគ្រឹះស្ថានសិក្សាឱ្យបន្តអនុវត្តន៍គោលការណ៍ប្រតិបត្តិស្តង់ដារ (SoP) របស់ក្រសួងអប់រំ យុវជន និងកីឡា។ សូមបញ្ជាក់ថា ការប្រគល់ពានរង្វាន់ជ័យលាភីសាលាស្អាតនេះ ត្រូវរៀបចំជារៀងរាល់ឆ្នាំ ដោយក្រសួងអប់រំ យុវជន និងកីឡា៕
Tag:
សាលារៀន
អប់រំ
ស្វាយរៀង
កំពង់ចាម
ព្រះសីហនុ
បាត់ដំបង
កំពង់ស្ពឺ
© រក្សាសិទ្ធិដោយ thmeythmey.com