ជាតិ
វីដេអូ
អ្នកស្រី ចាន់ ថូយ ពេញចិត្តការងារជាបណ្ណារក្ស ទោះការធ្វើដំណើរតាមផ្លូវទឹកលំបាក
អ្នកស្រី ចាន់ ថូយ អង្គុយហើយមានកូនប្រុសពជាប់ចង្កេះ
×![]()
ដោយ: ប៉ូ សាគុន
កំពង់ឆ្នាំង៖ អ្នកស្រី ចាន់ ថូយ គឺជាបណ្ណារក្សនៃអង្គការស៊ីប៉ា បានប្រាប់កម្មវិធី “តោះយើងអានជុំគ្នា”ថា កុមារនៅតំបន់ចុងព្រែក ឃុំផ្លូវទូក ស្រុកកំពង់លែង ខេត្តកំពង់ឆ្នាំង ចាប់ផ្ដើមស្រឡាញ់ការអាន តាំងពីអង្គការស៊ីប៉ា ចុះទៅអានអំណានឱ្យពួកគេស្ដាប់។ លទ្ធផលនេះ បានជំរុញចិត្តរបស់អ្នកស្រី ចាន់ ថូយ មិនរារែកឡើយ ក្នុងការធ្វើការងារជាបណ្ណារក្ស បើទោះបីជាអ្នកស្រី ត្រូវយកកូនតូចទាំង៣នាក់ទៅជាមួយ ស្របពេលខែវស្សា មានភ្លៀង ខ្យល់ និងពិបាកធ្វើដំណើរតាមផ្លូវទឹកយ៉ាងណាក្តី។
អ្នកស្រី ចាន់ ថូយ ដែលជាបណ្ណារក្សនៃអង្គការស៊ីប៉ា កំពុងធ្វើដំណើរតាមទូកបណ្ណាល័យចល័ត របស់អង្គការស៊ីប៉ា បានប្រាប់កម្មវិធី “តោះយើងអានជុំគ្នា” ថាកុមារនៅក្នុងឃុំផ្លូវទូក ស្រុកកំពង់លែង ខេត្តកំពង់ឆ្នាំង កាលដំបូងឡើយ ពុំសូវបានចូលរៀនឡើយ ព្រោះផ្ទះរបស់ពួកគេឆ្ងាយពីសាលា ពួកគេគ្មានមធ្យោបាយធ្វើដំណើរ។ ហើយអ្វីដែលជាឧបសគ្គខ្លាំងនោះ ដោយសារពួកគេ ត្រូវធ្វើដំណើរតាមផ្លូវទឹកទៅសាលា ដោយគ្មានមនុស្សធំទៅជាមួយ ទើបម្ដាយឪពុករបស់ពួកគេ មិនហ៊ានបណ្ដោយ។
កុមារនៅតំបន់ចុងព្រែក កំពុងលេងល្បែងបូកលេខ ដែលរៀបចំដោយ អង្គការស៊ីប៉ា
ប៉ុន្តែតាំងពីរាជរដ្ឋាភិបាលកម្ពុជា បានរៀបចំឱ្យគ្រួសារដែលមានផ្ទះបណ្ដែតទឹក ត្រូវឡើយទៅតាំងទីនៅលើគោក ក្មេងៗ ក៏អាចមានលទ្ធភាពចូលរៀនបានច្រើន។ ទោះជាយ៉ាងណាក៏ដោយ បច្ចុប្បន្នក៏នៅមានគ្រួសារមួយចំនួន ត្រូវទៅធ្វើស្រែចម្ការ ឆ្ងាយពីសាលារៀន ហើយត្រូវសម្រាកនៅស្រែនោះតែម្ដង។ ដូច្នេះពួកគេ ក៏យកកូនៗទៅជាមួយដែរ ជាហេតុនាំឱ្យកុមារពិបាកក្នុងការធ្វើដំណើរតាមផ្លូវទឹក មកសាលារៀនដែរ។
អង្គុយលើទូកដែលកំពុងបើកទៅមុខ អ្នកស្រី ចាន់ ថូយ ភ្នែកសម្លឹងឆ្ងាយ ហើយបញ្ជាក់ដូច្នេះ៖ «ចាប់ពីក្មេងតូចៗ រហូតដល់ក្មេងអាយុអាចរៀនថ្នាក់បឋមបាន នៅតំបន់ចុងព្រែក មានប្រហែល២០ ទៅ៣០នាក់។ ម្ដាយឪពុកមិនសូវហ៊ានឱ្យក្មេងៗ បើកទូកទៅរៀននៅលើគោកទេ ព្រោះខ្លាចធ្លាក់ទឹក។ ក្មេងមួយចំនួនតូច មិនអាចចូលរៀនបាន ព្រោះខ្វះលទ្ធភាព។ គ្រួសារខ្លះ គាត់អត់មានម៉ាស៊ីនទូកបើកទៅរៀន។ ដូច្នេះកូនគាត់ ក៏អាចអត់លទ្ធភាពទៅរៀនដែរ។»។
ជាបណ្ណារក្ស ដែលតែងតែចុះទៅតំបន់ផ្សេងៗ ដើម្បីអានសៀវភៅឱ្យកុមារស្ដាប់ ទាំងផ្លូវគោកនិងផ្លូវទឹក ស្រ្តីកូន៣នាក់ ដែលមានកូនស្រីមួយរូបនេះ ក៏បានលើកឡើងអំពីផលលំបាក នៅពេលធ្វើដំណើរម្ដងៗដែរ។ អ្នកស្រីថា បើធ្វើដំណើរនៅខែប្រាំង តាមផ្លូវទឹក ពិបាកខ្លះៗ ក្នុងការបើកទូក ព្រោះមានកំប្លោកច្រើន អាចកឿងទូកទៅមុខមិនរួច ហើយក៏មិនមានផ្លូវកាត់ ឬផ្លូវវាងដែរ។
