ដោយ៖ ហេង ស្រីលីន
រតនគិរី៖ ក្រោយរៀនចប់ថ្នាក់ទី១២ ឬឈានដល់ទទួលបានសញ្ញាបត្របាក់ឌុប នាពេលខាងមុខ យុវតីជនជាតិដើមភាគតិច មួយចំនួននៅខេត្តរតនគិរី បានបង្ហាញពីឆន្ទៈរបស់ខ្លួនក្នុងការបន្តការសិក្សាផ្សេងៗ ជំនាញនៅមហាវិទ្យាល័យ ដើម្បីចូលរួមអភិវឌ្ឍ សហគមន៍របស់ខ្លួន។ យុវតីជនជាតិភាគតិចទាំងនោះសម្លឹងឃើញថា មានតែការសិក្សាទេ ដែលអាចជួយពួកគេឱ្យចាកផុតពីការបង្ខំឲ្យរៀបអាពាហ៍ ពិពាហ៍ទាំងវ័យក្មេង ចាកផុតពីភាពក្រីក្រ គំនិតតូចចង្អៀត និងគ្មានការអភិវឌ្ឍក្នុងសហគមន៍។
បច្ចុប្បន្នរៀនថ្នាក់ទី១២នៅវិទ្យាល័យបរកែវ កញ្ញា ទីង ភេគ មានក្តីស្រមៃរបស់ខ្លួនរួចជាស្រេចហើយនោះគឺការបន្តការសិក្សានៅមហាវិទ្យាល័យ។ យុវតីជនជាតិដើមភាគតិចទំពួនរូបនេះ តែងតែក្រោកពីព្រលឹមពោលគឺនៅមុនម៉ោង៧ព្រឹក ដើម្បីធ្វើដំណើរតាមម៉ូតូលើចម្ងាយផ្លូវប្រមាណ២០គីឡូម៉ែត្រឆ្ពោះទៅកាន់សាលារៀន។
ក្នុងជំនួបជាមួយក្រុមការងារសារព័ត៌មានថ្មីៗ យុវតី ទីង ភេគ បានបង្ហាញការតាំងចិត្តរបស់ខ្លួនថា រៀនឲ្យបាននិទ្ទេសល្អ ដើម្បីតោងឱកាសសិក្សាលើជំនាញផ្នែកច្បាប់នៅមហាវិទ្យាល័យក្នុងរាជធានីភ្នំពេញ។ «សម្រាប់ការរៀនបន្តហ្នឹងគឺអត់មានលុយទេ គឺត្រូវធ្វើការងារបណ្តើរ និងរៀនបណ្តើរ ពីព្រោះគ្រួសារខ្ញុំក្រ និងលំបាកខ្លាំង»។ យុវតីអាយុ១៩ឆ្នាំ បានពន្យល់ហេតុផលយ៉ាងដូច្នេះ។
យុវជនជនជាតិដើមភាគតិចគ្រប់រូប មិនមែនសុទ្ធតែទទួលបានឱកាសសិក្សារៀនសូត្រពេញលេញ ដូចយុវជនខ្មែរទូទៅឡើយ ដោយសារតែកត្តាជីវភាពគ្រួសារ ជាពិសេសការរងនូវការបង្ខំឱ្យពួកគេរៀបការទាំងវ័យក្មេង ដើម្បីបានកម្លាំងពលកម្មធ្វើស្រែចម្ការ។ ទីង ភេគ និងយុវតីជាច្រើនទៀត មិនចង់បន្តឲ្យមានរូបភាពបែបនេះឡើយក្នុងសហគមន៍ខ្លួន។
កញ្ញា ទីង ភេគ ជាជនជាតិភាគតិចទំពួន ដែលជាសិស្សថ្នាក់ទី១២នៃវិទ្យាល័យបរកែវ ខេត្តរតនគិរី។
«ខ្ញុំគិតថាការរៀនគឺវាសំខាន់ណាស់ [….] អ្នកខ្លះរៀនចប់ទី១២ ហើយរៀបការ ដោយគិតថារៀបការហើយបានរៀនបន្ត។ ប៉ុន្តែមែនទែនទៅ បើយើងរៀនចប់១២ហើយ យើងទៅរៀនតបានវាចំណេញជាង។ បន្ទាប់មកយើងរៀនបានប៉ុន្មានឆ្នាំហើយទៅរកស៊ីវិញក៏បានដែរ។ ការរៀនគឺ វាអត់ពិបាក ហើយវាក៏មិនស្រួលដែរ ប៉ុន្តែវាត្រូវការចាប់ផ្តើម»។ នេះជាការរៀបរាប់របស់ ទីង ភេគ ដែលចង់ក្លាយជាមេធាវី ដ៏ល្អមួយរូបនាពេលអនាគត។
