ព្រះអង្គម្ចាស់ នរោត្តម ចក្រាវុធ ប្រធានគណបក្សហ៊្វុនស៊ិនប៉ិច តាមរយៈហ្វេសប៊ុករបស់ខ្លួន បានកោតសរសើរសមាជិក សមាជិកាគណបក្សចំពោះការលះបង់កម្លាំងស្មារតី និងធនធានផ្ទាល់ខ្លួនកន្លងមក។ នាថ្ងៃទី៨ ខែមិថុនា នេះ ពោលគឺក្រោយការបោះឆ្នោតក្រុមប្រឹក្សាឃុំ-សង្កាត់អណត្តិទី៥ ព្រះអង្គបានចុះជួបសំណេះសំណាល និងលើកទឹកសមាជិករបស់ខ្លួននៅខេត្តកំពង់ឆ្នាំង។
«ខ្ញុំនឹងបន្តដំណើរទៅមុខ រួបរួមគ្នា ជាមួយសមាជិក សមាជិកាគណបក្សរាជានិយម អ្នកជាតិនិយម សីហនុនិយម រណឫទ្ធិនិយម ដើម្បីកែប្រែគណបក្សរាជានិយមមួយនេះទទួលបានភាពជោគជ័យ មានអាសនៈក្នុងការបោះឆ្នោតជ្រើសតាំងតំណាងរាស្ត្រ ឆ្នាំ២០២៣ ខាងមុខនេះ»។ ប្រធានគណបក្សហ៊្វុនស៊ិនប៉ិច បានលើកឡើងយ៉ាងដូច្នេះ។
ព្រះអង្គម្ចាស់ចក្រាវុធ បានមានបន្ទូលបន្ថែមថា គ្រប់គ្នាដែលដង្ហែតាមព្រះអង្គ សុទ្ធតែជាអ្នកមានស្វាមីភក្ដិចំពោះគណបក្សរាជានិយមដ៏មានវ័យចំណាស់ ជាពិសេសសុទ្ធតែជាអ្នកគោរពស្រឡាញ់សម្តេចក្រុមព្រះ នរោត្តម រណឫទ្ធិ ដែលជាព្រះបិតារបស់ព្រះអង្គ។
ព្រះអង្គបានបន្ថែមថា៖ «ខ្ញុំពេលនេះ ទោះបីជាទទួលផ្លែដំឡូងក្តៅក្នុងដៃ តែខ្ញុំរកវិធីសាស្ត្រ គ្រប់បែបយ៉ាងធ្វើយ៉ាងណា ឲ្យដំឡូងក្តៅនេះ ត្រជាក់ឲ្យកាន់តែលឿនសំដៅធ្វើយ៉ាងឲ្យសមាជិក សមាជិកា គណបក្សរាជានិយម អ្នកជាតិនិយម សីហនុនិយម រណឫទ្ធិនិយម ឆាប់បានបកសំបកពិសារបានទាំងអស់គ្នា»។
សូមបញ្ជាក់ថា នាការបោះឆ្នោតក្រុមប្រឹក្សាឃុំ-សង្កាត់អណត្តិទី៥ កាលពីថ្ងៃទី៥ ខែមិថុនា គណបក្សហ៊្វុនស៊ិនប៉ិច បានដាក់បេក្ខភាពប្រកួតប្រជែងនៅ៦៨០ឃុំ-សង្កាត់ក្នុងបណ្តារាជធានី-ខេត្តចំនួន១៤។ លទ្ធផលបឋមដែលគណនាក្រៅផ្លូវការដោយសារព័ត៌មានថ្មីៗ បង្ហាញថា បក្សរាជានិយមមួយនេះ អាចទទួលបានត្រឹមតែ១៧អាសនៈដោយមិនមានតំណែងមេឃុំ-ចៅសង្កាត់នោះឡើយ។
តាមលទ្ធផលបឋមក្រៅផ្លូវការ មូលដ្ឋានដែលគណបក្សហ៊្វុនស៊ិនប៉ិចទទួលបានអាសនៈ មានដូចជា ៣អាសនៈនៅឃុំឈូក, ១អាសនៈនៅឃុំស្រើង ស្រុកប្រាសាទសំបូរ, ២អាសនៈនៅឃុំរុងរឿង, ១អាសនៈនៅឃុំបន្ទាយស្ទោង, ១អាសនៈនៅឃុំចំណារលើ, ១អាសនៈនៅឃុំពពក ស្រុកស្ទោង, ១អាសនៈនៅឃុំកំពង់គោ, ១អាសនៈនៅឃុំសាន់គរ ស្រុកកំពង់ស្វាយ ខេត្តកំពង់ធំ។ ១អាសនៈនៅឃុំអង្គរជ័យ ស្រុកអង្គរជ័យ, ១អាសនៈនៅឃុំពងសត្វ ស្រុកឈូក ខេត្តកំពត។ ១អាសនៈនៅឃុំពង្រ ស្រុកឆ្លូង ខេត្តក្រចេះ។ ១អាសនៈនៅឃុំកាំងចាម ស្រុកថាឡាបរិវ៉ាត់, ១អាសនៈនៅឃុំកោះស្នែង ស្រុកបុរីអូរស្វាយសែនជ័យ ខេត្តស្ទឹងត្រែង និង១អាសនៈនៅសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
នាការបោះឆ្នោតកាលពីឆ្នាំ២០១៧ គណបក្សហ៊្វុនស៊ិនប៉ិចទទួលបានតំណែងសមាជិកក្រុមប្រឹក្សាឃុំ-សង្កាត់ចំនួន ២៨អាសនៈ ហើយបាន២៣៥អាសនៈបន្ថែមទៀត ក្រោយការរំលាយគណបក្សសង្គ្រោះជាតិ៕