កុមារនៅក្នុងឃុំផ្លូវទូក ស្រុកកំពង់លែង ខេត្តកំពង់ឆ្នាំង កំពុងរង់ចាំស្ដាប់ការអានអំណាន ពីអង្គការស៊ីប៉ា
ប៉ុន្តែនៅខែវស្សា ងាយស្រួលបើកទូក ព្រោះមានផ្លូវកាត់ច្រើនឆាប់ទៅដល់គោលដៅ និងអាចបើកគេចកំប្លោកបាន។ ទោះជាយ៉ាងណា ការធ្វើដំណើរតាមទូកនៅខែវស្សា ក៏មានផលវិបាកខ្លះៗដែរ ព្រោះមានភ្លៀង និងខ្យល់ច្រើន។
ក្រៅពីផលលំបាកលើការធ្វើដំណើរតាមទឹក បណ្ណារក្សជាស្ត្រីរូបនេះ ក៏បានរំលេចផងដែរ អំពីទំនួលខុសត្រូវជាម្ដាយ។ ជាបុគ្គលិកនៃអង្គការស៊ីប៉ា ទាំងប្ដីនិងប្រពន្ធ បណ្ណារក្សទាំងពីរ ត្រូវយកកូនតូចរបស់ខ្លួនទាំង៣នាក់ទៅតាមស្ទើរតែគ្រប់ពេល ដែលចុះទៅអានអំណានឱ្យកុមារស្ដាប់ នៅតាមភូមិផ្សេងៗ ទាំងផ្លូវទឹកនិងផ្លូវគោក។
«បើកូនស្រីខ្ញុំជាប់រៀន ខ្ញុំមិនយកគាត់ទៅជាមួយទេ តែកូនប្រុសរបស់ខ្ញុំទាំងពីរវិញ ខ្ញុំយកគាត់ទៅជាមួយគ្រប់ពេល។ ហើយបើថ្ងៃណាដែលកូនស្រីខ្ញុំមិនជាប់រៀនទេ ខ្ញុំក៏យកគាត់ទៅជាមួយដែរ ព្រោះខ្ញុំមិនទុកចិត្តឱ្យនៅផ្ទះតែម្នាក់ឯងទេ ខ្លាចម៉ូតូឡានច្រើន។»។ នេះជាការបញ្ជាក់របស់អ្នកស្រី ចាន់ ថូយ ខណៈកូនទាំងបីកំពុងអង្គុយនៅជិតបណ្ណារក្សនៃអង្គការស៊ីប៉ាផ្សេងទៀត ហើយប្ដីរបស់អ្នកស្រីកំពុងបើកទូក។
បើទោះបីជាការងារនេះ មានការលំបាកខ្លះៗក្ដី ប៉ុន្តែសម្រាប់អ្នកស្រី និងគ្រួសារ សប្បាយចិត្តក្នុងការបំពេញការងារនេះ។ ពេញចិត្តក៏ព្រោះអ្នកស្រី ថូយ យល់ឃើញថា ខ្លួនបានរួមចំណែកលើកស្ទួយការអាន ពិសេសគាត់បានជួយឱ្យកុមារ ដែលខ្វះលទ្ធភាពចូលសាលា អាចបានរៀនសូត្រ។
អ្នកស្រី ចាន់ ថូយ កំពុងអានសៀវភៅឱ្យកុមារស្ដាប់ នៅតំបន់ចុងព្រែក ឃុំផ្លូវទូក
ស្ត្រីសម្បុរស្រអែមស្រស់ ចាន់ ថូយ ពន្យល់បន្ថែម៖ «កាលពីមិនទាន់មានស៊ីប៉ាទៅដល់ ក្មេងៗមិនសូវបានទៅរៀនទេ។ ពេលនេះ ពួកគាត់បានទៅនៅលើគោក គាត់ក៏បានទៅរៀនច្រើនដែរ។ ក្មេងៗ គាត់ទៅខ្ចីសៀវភៅដល់ផ្ទះខ្ញុំខ្លះ ហើយពេលខ្ញុំទៅអានតាមភូមិនានា ក្មេងៗនៅទីនោះ ក៏ខ្ចីសៀវភៅយកទៅមើលនៅផ្ទះច្រើនដែរ។»។
បើទោះបីជាធ្វើការក្នុងវិស័យអប់រំក្រៅប្រព័ន្ធទាំងប្ដី និងប្រពន្ធក្ដី ក៏គ្រួសារអ្នកស្រី ចាន់ ថូយ នៅតែបន្តធ្វើស្រែចម្ការ ដើម្បីទទួលបានស្រូវអង្ករ និងប្រាក់ចំណូលបន្ថែម សម្រាប់ផ្គត់ផ្គង់គ្រួសារដែរ។
រូបថតអនុស្សាវរីយ៍ ក្រោយអង្គការស៊ីប៉ា អានអំណានឱ្យកុមារស្ដាប់ នៅឃុំផ្លូវទូក ស្រុកកំពង់លែង ខេត្តកំពង់ឆ្នាំង
កម្មវិធី “តោះយើងអានជុំគ្នា” សូមថ្លែងអំណរគុណអង្គការ Aide Et Action ដែលបានឧបត្ថម្ភកម្មវិធីទាំងមូល និងសូមថ្លែងអំណរគុណអង្គការស៊ីប៉ា ដែលបានសហការផលិតកម្មវិធីនេះ៕
Tag:
អប់រំ
សាលា
ស៊ីប៉ា
បណ្ណាល័យចល័ត
© រក្សាសិទ្ធិដោយ thmeythmey.com
