ឧកញ៉ា សង ថន និងអតីតអភិបាលរងបាត់ដំបង ត្រូវជាប់ពន្ធនាគារ៧ឆ្នាំ ពាក់ព័ន្ធការកាន់កាប់ដីខុសច្បាប់៥ពាន់ហិកតា

ជាតិ

សង្គមជាតិ

ឧកញ៉ា សង ថន និងអតីតអភិបាលរងបាត់ដំបង ត្រូវជាប់ពន្ធនាគារ៧ឆ្នាំ ពាក់ព័ន្ធការកាន់កាប់ដីខុសច្បាប់៥ពាន់ហិកតា

10, Jun 2022 , 5:57 pm

រូបភាព

ដោយ៖ វ៉ន ស៊ីចេន

ភ្នំពេញ៖ សាលាដំបូងរាជធានីភ្នំពេញ សម្រេចផ្តន្ទាទោសលោកឧកញ៉ា សង ថន និងលោក ស៊ូ អារ៉ាហ្វាត់ ដែលមុនត្រូវចាប់ខ្លួន គឺជាអភិបាលរងខេត្តបាត់ដំបង ឲ្យជាប់ពន្ធនាគារ៧ឆ្នាំ ព្រមទាំងត្រូវបង់ប្រាក់២,៥ម៉ឺនដុល្លារក្នុងម្នាក់ៗ ចូលទៅរដ្ឋ ពាក់ព័ន្ធនឹងការក្លែងបន្លំយកដីប្រមាណ៥ពាន់ហិកតា នៅស្រុកគាស់ក្រឡ ខេត្តបាត់ដំបង។ សាលក្រមស្តីពីការផ្តន្ទាទោសលើអ្នកទាំង២ ត្រូវបានប្រកាស នៅព្រឹកថ្ងៃទី១០ ខែមិថុនា ឆ្នាំ២០២២នេះ។

លោក សង ថន ត្រូវបានចោទ២បទល្មើស គឺ បទផ្តើមគំនិតគិតក្នុងបទបំផ្លាញដោយចេតនា និងគេងបំបាត់ដោយទុច្ចរិត។ រីឯលោក ស៊ូ អារ៉ាហ្វាត់ ត្រូវបានចោទ៣បទល្មើស រួមមាន បទបំផ្លាញដោយចេតនា បទគៃបំបាត់ដោយទុច្ចរិត និងបទស៊ីសំណូក។

លោកទាំង២ ត្រូវបានអង្គភាពប្រឆាំងអំពើពុករលួយ (ACU) នាំខ្លួនទៅសាកសួរ ហើយបញ្ជូនទៅឲ្យតុលាការភ្នំពេញ កាលពីពាក់កណ្តាលឆ្នាំ២០២០។ ពួកគាត់ ត្រូវរកឃើញថា ពាក់ព័ន្ធនឹងអំពើពុករលួយក្នុងរឿងដីធ្លី នៅស្រុកគាស់ក្រឡ។ ចំពោះលោក សង ថន ដែលកាន់កាប់ដីប្រមាណ៥ពាន់ហិកតា ក្នុងស្រុកគាស់ក្រឡ ចាប់ផ្តើមមានទំនាស់ជាមួយប្រជាពលរដ្ឋ តាំងពីឆ្នាំ២០១៥មកម្ល៉េះ។

រឿងលោក ថង ថន និងលោក ស៊ូ អារ៉ាហ្វាត់ ក៏បានលេចឮដល់សម្តេចនាយករដ្ឋមន្ត្រី ហ៊ុន សែន ដែរ។ ក្នុងកិច្ចប្រជុំមួយរបស់គណៈរដ្ឋមន្ត្រី កាលពីអំឡុងខែកក្កដា ឆ្នាំ២០២០ សម្តេចនាយករដ្ឋមន្ត្រី ប្រាប់ឲ្យរដ្ឋបាលខេត្តបាត់ដំបង និងក្រសួងពាក់ព័ន្ធ ដកហូតដីធ្លីទាំងនោះ ពីលោក សង ថន មកវិញ ដែលបានទន្ទ្រានយកដោយខុសច្បាប់ ហើយទុកចែកឲ្យប្រជាពលរដ្ឋ៕