មិនខុសគ្នានោះឡើយ រម៉ាម អូន កូនចៅពលរដ្ឋជនជាតិដើមភាគតិចចារ៉ាយ ចង់យកចំណេះជំនាញរបស់ខ្លួនដើម្បីចូលរួមអភិវឌ្ឍសហគមន៍។ រៀនរហូតដល់ថ្នាក់ទី១១នៅវិទ្យាល័យបរកែវ ជាឱកាសដែល រម៉ាម អូន ទទួលបានប្រសើរជាងបងៗរបស់ខ្លួន។ យុវតីមកពីស្រុកអូរយ៉ាដាវ បានបញ្ជាក់ថា បងប្រុស បងស្រីទាំង៣នាក់របស់ខ្លួន បានរៀបការក្នុងវ័យ១៥-១៦ឆ្នាំ មុនពេលដែលពួកគាត់រៀនចប់អនុវិទ្យាល័យទៅទៀត។
ថ្វីដ្បិត រម៉ាម អូន ទទួលបានគាំទ្រពីឪពុកម្តាយក្នុងការរៀនឱ្យចប់ថ្នាក់មធ្យមសិក្សាទុតិយភូមិ និង បន្តការសិក្សានៅភ្នំពេញក៏ពិតមែន ប៉ុន្តែយុវតីវ័យ១៨ឆ្នាំនេះ ក៏រងសម្ពាធពីមនុស្សនៅក្នុងសហគមន៍របស់ខ្លួនមិនតិចដែរ។ បើតាមសិស្សថ្នាក់ទី១១រូបនេះ ចាស់ទុំនៅក្នុងភូមិ គឺឱ្យតម្លៃលើការរៀបការជាងការរៀនសូត្ររបស់កូនៗ។
រម៉ាម អូន បានរៀបរាប់ដូច្នេះ៖ «អ្នកភូមិតែងតែនិយាយដាក់ខ្ញុំថា អាយុប៉ុណ្ណឹងហើយ អត់ទាន់យកគ្រួសារទៀត ហើយចាំកាលទៀត។ អាយុប៉ុណ្ណឹងហើយយកប្តីទៅ! ពេលខ្លះមនុស្សស្រីទោះរៀនបានខ្ពង់ខ្ពស់ក៏អត់បានចេញធ្វើការដែរ»។
ទោះរងសម្ពាធនានាក្តី យុវតីជនជាតិដើមភាគតិចទាំងពីរនាក់ខាងលើនៅ តែមានឆន្ទៈបន្តការសិក្សានៅរាជធានីភ្នំពេញ ទៅតាមជំនាញក្នុងក្តីស្រមៃរៀងៗខ្លួន។
កញ្ញា រម៉ាម អូន ជនជាតិភាគតិចចារ៉ាយ និងជាសិស្សថា្នក់ទី១១នៃវិទ្យាល័យបរកែវ
រយៈពេល២-៣ឆ្នាំចុងក្រោយនេះ យុវជនជនជាតិភាគតិចមួយចំនួនហាក់ចាប់យកការសិក្សាជាអាទិភាពជាងការរៀបអាពាហ៍ពិពាហ៍ ព្រោះតែឪពុកម្តាយរបស់ពួកគេយល់ដឹងច្រើនពីតម្លៃនៃការសិក្សា។ លោក ហួន ខាន់ ដែលស្ថាបនិកក្រុមយុវជនជនជាតិដើមភាគតិចព្រៅ បានលើកឡើងថា នេះជាផលវិជ្ជមានមួយ សម្រាប់សហគមន៍ ដោយមនុស្សម្នាក់ៗជាកម្លាំងចលករកម្រិតសហគមន៍ទាំងមូល ដែលពួកគាត់ចាប់ផ្តើមយល់ដឹងពីបញ្ហារៀបការទាំងវ័យក្មេង ហើយងាកមកខិតខំរៀនសូត្រវិញ ដើម្បីចូលរួមអភិវឌ្ឍសហគមន៍។
