ជាតិ
អាជ្ញាធរ នឹងផ្អាកចរាចរណ៍ពីគល់ស្ពានគីហ្សូណាដល់រង្វង់មូលត្រើង ដើម្បីហែសពលោក ហ៊ុន ណេង រូបភាពបុណ្យសពលោក ហ៊ុន ណេង។ រូបភាពពី ទទក
× ភ្នំពេញ៖ ចរាចរណ៍លើកំណាត់ផ្លូវជាតិលេខ៧ ចាប់ពីរង្វង់មូលគល់ស្ពានគីហ្សូណា ដល់រង្វង់មូលត្រើង នឹងត្រូវផ្អាកបណ្តោះអាសន្ន គឺចាប់ម៉ោង៦ ដល់ម៉ោង១០ព្រឹក ថ្ងៃទី៩ ឧសភា ដើម្បីសម្រួលដល់ការហែសព លោក ហ៊ុន ណេង។ នេះបើតាមសេចក្ដីជូនដំណឹងរបស់រដ្ឋបាលខេត្តកំពង់ចាម។
សពលោក ហ៊ុន ណេង ដែលត្រូវជាបងប្រុសបង្កើតសម្ដេច ហ៊ុន សែន នឹងត្រូវហែចេញពីក្រុងកំពង់ចាម ទៅបញ្ចុះនៅវត្តសុវណ្ណគីរីរតនៈភ្នំប្រុស ស្ថិតក្នុងឃុំក្រឡា ស្រុកកំពង់សៀម ខេត្តកំពង់ចាម។
ដើម្បីបញ្ចៀសការកកស្ទះ និងខ្លាចមានការរំខានដល់ក្បូនដង្ហែសព រដ្ឋបាលខេត្តកំពង់ចាម បានប្រាប់ឱ្យប្រជាពលរដ្ឋ ដែលត្រូវធ្វើដំណើរចូលក្រុងកំពង់ចាម តាមផ្លូវជាតិ៧ ឬផ្លូវជាតិលេខ៧១ ត្រូវវាងតាមផ្លូវលេខ៧០ តាមផ្សារព្រៃទទឹង និងផ្លូវខេត្តលេខ២៧០ ឆ្លងកាត់តាមពាមជីកង ស្រុកកងមាស។
ចំពោះការធ្វើដំណើរពីខេត្តត្បូងឃ្មុំ ឆ្ពោះមកក្រុងកំពង់ចាម ឬទៅភ្នំពេញ ខេត្តកំពង់ធំ និងខេត្តសៀមរាប ត្រូវឆ្លងតាមផ្លូវបេតុង ឃុំជីរោទិ៍ ស្រុកត្បូងឃ្មុំ ឆ្ពោះទៅស្ពានក្រូចឆ្មារ។ អ្នកដំណើរ ក៏អាចបង្វែរទិសដៅ ទៅតាមផ្លូវជាតិ១១ ឆ្ពោះទៅផ្លូវលេខ ៨ដែរ។ នេះបើតាមការជូនដំណឹងរបស់រដ្ឋបាលខេត្តកំពង់ចាម។ សូមបញ្ជាក់ថា លោក ហ៊ុន ណេង ប្រធានគណៈកម្មការទី៤ នៃរដ្ឋសភា បានទទួលមរណភាព ក្នុងអាយុ៧២ឆ្នាំ ដោយសារជំងឺបេះដូង៕
© រក្សាសិទ្ធិដោយ thmeythmey.com