សមយុទ្ធពស់មាស​ ជាលំហាត់យោធាវ័យចំណាស់មួយលើពិភពលោក និងជាលំហាត់ពហុសាសន៍ធំជាងគេនៅអាស៊ីគ្នេយ៍។ ដោយសារការផ្ទុះឡើងជំងឺកូវីដ-១៩ ថៃ និងអាម៉េរិក កាត់បន្ថយទំហំសមយុទ្ធរួមគ្នានេះ ដើម្បីទប់ស្កាត់ការឆ្លងរាលដាល។

 

ទោះជាយ៉ាងណា​ សមយុទ្ធឆ្នាំក្រោយ នឹងត្រូវរៀបចំពេញលេញឡើងវិញ។ អ្នកនាំពាក្យក្រសួងការពារជាតិថៃ Kongcheep Tantravanich ប្រាប់អ្នកសារព័ត៌មាននៅថ្ងៃទី១៣ ខែមិថុនា ថា អាម៉េរិក និងថៃ ឯកភាពគ្នារួចហើយលើការរៀបចំសមយុទ្ធក្នុងទ្រង់ទ្រាយធំឡើងវិញនៅឆ្នាំក្រោយដែលនឹងរួមបញ្ចូលលំហាត់សង្រ្គាមតាមអនឡាញផងដែរ។

 

ការឯកភាពនេះ ធ្វើឡើងអំឡុងជំនួបរវាងរដ្ឋមន្រ្តីការពារជាតិអាម៉េរិក ឡយ អូស្ទីន និងនាយករដ្ឋមន្រ្តីថៃ ប្រាយុទ្ធ ចន្ទអូចា ដែលជារដ្ឋមន្រ្តីការពារជាតិថៃផង។ បើតាមអ្នកនាំពាក្យដដែល លោក អូស្ទីន ដែលធ្វើទស្សនកិច្ចនៅថៃលើកដំបូង ក៏បញ្ជាក់ជំហររបស់អាម៉េរិកក្នុងការបន្តគាំទ្រយោធាថៃលើផ្នែកបច្ចេកវិទ្យា ការហ្វឹកហាត់ អាវុធ និងការអភិវឌ្ឍឧស្សាហកម្មការពារជាតិ។

 

ចំណែកលោក ប្រាយុទ្ធ វិញ លើកពីការគាំទ្ររបស់ថៃចំពោះអាម៉េរិកដោយអនុវត្តតាមច្បាប់អន្តរជាតិ។ លោក Tantravanich លើកឡើងទៀតថា មេដឹកនាំទាំងពីរ ក៏បញ្ជាក់ជាថ្មីការអនុវត្តតាមសេចក្ដីថ្លែងការណ៍ទស្សនវិស័យឆ្នាំ២០២០ ដែលនឹងពង្រឹងសម្ព័ន្ធភាពថៃ-អាម៉េរិកទៀតដែរ។

 

សូមបញ្ជាក់ថា ថៃ និងហ្វីលីពីន ជាប្រទេសពីរគត់នៅអាស៊ីអាគ្នេយ៍ដែលមានទំនាក់ទំនងជាមួយអាម៉េរិកដល់កម្រិតសម្ព័ន្ធភាពសន្ធិសញ្ញា ដែលអនុញ្ញាតឱ្យអាម៉េរិកផ្ដល់ជំនួយយោធាក្នុងករណីមានការវាយប្រហារណាមួយ៕