ក្រោយការធ្វើប្រជាមតិរួបរួមជាមួយរុស្ស៊ីនៅតំបន់អ៊ុយក្រែនចំនួន៤កាលពីចុងខែកញ្ញា ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី៥ ខែតុលា បានចុះហត្ថលេខាលើច្បាប់បញ្ចូលទឹកដីអ៊ុយក្រែនជាង១៥ភាគរយជារបស់រុស្ស៊ី។ ការចុះហត្ថលេខារបស់មេដឹកនាំរុស្ស៊ី ជានីតិវិធីចុងក្រោយ បន្ទាប់ពីទាំងសភាជាន់ទាប និងសភាជាន់ខ្ពស់រុស្ស៊ីផ្តល់សច្ចាប័នរួចរាល់។ 

 

«ប្រធានាធិបតីរុស្ស៊ី វ្ល៉ាឌីមៀ ពូទីន បានចុះហត្ថលេខាលើច្បាប់ធម្មនុញ្ញសហព័ន្ធចំនួន៤ស្តីពីការបញ្ចូលសាធារណរដ្ឋ Donetsk, សាធារណរដ្ឋ Luhansk, តំបន់ Zaporizhzhia និងតំបន់ Kherson ក្នុងសហព័ន្ធរុស្ស៊ី»។ សភាជាន់ទាបរុស្ស៊ីប្រកាសបែបនេះនៅថ្ងៃទី៥​ ខែតុលា​ ដោយបន្ថែមថា លោក ពូទីន ក៏បានចុះហត្ថលេខាលើច្បាប់ពាក់ព័ន្ធស្តីពីការផ្តល់សច្ចាប័នផងដែរ។ 

 

យ៉ាងណាមិញ ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី រួមទាំងមេដឹកនាំលោកខាងលិចបញ្ជាក់កន្លងមកថា នេះជាការលេបទឹកដីដោយខុសច្បាប់អន្តរជាតិ ហើយពួកគេគ្មានថ្ងៃទទួលស្គាល់ទង្វើបំពានអធិបតេយ្យអ៊ុយក្រែនបែបនេះទេ។ លោក ហ្សេលេនស្គីថែមទាំងអះអាងទ័ពអ៊ុយក្រែននឹងដណ្តើមដែនដីទាំងនោះមកវិញ ខណៈលោក ពូទីន ព្រមាននឹងប្រើវិធីគ្រប់យ៉ាងរួមមានអាវុធនុយក្លេអ៊ែរដើម្បីការពារទឹកដីរុស្ស៊ី។

 

សូមបញ្ជាក់ថា បើទោះជាត្រូវបានបញ្ចូលជាទឹកដីរុស្ស៊ីជាផ្លូវការក៏ដោយ រុស្ស៊ីមិនគ្រប់គ្រងតំបន់អ៊ុយក្រែនទាំង៤នោះទាំងស្រុងឡើយ។ ក្នុងសប្តាហ៍ចុងក្រោយនេះ កងទ័ពអ៊ុយក្រែនដណ្តើមបានតំបន់ជាច្រើននៅតំបន់ Kherson និង Donetsk ដែលត្រូវបានលោកខាងលិចចាត់ទុកថាជាការបរាជ័យដ៏ធំរបស់រុស្ស៊ីក្នុងប្រតិបត្តិការសឹក៕