លោក ហួន ខាន់ បាននិយាយដូច្នេះ៖ «នៅពេលសហគមន៍របស់យើង ចាប់ផ្តើមយល់ដឹងពីបញ្ហានេះ ហើយមានការគាំទ្រច្រើនក្នុងការលើកកម្ពស់អប់រំដល់យុវជនជនជាតិភាគតិច! នោះសហគមន៍យើងនឹងរីកចម្រើនទាំងគ្រួសារ សេដ្ឋកិច្ច និងខ្លួនឯង។ លើសពីនេះ ពួកគេក៏អាចកាត់បន្ថយពីប្រពៃណី ដោយការរៀបការទាំងវ័យក្មេង ផងដែរ»។
ដ្បិតថាទំនោនៃការចាប់ផ្តើមឱ្យតម្លៃលើសិក្សាពីសំណាក់យុវជនជនជាតិភាគតិច បានបង្ហាញនូវភាពវិជ្ជមាននៅក្នុងសហគមន៍ក៏ពិតមែន ប៉ុន្តែ ស្ថាបនិកក្រុមយុវជនជនជាតិដើមភាគតិចព្រៅរូបនេះ ក៏មើលឃើញថា ការចាប់យកការសិក្សាពីសំណាក់យុវជនទាំងនេះ គឺមិនទាន់មានភាពទូលំទូលាយទេ ជាពិសេសចំពោះយុវជនដែលនៅរស់នៅតំបន់ដាច់ស្រយាល។ លោកបន្តថ្លែងប្រាប់សារព័ត៌មានថ្មីៗ(ThmeyThmey)ថា៖ «ឪពុកម្តាយ[ជនជាតិដើមភាគតិច]នៅតាមជនបទ គឺពួកគាត់ខ្វះការយល់ដឹងនៃសិក្សារបស់កូនៗ។ នេះក៏បណ្តាពីមកការយល់ដឹងបែបចាស់បុរាណរបស់ពួកគាត់។ រីឯ ការបោះបង់ការសិក្សា[យុវជនជនជាតិដើមភាគតិត]គឺនៅតែមានអ៊ីចឹង ចំពោះអ្នករស់នៅតំបន់ដាច់ស្រយាល»។
បើតាមលោក ហួន ខាន់ យុវជនជនជាតិដើមភាគតិចដែលបោះបង់ការសិក្សាទាំងវ័យក្មេង គឺវាទាក់ទងនឹងចំណេះដឹងឪពុកម្តាយ បញ្ហាជីវភាពឬលទ្ធភាពគ្រួសារ ដែលតម្រូវកូនប្រុសស្រីរបស់ពួកគេរៀបការយកកូនដើម្បីបានកម្លាំងពលកម្មធ្វើស្រែចម្ការ។
បច្ចុប្បន្ន គម្រោងអង្គការភ្លែន(Plan International Cambodia) កំពុងយកចិត្តដាក់ទុកលើ កុមារ និងយុវជន ជាពិសេសកុមារនិងយុវជនជនជាតិដើមភាគតិច ឱ្យទទួលបានឱកាសសិក្សាខ្ពស់ និងចូលរួមអភិវឌ្ឍសហគមន៍របស់គាត់។ ក្រៅពីអង្គការភ្លែន ក្រសួងអប់រំ យុវជន និងកីឡា កន្លងមកក៏បានសហការជាមួយអង្គការយូនីសេហ្វកម្ពុជា(UNICEF) និងអង្គការ CARE ដើម្បីផ្តល់ការអប់រំពហុភាសាដល់កុមារី និងកុមារាជនជាតិដើមភាគតិច ផងដែរ។
កម្មវិធីសិក្សាសម្រាប់ការអប់រំពហុភាសា ត្រូវបានអនុវត្តដោយប្រើប្រាស់ភាសាខ្មែរ និងភាសាជនជាតិដើមភាគតិចចំនួនប្រាំ (ព្នង ការ៉ែត គ្រឹង ទំពួន និងព្រៅ) នៅក្នុងខេត្តមណ្ឌលគិរី រតនគិរី ក្រចេះ ស្ទឹងត្រែង និងខេត្តព្រះវិហារ៕